ಫಿಟ್ ಆ್ಯಂಡ್ ಫೈನ್ ದೇಹಕ್ಕೆ ವ್ಯಾಯಾಮಕ್ಕಿಂತ ಡಯಟ್ ಮುಖ್ಯ

ಆರೋಗ್ಯ ಮಹಾಭಾಗ್ಯ ಎಂಬ ಉಕ್ತಿ ನಾವೆಲ್ಲಾ ಕೇಳಿದ್ದೇವೆ. ಆದರೆ ಆರೋಗ್ಯವನ್ನು ಆಧುನಿಕ ಜೀವನಶೈಲಿಗೆ ಒಗ್ಗಿಕೊಂಡು ಭಾಗ್ಯವಾಗಿಸಿಕೊಳ್ಳುವುದಿದೆಯಲ್ಲಾ ಅದು ನಿಜವಾಗಿಯೂ ಸವಾಲು. ದೇಹವನ್ನು ಫಿಟ್ ಆ್ಯಂಡ್ ಫೈನ್ ಆಗಿ ಇರಿಸಿಕೊಳ್ಳಲು ನಿಯಮಿತ ವ್ಯಾಯಾಮ, ಪೌಷ್ಟಿಕ ಆಹಾರಗಳ ಸೇವನೆಯತ್ತ ಗಮನಹರಿಸಬೇಕಾಗುತ್ತದೆ. ನಿಮ್ಮ ಆರೋಗ್ಯ, ಸಂತೋಷ ಮತ್ತು ಸೌಂದರ್ಯಕ್ಕೆ ಫಿಟ್ನೆಸ್ ಅತ್ಯಗತ್ಯ. ಆದರೆ ವ್ಯಾಯಾಮದಿಂದ ಮಾತ್ರ ನೀವು ಫಿಟ್ ಆಗಿರಲು ಸಾಧ್ಯವಿಲ್ಲ. ಆಹಾರವು ಸಹ ಮುಖ್ಯವಾಗುತ್ತದೆ.

ಉತ್ತಮ ಆಹಾರದ ಜೊತೆಗೆ, ಉತ್ತಮ ರೀತಿಯಲ್ಲಿ ವ್ಯಾಯಾಮ ಮಾಡುವ ಮೂಲಕ ನಿಮ್ಮ ಫಿಟ್ನೆಸ್ ಮತ್ತು ಆರೋಗ್ಯವನ್ನು ಕಾಪಾಡಿಕೊಳ್ಳಬಹುದು. ನಿಮ್ಮ ಆಹಾರದಲ್ಲಿ ಯಾವುದೇ ಪೌಷ್ಟಿಕಾಂಶದ ಕೊರತೆಯಿದ್ದರೂ ಅದು ನಿಮ್ಮ ಆರೋಗ್ಯದ ಮೇಲೆ ನೇರ ಪರಿಣಾಮ ಬೀರುತ್ತದೆ. ಸರಿಯಾದ ವ್ಯಾಯಾಮ ಮತ್ತು ಸರಿಯಾದ ಆಹಾರವನ್ನು ಸಮತೋಲಿತವಾಗಿ ತೆಗೆದುಕೊಂಡರೆ ಮಾತ್ರ ಅದು ನಿಮಗೆ ವರವಾಗಿ ಕೆಲಸ ಮಾಡುತ್ತದೆ. ಏಕೆಂದರೆ ಫಿಟ್ನೆಸ್ ವಿಚಾರದಲ್ಲಿ ವ್ಯಾಯಾಮ, ಆಹಾರ ಒಂದೇ ನಾಣ್ಯದ ಎರಡು ಮುಖಗಳಿದ್ದಂತೆ. ಹೆಚ್ಚು ಪೌಷ್ಟಿಕಾಂಶ ಆಹಾರ ಸೇವಿಸಿದರೆ ನಿಮ್ಮ ವ್ಯಾಯಾಮದ ಅವಧಿಯನ್ನು ಇನ್ನಷ್ಟು ಹೆಚ್ಚಿಸಬಹುದು. ಆಗ ನಿಮ್ಮ ದೇಹದಲ್ಲಿ ಯಾವುದೇ ಜೀವಸತ್ವಗಳ ಕೊರತೆ ಇರುವುದಿಲ್ಲ.

ಹಾಗಾಗಿ ವ್ಯಾಯಾಮದ ಮೊದಲು ಮತ್ತು ನಂತರ ಯಾವ ರೀತಿಯ ಆಹಾರ ಸೇವಿಸಬೇಕು ಎಂದು ತಿಳಿದುಕೊಂಡು ದೇಹವನ್ನು ಆರೋಗ್ಯಯುತವಾಗಿ, ಫಿಟ್ ಆಗಿ ಇರಿಸಿಕೊಳ್ಳೋಣ.

1. ಬೆಳಗಿನ ಉಪಹಾರ ಆರೋಗ್ಯಕರವಾಗಿರಲಿ
ಫಿಟ್ನೆಸ್ ಅಥವಾ ವ್ಯಾಯಾಮದ ಬಗ್ಗೆ ಗಮನ ಹರಿಸುವವರು ಆರೋಗ್ಯಕರ ಉಪಹಾರದೊಂದಿಗೆ ದಿನವನ್ನು ಪ್ರಾರಂಭಿಸಬೇಕು. ನಿಮ್ಮ ಆಹಾರದಲ್ಲಿ ಬೆಳಗಿನ ಉಪಾಹಾರವು ಅತ್ಯಂತ ಮುಖ್ಯವಾಗಿದೆ. ವ್ಯಾಯಾಮಕ್ಕೆ ಕನಿಷ್ಠ ಒಂದು ಗಂಟೆ ಮೊದಲು ಉಪಹಾರ ಸೇವಿಸಬೇಕು. ವ್ಯಾಯಾಮದ ಮೊದಲು ದೇಹಕ್ಕೆ ಬೇಕಾದ ಕಾರ್ಬೋಹೈಡ್ರೇಟ್‍ಗಳು ದೊರೆತರೆ ವ್ಯಾಯಾಮದ ಸಾಮರ್ಥ್ಯ ಹೆಚ್ಚಾಗುತ್ತದೆ ಎಂದು ಹೇಳಲಾಗುತ್ತದೆ. ಅದಕ್ಕಾಗಿಯೇ ವ್ಯಾಯಾಮದ ಮೊದಲು ಲಘು ಮತ್ತು ಆರೋಗ್ಯಕರ ಉಪಹಾರವನ್ನು ತೆಗೆದುಕೊಳ್ಳಬೇಕು. ಈ ರೀತಿ ಮಾಡುವುದರಿಂದ ದೇಹವು ತುಂಬಾ ಸಕ್ರಿಯ ಮತ್ತು ಶಕ್ತಿಯುತವಾಗಿರುತ್ತದೆ.

2. ವ್ಯಾಯಾಮಕ್ಕೂ ಮೊದಲ ಲಘು ಆಹಾರ ಸೇವನೆ:  ವ್ಯಾಯಾಮವನ್ನು ಪ್ರಾರಂಭಿಸುವುದಕ್ಕಿಂತ ಮೊದಲು ಲಘುವಾದ ಆಹಾರ ಸೇವನೆ ಮುಖ್ಯವಾಗುತ್ತದೆ. ಧಾನ್ಯಗಳು (ಕಡಿಮೆ ಕೊಬ್ಬು ಅಥವಾ ಕೆನೆರಹಿತ ಹಾಲು), ಸಂಪೂರ್ಣ ಗೋಧಿ ಟೋಸ್ಟ್, ಕಡಿಮೆ-ಕೊಬ್ಬು ಅಥವಾ ಕೊಬ್ಬು-ಮುಕ್ತ ಮೊಸರು, ಧಾನ್ಯದ ಪಾಸ್ಟಾ, ಕಂದು ಅಕ್ಕಿ, ಹಣ್ಣುಗಳು ಮತ್ತು ತರಕಾರಿಗಳಂತಹ ಆರೋಗ್ಯಕರ ಕಾರ್ಬೋಹೈಡ್ರೇಟ್‍ಗಳನ್ನು ಸೇವಿಸುವುದು ಒಳ್ಳೆಯದು. ಇವುಗಳ ಜೊತೆಗೆ ಓಟ್ಸ್, ಕಾರ್ನ್‍ಫ್ಲೆಕ್ಸ್, ಕಡಿಮೆ ಕೊಬ್ಬಿನ ಹಾಲು, ಬಾಳೆಹಣ್ಣು, ಸೇಬು, ಮೊಸರು ಅಥವಾ ಮೊಟ್ಟೆಯನ್ನು ಸಹ ಬೆಳಿಗ್ಗೆ ತಿನ್ನಬಹುದು.

3. ತಿನ್ನುವ ಆಹಾರದ ಮೇಲೆ ವ್ಯಾಯಾಮ ನಿರ್ಧರಿಸಿ: ತಾಲೀಮು ಮಾಡುವ ಮೊದಲು ನೀವು ಎಷ್ಟು ತಿನ್ನುತ್ತೀರಿ ಎಂಬುದರ ಮೇಲೆ ನಿಗಾವಹಿಸಿ. ಸಾಮಾನ್ಯವಾಗಿ ಜನರು ವ್ಯಾಯಾಮದ ಮೊದಲು ಹೆಚ್ಚು ಅಥವಾ ಕೆಲವೊಮ್ಮೆ ಕಡಿಮೆ ಪ್ರಮಾಣದ ಆಹಾರವನ್ನು ಸೇವಿಸುತ್ತಾರೆ, ಇದು ನಿಮ್ಮ ವ್ಯಾಯಾಮದ ಮೇಲೆ ಪರಿಣಾಮ ಬೀರುತ್ತದೆ ಮತ್ತು ಈ ಆಹಾರವು ನಿಮ್ಮ ದೇಹದ ಮೇಲೆ ಕೆಟ್ಟ ಪರಿಣಾಮವನ್ನು ಬೀರುತ್ತದೆ. ಉದಾಹರಣೆಗೆ, ನೀವು ಎಂದಾದರೂ ಹೆಚ್ಚು ಆಹಾರ ಸೇವಿಸಿದರೆ ಮರುದಿನ ಕನಿಷ್ಟ 3 ರಿಂದ 4 ಗಂಟೆಗಳವರೆಗೆ ವ್ಯಾಯಾಮ ಮಾಡಬೇಕು.

4. ವ್ಯಾಯಾಮದ ನಂತರದ ಡಯಟ್ : ವ್ಯಾಯಾಮವಾದ 2 ಗಂಟೆಗಳೊಳಗೆ ಆಹಾರ ಸೇವಿಸಬೇಕು. ವ್ಯಾಯಾಮದ ನಂತರ ನಿಮ್ಮ ದೇಹಕ್ಕೆ ಸಾಕಷ್ಟು ಶಕ್ತಿಯ ಅಗತ್ಯವಿರುತ್ತದೆ. ನಿಮ್ಮ ದೇಹವನ್ನು ಚೇತರಿಸಿಕೊಳ್ಳಲು ಆರೋಗ್ಯಕರ ಆಹಾರವು ಸಹ ಅಗತ್ಯವಾಗುತ್ತದೆ. ವ್ಯಾಯಾಮದ ನಂತರ ತಿನ್ನುವ ಆಹಾರವು ಕಾರ್ಬೋಹೈಡ್ರೇಟ್‍ಗಳು ಮತ್ತು ಪ್ರೋಟೀನ್ ಗಳಿಂದ ಸಮೃದ್ಧವಾಗಿರಬೇಕು. ಹಾಗಾಗಿ ವ್ಯಾಯಾಮದ ನಂತರ ಹಣ್ಣುಗಳು, ಮೊಸರು, ಕಡಲೆಕಾಯಿ ಬೆಣ್ಣೆ ಸ್ಯಾಂಡ್‍ವಿಚ್‍ಗಳು, ಕಡಿಮೆ ಕೊಬ್ಬಿನ ಚಾಕೊಲೇಟ್ ಹಾಲು, ಮೊಟ್ಟೆ, ಪ್ರೋಟೀನ್ ಶೇಕ್, ಚಪಾತಿ, ತರಕಾರಿಗಳು, ಸ್ಟಫ್ಡ್ ಚಪಾತಿ ಸೇವಿಸಬಹುದು.

ಇದನ್ನೂ ಓದಿ: ಅತಿಯಾದ ವ್ಯಾಯಾಮದ ಅಡ್ಡಪರಿಣಾಮಗಳು: ಫಿಟ್ನೆಸ್ ಆಮಿಷಕ್ಕೆ ಬಲಿಯಾಗುತ್ತಿದೆಯೇ ಯುವಪೀಳಿಗೆ?