ಸಿರಿಯಾ: ಡ್ರೋನ್ ದಾಳಿಯಲ್ಲಿ ಐಸಿಸ್ ಉಗ್ರ ಸಂಘಟನೆ ಮುಖ್ಯಸ್ಥ ಅಲ್ ಮುಹಾಜಿರ್ ಹತ; ಅಮೆರಿಕ ಹೇಳಿಕೆ

ಡಮಾಸ್ಕಸ್: ಸೇನಾಪಡೆಗಳು ನಡೆಸಿದ ಡ್ರೋನ್ ದಾಳಿಯಲ್ಲಿ ಇಸ್ಲಾಮಿಕ್ ಸ್ಟೇಟ್ ಉಗ್ರ ಸಂಘಟನೆಯ ಮುಖ್ಯಸ್ಥ ಅಲ್ ಮುಹಾಜಿರ್ ನನ್ನು ಹೊಡೆದುರುಳಿಸಲಾಗಿದೆ ಎಂದು ಅಮೆರಿಕ ಹೇಳಿದೆ.

ಪೂರ್ವ ಭಾಗದ ಸಿರಿಯಾದಲ್ಲಿ ಅಮೆರಿಕ ಸೇನೆ ನಡೆಸಿದ ಡ್ರೋನ್ ದಾಳಿಯಲ್ಲಿ ಐಸಿಸ್ ಉಗ್ರ ಅಲ್ ಮುಹಾಜಿರ್‍ ನನ್ನು ಹತ್ಯೆ ಮಾಡಲಾಗಿದ್ದು, ಕಳೆದ ಜುಲೈ 7 ರಂದು ಗುಪ್ತ ಕಾರ್ಯಾಚರಣೆಯಲ್ಲಿ ಡ್ರೋನ್ ದಾಳಿಯಲ್ಲಿ ಕುಖ್ಯಾತ ಉಗ್ರ ಹತನಾಗಿದ್ದಾನೆ. ಈ ದಾಳಿಯಲ್ಲಿ ಬೇರೆ ಯಾವುದೇ ನಾಗರಿಕರು ಗಾಯಗೊಂಡಿರುವ ಕುರಿತು ಮಾಹಿತಿ ಇಲ್ಲ ಎಂದು ಅಮೆರಿಕ ಸೆಂಟ್ರಲ್ ಕಮಾಂಡ್ ತಿಳಿಸಿದೆ.

ಜುಲೈ 9, 2023 ರಂದು ಅಮೆರಿಕ ಸೇನಾಪಡೆಯ MQ-9 ರೀಪರ್ ಡ್ರೋನ್ ನಡೆಸಿದ ದಾಳಿಯಲ್ಲಿ ಐಸಿಸ್ ಉಗ್ರ ಅಲ್ ಮುಹಾಜಿರ್‍ ನನ್ನು ಹತ್ಯೆ ಮಾಡಲಾಗಿದೆ. ಸುಮಾರು ಎರಡು ಗಂಟೆಗಳ ಕಾಲ ಈ ಕಾರ್ಯಾಚರಣೆ ನಡೆದಿದ್ದು, ಈ ದಾಳಿಗೂ ಮುನ್ನ ರಷ್ಯಾದ ಸೇನಾ ವಿಮಾನ ಕೂಡ ಕಾರ್ಯಾಚರಣೆ ನಡೆಸಿ ತನ್ನ ಡ್ರೋನ್ ಗೆ ಅಡ್ಡಿಪಡಿಸಿತ್ತು. ಕಳೆದ 24 ಗಂಟೆಗಳಲ್ಲಿ ರಷ್ಯಾದ ಪೈಲಟ್‌ಗಳು ನಡೆಸಿದ 2ನೇ ಅಪಾಯಕಾರಿ ನಡವಳಿಕೆ ಇದಾಗಿದೆ ಎಂದು ಅಮೆರಿಕ ಸೇನಾಧಿಕಾರಿಗಳು ತಿಳಿಸಿದ್ದಾರೆ.

ಇದನ್ನೂ ಓದಿ: ಚೀನಾ ಶಿಶುವಿಹಾರದಲ್ಲಿ ಚಾಕು ಇರಿತ: 3 ಮಕ್ಕಳು ಸೇರಿದಂತೆ ಆರು ಮಂದಿ ಸಾವು

ಅಮೆರಿಕ ಕಳೆದ ಒಂದು ವರ್ಷದಿಂದ ಸಿರಿಯಾದಲ್ಲಿ ಶಂಕಿತ ಐಸಿಸ್ ಉಗ್ರರ ವಿರುದ್ಧ ದಾಳಿ ನಡೆಸುತ್ತಿದೆ. ಈಗಾಗಲೇ ಹಲವು ಉಗ್ರ ನಾಯಕರನ್ನು ಕೂಡ ಬಂಧಿಸಿದೆ, ಅವರಲ್ಲಿ ಕೆಲವರು 2019ರಲ್ಲಿ ಸಿರಿಯಾದ ಪ್ರದೇಶವನ್ನು ತೊರೆದು ಟರ್ಕಿ ಬೆಂಬಲಿತ ಬಂಡುಕೋರರ ನಿಯಂತ್ರಣದಲ್ಲಿರುವ ಪ್ರದೇಶಗಳಲ್ಲಿ ಆಶ್ರಯ ಪಡೆದಿದ್ದಾರೆ ಎಂದು ಮೂಲಗಳು ತಿಳಿಸಿವೆ.