ಅಡಿಕೆ ಬೆಳೆ ಹೆಚ್ಚಳ, ಇಳುವರಿ ಮಾತ್ರ ಭಾರೀ ಕುಸಿತ; ಕರ್ನಾಟಕದಲ್ಲಿ ಬೆಳೆಗಾರರ ಕಥೆ-ವ್ಯಥೆ!

ಶಿವಮೊಗ್ಗ: ಕಳೆದ ಐದು ವರ್ಷಗಳಲ್ಲಿ ಕರ್ನಾಟಕದಲ್ಲಿ ಅಡಿಕೆ ಬೆಳೆ ವಿಸ್ತೀರ್ಣ ಗಮನಾರ್ಹವಾಗಿ ಹೆಚ್ಚಾಗಿದ್ದರೂ, ಅದರ ಉತ್ಪಾದಕತೆ ತೀವ್ರವಾಗಿ ಕುಸಿದಿದೆ ಎಂದು ಕೇಂದ್ರ ಸರ್ಕಾರ ಲೋಕಸಭೆಯಲ್ಲಿ ಮಂಡಿಸಿದ ಅಂಕಿ-ಅಂಶಗಳು ಬಹಿರಂಗಪಡಿಸಿವೆ.

ಶಿವಮೊಗ್ಗ ಸಂಸದ ಬಿ.ವೈ. ರಾಘವೇಂದ್ರ ಕೇಳಿದ ಪ್ರಶ್ನೆಗೆ ಕೃಷಿ ಮತ್ತು ರೈತರ ಕಲ್ಯಾಣ ಖಾತೆ ರಾಜ್ಯ ಸಚಿವ ರಾಮನಾಥ್ ಠಾಕೂರ್ ಲಿಖಿತ ಉತ್ತರ ನೀಡಿದ್ದು, 2021-22ರಲ್ಲಿ ರಾಜ್ಯದಲ್ಲಿ 6,03,121 ಹೆಕ್ಟೇರ್ ಪ್ರದೇಶದಲ್ಲಿ ಅಡಿಕೆ ಬೆಳೆದಿದ್ದರೆ, 2025-26ರ (ಎರಡನೇ ಮುಂಗಡ ಅಂದಾಜು) ವೇಳೆಗೆ ಅದು 7,98,677 ಹೆಕ್ಟೇರ್ಗೆ ಏರಿಕೆಯಾಗಿದೆ. ಅಂದರೆ ಸುಮಾರು 1.95 ಲಕ್ಷ ಹೆಕ್ಟೇರ್ (32%) ಹೆಚ್ಚಳವಾಗಿದೆ.

ಆದರೆ ಇದೇ ಅವಧಿಯಲ್ಲಿ ಸರಾಸರಿ ಉತ್ಪಾದಕತೆ ಪ್ರತಿ ಹೆಕ್ಟೇರ್‌ಗೆ 2.24 ಟನ್‌ನಿಂದ 1.42 ಟನ್‌ಗೆ ಕುಸಿದಿದ್ದು, ಇದು ಸುಮಾರು 37% ಇಳಿಕೆಯಾಗಿದೆ.

ವಿಸ್ತೀರ್ಣ ಹೆಚ್ಚಾದರೂ ಉತ್ಪಾದನೆ ಕುಸಿತ

ಉತ್ಪಾದಕತೆ ಕುಸಿದ ಪರಿಣಾಮ, ಬೆಳೆ ವಿಸ್ತೀರ್ಣ ಹೆಚ್ಚಿದರೂ ಉತ್ಪಾದನೆ ಅದಕ್ಕೆ ಅನುಗುಣವಾಗಿ ಏರಿಕೆಯಾಗಿಲ್ಲ. 2021-22ರಲ್ಲಿ ಕರ್ನಾಟಕದಲ್ಲಿ 13.5 ಲಕ್ಷ ಟನ್ ಅಡಿಕೆ ಉತ್ಪಾದನೆಯಾಗಿದ್ದರೆ, ಮುಂದಿನ ವರ್ಷ ಅದು 10.2 ಲಕ್ಷ ಟನ್ಗೆ ಇಳಿದಿತ್ತು. ನಂತರ ಸ್ವಲ್ಪ ಚೇತರಿಸಿಕೊಂಡು 2025-26ರಲ್ಲಿ 11.3 ಲಕ್ಷ ಟನ್ ತಲುಪಿದರೂ, ಐದು ವರ್ಷಗಳ ಹಿಂದಿನ ಮಟ್ಟಕ್ಕಿಂತ ಇನ್ನೂ 16 ಶೇಕಡಾ ಕಡಿಮೆ ಇದೆ.

ದೇಶದಲ್ಲೇ ಕರ್ನಾಟಕ ಅಗ್ರಸ್ಥಾನ

ಉತ್ಪಾದಕತೆ ಕುಸಿದಿದ್ದರೂ, ಭಾರತದ ಅಡಿಕೆ ಕ್ಷೇತ್ರದಲ್ಲಿ ಕರ್ನಾಟಕದ ಪ್ರಾಬಲ್ಯ ಮುಂದುವರಿದಿದೆ. ಕಳೆದ ಐದು ವರ್ಷಗಳಲ್ಲಿ ದೇಶದ ಒಟ್ಟು ಅಡಿಕೆ ಬೆಳೆ ವಿಸ್ತೀರ್ಣದ 71.56 ಶೇಕಡಾ ಹಾಗೂ ಒಟ್ಟು ಉತ್ಪಾದನೆಯ 75.47 ಶೇಕಡಾ ಕರ್ನಾಟಕದ ಪಾಲಾಗಿದೆ.

ಪ್ರಮುಖ ಜಿಲ್ಲೆಗಳಲ್ಲೂ ಇದೇ ಸ್ಥಿತಿ

ಶಿವಮೊಗ್ಗ:
ರಾಜ್ಯದ ಅತಿದೊಡ್ಡ ಅಡಿಕೆ ಉತ್ಪಾದನಾ ಜಿಲ್ಲೆಯಾದ ಶಿವಮೊಗ್ಗದಲ್ಲಿ ಬೆಳೆ ವಿಸ್ತೀರ್ಣ 1,11,758 ಹೆಕ್ಟೇರ್‌ನಿಂದ 1,34,692 ಹೆಕ್ಟೇರ್ಗೆ ಏರಿಕೆಯಾಗಿದೆ. ಆದರೆ ಉತ್ಪಾದಕತೆ ಪ್ರತಿ ಹೆಕ್ಟೇರ್‌ಗೆ 2.13 ಟನ್‌ನಿಂದ 1.11 ಟನ್‌ಗೆ ಇಳಿದಿದ್ದು, ಉತ್ಪಾದನೆ 2,37,710 ಟನ್‌ನಿಂದ 1,49,593 ಟನ್‌ಗೆ ಕುಸಿದಿದೆ.

ದಕ್ಷಿಣ ಕನ್ನಡ:
ಅಡಿಕೆ ಬೆಳೆಗೆ ಹೆಸರುವಾಸಿಯಾದ ಈ ಜಿಲ್ಲೆಯಲ್ಲಿ ಬೆಳೆ ವಿಸ್ತೀರ್ಣ 1,01,689 ಹೆಕ್ಟೇರ್‌ನಿಂದ 1,07,900 ಹೆಕ್ಟೇರ್ಗೆ ಹೆಚ್ಚಾದರೂ, ಉತ್ಪಾದಕತೆ 2.70 ಟನ್‌ನಿಂದ 1.31 ಟನ್‌ಗೆ ಅರ್ಧಕ್ಕಿಂತ ಹೆಚ್ಚು ಕುಸಿದಿದೆ. ಉತ್ಪಾದನೆ 2,74,560 ಟನ್‌ನಿಂದ 1,41,349 ಟನ್‌ಗೆ ಇಳಿದಿದೆ.

ಉಡುಪಿ:
ಉತ್ಪಾದಕತೆ 3.12 ಟನ್‌ನಿಂದ 1.50 ಟನ್‌ಗೆ ಕುಸಿದ ಪರಿಣಾಮ, ಉತ್ಪಾದನೆ 72,430 ಟನ್‌ನಿಂದ 39,859 ಟನ್‌ಗೆ ಇಳಿಕೆಯಾಗಿದೆ. ಬೆಳೆ ವಿಸ್ತೀರ್ಣ ಮಾತ್ರ ಸ್ವಲ್ಪ ಹೆಚ್ಚಾಗಿದೆ.

ಉತ್ತರ ಕನ್ನಡ:
ಬೆಳೆ ವಿಸ್ತೀರ್ಣ 32,698 ಹೆಕ್ಟೇರ್‌ನಿಂದ 39,354 ಹೆಕ್ಟೇರ್ಗೆ ಏರಿದರೂ, ಉತ್ಪಾದಕತೆ 2.90 ಟನ್‌ನಿಂದ 1.50 ಟನ್‌ಗೆ ಕುಸಿದಿದೆ. ಪರಿಣಾಮ ಉತ್ಪಾದನೆ 94,823 ಟನ್‌ನಿಂದ 59,031 ಟನ್‌ಗೆ ಇಳಿದಿದೆ.

ಕೆಲವು ಜಿಲ್ಲೆಗಳಲ್ಲಿ ಉತ್ತಮ ಸಾಧನೆ

ಎಲ್ಲ ಜಿಲ್ಲೆಗಳಲ್ಲೂ ಇದೇ ಪರಿಸ್ಥಿತಿ ಇರಲಿಲ್ಲ. ಚಿಕ್ಕಮಗಳೂರು ಜಿಲ್ಲೆಯಲ್ಲಿ ಉತ್ಪಾದಕತೆ ಸ್ಥಿರವಾಗಿದ್ದರೂ ಒಟ್ಟು ಉತ್ಪಾದನೆ ಹೆಚ್ಚಾಗಿದೆ. ಹಾವೇರಿ ಮತ್ತು ಹಾಸನ ಜಿಲ್ಲೆಗಳಲ್ಲೂ ಕಳೆದ ಐದು ವರ್ಷಗಳಲ್ಲಿ ಬೆಳೆ ವಿಸ್ತೀರ್ಣ ಹಾಗೂ ಉತ್ಪಾದನೆ ಎರಡೂ ಏರಿಕೆ ಕಂಡಿವೆ.

ಕಾರಣವೇನು?

ಉತ್ಪಾದಕತೆ ಕುಸಿತಕ್ಕೆ ನಿಖರ ಕಾರಣಗಳನ್ನು ಕಲಾಪದ ಉತ್ತರದಲ್ಲಿ ಉಲ್ಲೇಖಿಸಿಲ್ಲ. ಆದರೆ ಅಡಿಕೆ ಮತ್ತು ಮಸಾಲೆ ಅಭಿವೃದ್ಧಿ ನಿರ್ದೇಶನಾಲಯ (DASD) ವತಿಯಿಂದ ಎಲೆ ಚುಕ್ಕೆ ರೋಗ, ಹಣ್ಣು ಕೊಳೆ ರೋಗ, ಬೇರು ಹುಳು ನಿಯಂತ್ರಣ, ಹೈಬ್ರಿಡ್ ಕುಬ್ಜ ತಳಿಗಳ ಪ್ರೋತ್ಸಾಹ, ಬಹುಬೆಳೆ ಪದ್ಧತಿ ಹಾಗೂ ಹವಾಮಾನ ಆಧಾರಿತ ರೋಗ ಮುನ್ಸೂಚನೆ ಸೇರಿದಂತೆ ಹಲವು ಕಾರ್ಯಕ್ರಮಗಳನ್ನು ಜಾರಿಗೊಳಿಸಲಾಗುತ್ತಿದೆ ಎಂದು ತಿಳಿಸಲಾಗಿದೆ.

ಇದಲ್ಲದೆ, ಕರ್ನಾಟಕದ 10 ಪೀಡಿತ ತಾಲ್ಲೂಕುಗಳಲ್ಲಿ ಸಮುದಾಯ ಆಧಾರಿತ ಎಲೆ ಚುಕ್ಕೆ ರೋಗ ನಿರ್ವಹಣಾ ಕಾರ್ಯಕ್ರಮವನ್ನೂ ಕೇಂದ್ರ ಸರ್ಕಾರ ಆರಂಭಿಸಿದೆ.

ದೇಶದಲ್ಲೂ ಇದೇ ಪ್ರವೃತ್ತಿ

ದೇಶದ ಮಟ್ಟದಲ್ಲೂ ಇದೇ ರೀತಿಯ ಬೆಳವಣಿಗೆ ಕಂಡುಬಂದಿದೆ. 2021-22ರಲ್ಲಿ 8.49 ಲಕ್ಷ ಹೆಕ್ಟೇರ್ ಇದ್ದ ಅಡಿಕೆ ಬೆಳೆ ವಿಸ್ತೀರ್ಣವು 2025-26ರಲ್ಲಿ 11.06 ಲಕ್ಷ ಹೆಕ್ಟೇರ್ಗೆ ಏರಿಕೆಯಾಗಿದೆ. ಆದರೆ ಸರಾಸರಿ ಉತ್ಪಾದಕತೆ ಪ್ರತಿ ಹೆಕ್ಟೇರ್‌ಗೆ 1.96 ಟನ್‌ನಿಂದ 1.38 ಟನ್‌ಗೆ ಕುಸಿದಿದೆ.