'ವೈಭವ್ ಸೂರ್ಯವಂಶಿಯನ್ನು ಬೇಗನೆ ಔಟ್ ಮಾಡಿ': RR ವಿರುದ್ಧದ ಪಂದ್ಯಕ್ಕೂ ಮುನ್ನ MIಗೆ ಯುಜ್ವೇಂದ್ರ ಚಾಹಲ್ ಸಲಹೆ!

ಐಪಿಎಲ್ 2026ರ ಆವೃತ್ತಿಯಲ್ಲಿ ಸತತ ಏಳು ಪಂದ್ಯಗಳ ಸೋಲಿನೊಂದಿಗೆ ಕಂಗೆಟ್ಟಿದ್ದ ಪಂಜಾಬ್ ಕಿಂಗ್ಸ್ (PBKS) ತಂಡವು ಲಕ್ನೋ ಸೂಪರ್ ಜೈಂಟ್ಸ್ (LSG) ವಿರುದ್ಧ ಗೆಲುವು ಸಾಧಿಸುವ ಮೂಲಕ ಪ್ಲೇಆಫ್ ಆಸೆಯನ್ನು ಜೀವಂತವಾಗಿಟ್ಟುಕೊಂಡಿದೆ. ಪಿಬಿಕೆಎಸ್ ಸ್ಪಿನ್ನರ್ ಯುಜ್ವೇಂದ್ರ ಚಾಹಲ್, ಪಂದ್ಯದ ನಂತರ ನಿರಾಳ ಭಾವನೆ ಮೂಡಿತು. ಸತತ ಪಂದ್ಯಗಳನ್ನು ಸೋತಾಗ ಎದುರಾಗುವ ದೊಡ್ಡ ಸವಾಲೆಂದರೆ ತಂಡದೊಳಗಿನ ನಂಬಿಕೆಯನ್ನು ಕಾಪಾಡಿಕೊಳ್ಳುವುದು ಎಂದಿದ್ದಾರೆ. ಶನಿವಾರ ಏಕಾನಾ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಕೇವಲ 18 ಓವರ್‌ಗಳಲ್ಲಿ 197 ರನ್‌ ಗುರಿ ಬೆನ್ನಟ್ಟಿದ ಗೆಲುವಿನ ದಡ ಸೇರಿತು.

'ಮೊದಲ ಏಳು ಪಂದ್ಯಗಳಲ್ಲಿ ಆರು ಪಂದ್ಯಗಳನ್ನು ಗೆದ್ದು, ಮುಂದಿನ ಆರು ಪಂದ್ಯಗಳಲ್ಲಿ ಸತತ ಸೋಲು ಕಂಡಾಗ, ಹೇಳಲು ಏನೂ ಉಳಿದಿರುವುದಿಲ್ಲ. ತಂಡವನ್ನು ಹೇಗೆ ಒಟ್ಟಿಗೆ ಇಡುವುದು ಮತ್ತು ಪರಿಸರವನ್ನು ಹೇಗೆ ನಿಕಟವಾಗಿ ಇಡುವುದು ಎಂಬುದು ಮುಖ್ಯವಾಗುತ್ತದೆ. ಆದ್ದರಿಂದ, ಯಾವುದೇ ನಕಾರಾತ್ಮಕ ಆಲೋಚನೆಗಳು ಎಂದಿಗೂ ಇರಲಿಲ್ಲ. ಅಭ್ಯಾಸದ ಸಮಯದಲ್ಲಿಯೂ ಸಹ, ನಾವು ನಮ್ಮ ಮೇಲೆ ಮತ್ತು ಆ ಎರಡು ಅಂಕಗಳನ್ನು ಹೇಗೆ ಪಡೆಯಬಹುದು ಎಂಬುದರ ಮೇಲೆ ಗಮನವಿತ್ತು. ಏಕೆಂದರೆ, ನಾವು ಕೊನೆಯ ಪಂದ್ಯವನ್ನು ಗೆದ್ದು ಸುಮಾರು ಒಂದು ತಿಂಗಳು ಕಳೆದಿದೆ. ಆದ್ದರಿಂದ, ಈ ಗೆಲುವು ವಿಶೇಷವೆನಿಸುತ್ತದೆ' ಎಂದು ಪಂದ್ಯದ ನಂತರ ಜಿಯೋಹಾಟ್‌ಸ್ಟಾರ್‌ನಲ್ಲಿ ಚಾಹಲ್ ಹೇಳಿದರು.

ಆದಾಗ್ಯೂ, ಪಂಜಾಬ್‌ ಕಿಂಗ್ಸ್‌ನ ಪ್ಲೇಆಫ್ ಆಸೆ ಇನ್ನೂ ಇತರ ತಂಡಗಳ ಫಲಿತಾಂಶಗಳ ಮೇಲೆ ಅವಲಂಬಿತವಾಗಿವೆ. ಸ್ಪರ್ಧೆಯಲ್ಲಿ ಉಳಿಯಲು ಅವರಿಗೆ ಈಗ ಮುಂಬೈ ಇಂಡಿಯನ್ಸ್ (MI) ಭಾನುವಾರ ರಾಜಸ್ಥಾನ್ ರಾಯಲ್ಸ್ (RR) ಅನ್ನು ಸೋಲಿಸಬೇಕಾಗಿದೆ. ಆದರೆ, ಕೋಲ್ಕತ್ತಾ ನೈಟ್ ರೈಡರ್ಸ್ (KKR) ತಂಡ ಕೂಡ ಇದೀಗ ಡೆಲ್ಲಿ ಕ್ಯಾಪಿಟಲ್ಸ್ (DC) ವಿರುದ್ಧದ ಬೃಹತ್ ಗೆಲುವಿನೊಂದಿಗೆ ನೆಟ್ ರನ್-ರೇಟ್‌ ಅನ್ನು ಸುಧಾರಿಸಿಕೊಳ್ಳುವ ಮೂಲಕ ಅವರನ್ನು ಹಿಂದಿಕ್ಕಬಹುದು. ವಾಂಖೆಡೆ ಕ್ರೀಡಾಂಗಣದಲ್ಲಿ ಭಾನುವಾರ ಪಂದ್ಯ ನಡೆಯಲಿದೆ.

'ನಾವು ಲಕ್ನೋದಲ್ಲಿಯೇ ಉಳಿಯುತ್ತೇವೆ. ನಾಳೆ ಆರ್‌ಆರ್ ಸೋಲುತ್ತದೆ ಮತ್ತು ರೋಹಿತ್ ಶರ್ಮಾ 200 ರನ್ ಗಳಿಸುತ್ತಾರೆ ಎಂದು ಆಶಿಸುತ್ತೇವೆ' ಎಂದರು.

'ಆದರೆ ಗಂಭೀರವಾಗಿ ಹೇಳಬೇಕೆಂದರೆ, ನಮ್ಮ ಅವಕಾಶಗಳು ಆ ದಿನದ ಪಂದ್ಯದ ಮೇಲೆ ಹೆಚ್ಚು ಅವಲಂಬಿತವಾಗಿವೆ ಎಂದು ನಾನು ಭಾವಿಸುತ್ತೇನೆ. ಏಕೆಂದರೆ, ಕೆಕೆಆರ್ 11-12 ಓವರ್‌ಗಳಲ್ಲಿಯೇ ಮೊತ್ತವನ್ನು ಬೆನ್ನಟ್ಟಬೇಕಾಗಬಹುದು, ಅದು ಸ್ವಲ್ಪ ಕಷ್ಟಕರವಾಗಿರುತ್ತದೆ. ಇದು ವಾಂಖೆಡೆ, ಒಂದು ಸಣ್ಣ ಮೈದಾನ, ಆದ್ದರಿಂದ ವೈಭವ್ ಸೂರ್ಯವಂಶಿ ಅವರನ್ನು ಬೇಗ ಔಟ್ ಮಾಡಿದರೆ, ಮುಂಬೈ ಇಂಡಿಯನ್ಸ್ ಗೆಲ್ಲುವ ಸಾಧ್ಯತೆಗಳು ಹೆಚ್ಚಿರುತ್ತವೆ ಎಂದು ನಾನು ಭಾವಿಸುತ್ತೇನೆ' ಎಂದು ಸ್ಪಿನ್ನರ್ ಹೇಳಿದರು.

ಆಧುನಿಕ ಟಿ20 ಕ್ರಿಕೆಟ್‌ನಲ್ಲಿ ಬೌಲರ್‌ಗಳು ಎದುರಿಸುತ್ತಿರುವ ತೊಂದರೆಗಳ ಬಗ್ಗೆಯೂ ಮಾತನಾಡಿದ ಚಾಹಲ್, ಫ್ಲ್ಯಾಟ್ ಪಿಚ್‌ಗಳು, ಆಕ್ರಮಣಕಾರಿ ಬ್ಯಾಟಿಂಗ್ ವಿಧಾನಗಳು ಮತ್ತು ಇಂಪ್ಯಾಕ್ಟ್ ಪ್ಲೇಯರ್ ನಿಯಮವು ಬ್ಯಾಟರ್‌ಗಳ ಪರವಾಗಿ ಸಮತೋಲನ ಹೆಚ್ಚು ಬದಲಾಯಿಸಿದ ಅಂಶಗಳಾಗಿವೆ ಎಂದರು.

'ಐಪಿಎಲ್ ಪಿಚ್‌ಗಳು ಕಾಲಕ್ರಮೇಣ ಬದಲಾಗಿವೆ. ಈ ಹಿಂದೆ, ವಿಕೆಟ್‌ಗಳು ಬೌಲರ್‌ಗಳಿಗೆ ತಿರುವು (ಸ್ಪಿನ್ನರ್‌ಗಳಿಗೆ) ಮತ್ತು ಚಲನೆಯನ್ನು ನೀಡುವ ಮೂಲಕ ಸ್ವಲ್ಪ ಸಹಾಯ ಮಾಡುತ್ತಿದ್ದವು. ಆದರೆ ಕಳೆದ ಎರಡು ವರ್ಷಗಳಲ್ಲಿ, ಹೆಚ್ಚಿನ ಪಿಚ್‌ಗಳು ತುಂಬಾ ಫ್ಲ್ಯಾಟ್ ಆಗಿವೆ ಮತ್ತು ಬ್ಯಾಟಿಂಗ್ ಸ್ನೇಹಿಯಾಗಿವೆ. ಬೌಲರ್‌ಗಳಿಗೆ ಕಡಿಮೆ ಅನುಕೂಲ ನೀಡುತ್ತಿವೆ. ಹೈದರಾಬಾದ್‌ನಲ್ಲಿ ಮಾತ್ರ ಇದಕ್ಕೆ ಹೊರತಾಗಿತ್ತು ಅಲ್ಲಿ ಪಿಚ್ ನಿಧಾನವಾಗಿತ್ತು ಮತ್ತು ಬೌಂಡರಿಗಳು ಸಹ ದೊಡ್ಡದಾಗಿದ್ದರಿಂದ ಅವರಿಗೆ ಸ್ವಲ್ಪ ಸ್ಪಿನ್ ಪಡೆಯಲು ಸಹಾಯವಾಯಿತು' ಎಂದು ಅವರು ಹೇಳುತ್ತಾರೆ.

'ಮೊದಲು ತಂಡಗಳು ಪವರ್‌ಪ್ಲೇನಲ್ಲಿ 50 ರನ್ ಗಳಿಸಿದರೆ ಪರವಾಗಿರಲಿಲ್ಲ. ಆದರೆ, ಇತ್ತೀಚಿನ ದಿನಗಳಲ್ಲಿ 65-70 ರನ್‌ಗಳು ಸಾಮಾನ್ಯವಾಗಿದೆ. ನಾನು ಬೌಲಿಂಗ್ ಮಾಡಲು ಬಂದಾಗ, ನಾನು ಆಗಾಗ್ಗೆ 40 ಅಥವಾ 50 ರನ್‌ಗಳಲ್ಲಿರುವ ಸೆಟ್ ಬ್ಯಾಟರ್‌ಗೆ ಬೌಲಿಂಗ್ ಮಾಡುತ್ತೇನೆ ಮತ್ತು ಇಂಪ್ಯಾಕ್ಟ್ ಪ್ಲೇಯರ್ ನಿಯಮದಿಂದಾಗಿ ಎದುರಿಸಲು ಹೆಚ್ಚುವರಿ ಬ್ಯಾಟರ್ ಇರುತ್ತಾರೆ. ಆದ್ದರಿಂದ, ಬೌಲರ್ ಆಗಿ, ನೀವು ಅಪಾರ ಒತ್ತಡದಲ್ಲಿದ್ದೀರಿ. ಒಂದು ತಂಡ ಆರು ಅಥವಾ ಏಳು ವಿಕೆಟ್‌ಗಳು ಕಳೆದುಕೊಂಡಿದ್ದರೂ ಸಹ, ಇನ್ನೂ ಬ್ಯಾಟರ್‌ಗಳು ಬರಲಿದ್ದಾರೆ ಎಂದು ನಿಮಗೆ ತಿಳಿದಿದೆ. ಆದ್ದರಿಂದ, ಇದು ಸವಾಲಿನ ಸಂಗತಿ' ಎಂದು ತಿಳಿಸಿದರು.

ಪಂದ್ಯಾವಳಿಯು ಬ್ಯಾಟ್ಸ್‌ಮನ್‌ಗಳಿಗೆ ಹೆಚ್ಚು ಅನುಕೂಲಕರವಾಗುತ್ತಿರುವ ಹೊರತಾಗಿಯೂ, ಕೌಶಲ್ಯವು ಬೌಲರ್‌ಗಳು ಹೆಚ್ಚಿನ ಸ್ಕೋರಿಂಗ್ ಪರಿಸ್ಥಿತಿಗಳಲ್ಲಿ ಪರಿಣಾಮಕಾರಿಯಾಗಿರಲು ಅನುವು ಮಾಡಿಕೊಡುತ್ತದೆ ಎಂದು ಚಾಹಲ್ ನಂಬುತ್ತಾರೆ.

'ನಿಮ್ಮಲ್ಲಿ ಕೌಶಲ್ಯವಿದ್ದರೆ, ನೀವು ಚೆನ್ನಾಗಿ ಬೌಲಿಂಗ್ ಮಾಡಬಹುದು ಎಂದು ನಾನು ಇನ್ನೂ ಭಾವಿಸುತ್ತೇನೆ. ಈ ಹೆಚ್ಚಿನ ಸ್ಕೋರ್‌ಗಳಿಂದಾಗಿ, ಬೌಲರ್ ನಾಲ್ಕು ಓವರ್‌ಗಳಲ್ಲಿ 40 ರನ್‌ಗಳನ್ನು ನೀಡಿದರೂ, ಇತ್ತೀಚಿನ ದಿನಗಳಲ್ಲಿ ಅದು ಕೆಟ್ಟದ್ದೆಂದು ಪರಿಗಣಿಸಲಾಗುವುದಿಲ್ಲ' ಎಂದು ಅವರು ತೀರ್ಮಾನಿಸಿದರು.