ಯುಜ್ವೇಂದ್ರ ಚಾಹಲ್ 'ವೇಪಿಂಗ್' ವಿವಾದ: Vlogging ನಿಲ್ಲಿಸುವಂತೆ ಪಂಜಾಬ್ ಕಿಂಗ್ಸ್‌ನ ಅರ್ಶದೀಪ್ ಸಿಂಗ್‌ಗೆ BCCI ಸೂಚನೆ!

ಪಂಜಾಬ್ ಕಿಂಗ್ಸ್ ವೇಗಿ ಅರ್ಶ್‌ದೀಪ್ ಸಿಂಗ್ ಅವರ ತಂಡದ ಸಹ ಆಟಗಾರ ಯುಜ್ವೇಂದ್ರ ಚಾಹಲ್ ವಿಮಾನದಲ್ಲಿ ವೇಪ್ (ಇ-ಸಿಗರೇಟ್) ಮಾಡಿದ್ದಾರೆ ಎಂಬ ಆರೋಪದ ನಡುವೆ, ಸಾಮಾಜಿಕ ಮಾಧ್ಯಮಕ್ಕಾಗಿ ವ್ಲಾಗಿಂಗ್ (vlogging) ಮಾಡುವುದನ್ನು ನಿಲ್ಲಿಸುವಂತೆ ಬಿಸಿಸಿಐ ಸೂಚಿಸಿದೆ ಎಂದು ಮೂಲಗಳು ಎನ್‌ಡಿಟಿವಿಗೆ ತಿಳಿಸಿವೆ.

ಅರ್ಶದೀಪ್ ಅವರ ಇತ್ತೀಚಿನ ವ್ಲಾಗ್‌ನಲ್ಲಿ ತಂಡವು ಅಹಮದಾಬಾದ್‌ನಿಂದ ಹೈದರಾಬಾದ್‌ಗೆ ಪ್ರಯಾಣಿಸುತ್ತಿದ್ದಾಗ ವಿಮಾನದೊಳಗೆ ಯುಜ್ವೇಂದ್ರ ಚಾಹಲ್ ವೇಪ್ ಬಳಸುತ್ತಿದ್ದಾರೆ ಎಂದು ಸಾಮಾಜಿಕ ಮಾಧ್ಯಮ ಬಳಕೆದಾರರು ಆರೋಪಿಸಿದ್ದರು. ನಂತರ ಅದು ಭಾರಿ ವಿವಾದಕ್ಕೆ ಕಾರಣವಾಯಿತು.

ಈ ವಿಷಯದ ಬಗ್ಗೆ ಆಟಗಾರನಾಗಲಿ ಅಥವಾ ಫ್ರಾಂಚೈಸಿಯಾಗಲಿ ಯಾವುದೇ ಪ್ರತಿಕ್ರಿಯೆ ನೀಡದಿದ್ದರೂ, ಟೂರ್ನಿಯ ಉಳಿದ ಭಾಗಗಳಿಗೆ ವ್ಲಾಗ್‌ಗಳನ್ನು ಪೋಸ್ಟ್ ಮಾಡದಂತೆ ಬಿಸಿಸಿಐ ಅರ್ಶದೀಪ್‌ ಅವರಿಗೆ ನಿರ್ದೇಶನ ನೀಡಿದೆ ಎಂದು ಮೂಲಗಳು ತಿಳಿಸಿವೆ.

ಐಪಿಎಲ್ 2026ರಲ್ಲಿ 'ವೇಪಿಂಗ್' ವಿವಾದ ಉಂಟಾಗಿರುವುದು ಇದೇ ಮೊದಲಲ್ಲ; ಪಂಜಾಬ್ ಕಿಂಗ್ಸ್ ವಿರುದ್ಧದ ಪಂದ್ಯದ ವೇಳೆ ಡ್ರೆಸ್ಸಿಂಗ್ ಕೋಣೆಯೊಳಗೆ ವೇಪ್ ಬಳಸುತ್ತಿರುವುದು ಕ್ಯಾಮೆರಾದಲ್ಲಿ ಸೆರೆಯಾದ ನಂತರ ರಾಜಸ್ಥಾನ್ ರಾಯಲ್ಸ್ ನಾಯಕ ರಿಯಾನ್ ಪರಾಗ್ ಅವರಿಗೆ ಇತ್ತೀಚೆಗೆ ಪಂದ್ಯ ಶುಲ್ಕದ ಶೇ 25 ರಷ್ಟು ದಂಡ ವಿಧಿಸಲಾಗಿದೆ.

ಶುಕ್ರವಾರದಂದು, ಬಿಸಿಸಿಐ 10 ಐಪಿಎಲ್ ಫ್ರಾಂಚೈಸಿಗಳಿಗೆ ಏಳು ಪುಟಗಳ ಮಾರ್ಗಸೂಚಿಗಳನ್ನು ಬಿಡುಗಡೆ ಮಾಡಿತು. ಲೀಗ್ ಸಮಯದಲ್ಲಿ ಸಂಭಾವ್ಯ ಹನಿ-ಟ್ರ್ಯಾಪಿಂಗ್‌ನ ಅಪಾಯಗಳ ಬಗ್ಗೆ ಎಚ್ಚರಿಕೆ ನೀಡಿತು.

ಬಿಸಿಸಿಐ ಮತ್ತು ಐಪಿಎಲ್ ಕಾರ್ಯಾಚರಣೆ ತಂಡದ ಸದಸ್ಯರನ್ನು ಒಳಗೊಂಡ ಕಾರ್ಯಪಡೆಯನ್ನು ಸ್ಥಾಪಿಸಲಾಗಿದೆ. ಈ ತಂಡವು ಹೋಟೆಲ್ ಕೊಠಡಿಗಳ ತಪಾಸಣೆ ನಡೆಸುವ ಜವಾಬ್ದಾರಿಯನ್ನು ಹೊಂದಿರುತ್ತದೆ ಎಂದು ಹೇಳಿದೆ.

'ಈ ಮಾರ್ಗಸೂಚಿಯಲ್ಲಿ ಸೂಚಿಸಲಾದ ನಿರ್ದೇಶನಗಳ ಅನುಸರಣೆಯನ್ನು ನಿರ್ಣಯಿಸಲು ಬಿಸಿಸಿಐ/ಐಪಿಎಲ್ ಕಾರ್ಯಾಚರಣೆ ತಂಡವು ನಿಯಮಿತ ಪರಿಶೀಲನೆಗಳನ್ನು ನಡೆಸಬಹುದು. ತಂಡದ ವ್ಯವಸ್ಥಾಪಕರು ಎಲ್ಲ ಅನುಮೋದಿತ ಅತಿಥಿ ಭೇಟಿಗಳು ಮತ್ತು ಹೋಟೆಲ್ ಚಲನವಲನಗಳ ದಾಖಲೆಗಳನ್ನು ನಿರ್ವಹಿಸಬೇಕಾಗುತ್ತದೆ' ಎಂದು ಹೇಳಿಕೆಯಲ್ಲಿ ತಿಳಿಸಿದೆ.