ಗುಜರಾತ್ ಟೈಟಾನ್ಸ್‌ನತ್ತ ಮತ್ತೆ ಹಾರ್ದಿಕ್ ಪಾಂಡ್ಯ ಚಿತ್ತ; ಆ ಒಂದೇ ಒಂದು 'ಷರತ್ತು' ಒಪ್ಪಂದಕ್ಕೆ ಅಡ್ಡಿ: ವರದಿ

ಹಾರ್ದಿಕ್ ಪಾಂಡ್ಯ ಅವರ ಇಂಡಿಯನ್ ಪ್ರೀಮಿಯರ್ ಲೀಗ್ (IPL) ಭವಿಷ್ಯಕ್ಕೆ ಸಂಬಂಧಿಸಿದಂತೆ ಮತ್ತೊಂದು ಹೊಸ ತಿರುವು ಕಂಡುಬಂದಿದೆ. ಮುಂಬೈ ಇಂಡಿಯನ್ಸ್ ತಂಡವನ್ನು ತೊರೆಯಲು ಬಯಸಿರುವ ಈ ಆಲ್‌ರೌಂಡರ್, 2027ರ ಸೀಸನ್‌ಗೆ ಮುನ್ನ ನಡೆಯಲಿರುವ ಆಟಗಾರರ ವಿನಿಮಯ ಪ್ರಕ್ರಿಯೆಗಾಗಿ ಚೆನ್ನೈ ಸೂಪರ್ ಕಿಂಗ್ಸ್ (CSK) ಮತ್ತು ಕೋಲ್ಕತ್ತಾ ನೈಟ್ ರೈಡರ್ಸ್ (KKR) ತಂಡಗಳೊಂದಿಗೆ ಮಾತುಕತೆ ನಡೆಸಿದ್ದಾರೆ ಎಂದು ವರದಿಯಾಗಿದೆ.

ಆದಾಗ್ಯೂ, ಹಾರ್ದಿಕ್ ಅವರು ಗುಜರಾತ್ ಟೈಟಾನ್ಸ್ (GT) ತಂಡಕ್ಕೂ ತಮ್ಮನ್ನು ಪರಿಗಣಿಸುವಂತೆ ಪ್ರಸ್ತಾಪಿಸಿದ್ದರು ಎಂಬ ವಿಷಯವೂ ಈಗ ಬೆಳಕಿಗೆ ಬಂದಿದೆ. ಮುಂಬೈ ಇಂಡಿಯನ್ಸ್‌ಗೆ ಮರಳುವ ಮೊದಲು ಅವರು ಈ ತಂಡದೊಂದಿಗೆ ಕೆಲವು ವರ್ಷಗಳನ್ನು ಕಳೆದಿದ್ದರು. ಗುಜರಾತ್ ಟೈಟಾನ್ಸ್ ಅವರನ್ನು ತಂಡಕ್ಕೆ ಮರಳಿ ಸ್ವಾಗತಿಸಲು ಸಿದ್ಧವಿದ್ದರೂ, ತಂಡದ ನಾಯಕತ್ವವನ್ನು ತಮಗೆ ನೀಡಬೇಕೆಂಬ ಅವರ ಷರತ್ತು ಒಪ್ಪಂದಕ್ಕೆ ಅಡ್ಡಿಯಾಗಿ ಪರಿಣಮಿಸಿದೆ.

'ಇಂಡಿಯನ್ ಎಕ್ಸ್‌ಪ್ರೆಸ್' ವರದಿ ಪ್ರಕಾರ, ಗುಜರಾತ್ ಟೈಟಾನ್ಸ್ ತಂಡವು ಹಾರ್ದಿಕ್ ಅವರನ್ನು ಮತ್ತೆ ಫ್ರಾಂಚೈಸಿಗೆ ಕರೆತರುವ ಸಾಧ್ಯತೆಯ ಬಗ್ಗೆ ನಾಯಕ ಶುಭಮನ್ ಗಿಲ್ ಅವರೊಂದಿಗೆ ಚರ್ಚಿಸಿತ್ತು ಮತ್ತು ಅದಕ್ಕೆ ಅವರು ಸಮ್ಮತಿಯನ್ನೂ ಸೂಚಿಸಿದ್ದರು. ಆದರೆ, ಹಾರ್ದಿಕ್ ತಮ್ಮ ವಾಪಸಾತಿಗಾಗಿ 'ತನ್ನನ್ನೇ ನಾಯಕನನ್ನಾಗಿ ನೇಮಿಸಬೇಕು' ಎಂಬ ಷರತ್ತನ್ನು ಮುಂದಿಟ್ಟ ತಕ್ಷಣವೇ, ನಿರ್ಧಾರ ತೆಗೆದುಕೊಳ್ಳುವ ಪ್ರಕ್ರಿಯೆಯಲ್ಲಿ ಭಾಗಿಯಾಗಿದ್ದ ಪ್ರತಿಯೊಬ್ಬರೂ ಅದಕ್ಕೆ 'ಇಲ್ಲ' ಎಂದಿದ್ದಾರೆ ಎನ್ನಲಾಗಿದೆ.

'ಅವರು ತಂಡಕ್ಕೆ ಮರಳುವುದಕ್ಕೆ ಫ್ರಾಂಚೈಸಿ ಸಿದ್ಧವಿತ್ತು. ಈ ಬಗ್ಗೆ ಅವರು ತಂಡದ ನಾಯಕ ಶುಭಮನ್ ಗಿಲ್ ಅವರೊಂದಿಗೂ ಚರ್ಚಿಸಿದ್ದರು ಮತ್ತು ಅವರನ್ನು ಮರಳಿ ಕರೆತರುವ (ಟ್ರೇಡ್ ಮಾಡುವ) ವಿಷಯಕ್ಕೆ ಗಿಲ್ ಕೂಡ ಒಪ್ಪಿಗೆ ಸೂಚಿಸಿದ್ದರು. ಆದರೆ, ನಾಯಕತ್ವದ ಷರತ್ತನ್ನು ಮುಂದಿಟ್ಟಾಗ ಎಲ್ಲರೂ ಅದಕ್ಕೆ ನಿರಾಕರಿಸಿದರು' ಎಂದು ಮೂಲವೊಂದು ತಿಳಿಸಿದ್ದಾಗಿ ಪತ್ರಿಕೆ ವರದಿ ಮಾಡಿದೆ.

ಈ ವಿಷಯದ ಕುರಿತು ಪ್ರತಿಕ್ರಿಯೆ ಪಡೆಯಲು ಹಾರ್ದಿಕ್ ಅವರ ವಕ್ತಾರರನ್ನು ಸಂಪರ್ಕಿಸಿದಾಗ, ಆಟಗಾರ ಸ್ವತಃ ಯಾವುದೇ ಫ್ರಾಂಚೈಸಿ ಜೊತೆ ನೇರವಾಗಿ ಮಾತುಕತೆ ನಡೆಸಿಲ್ಲ ಎಂಬುದು ಸ್ಪಷ್ಟವಾಯಿತು.

'ವರ್ಗಾವಣೆ, ವಿನಿಮಯ ಅಥವಾ ಇನ್ನಾವುದೇ ವಿಷಯಕ್ಕೆ ಸಂಬಂಧಿಸಿದಂತೆ ಹಾರ್ದಿಕ್ ಪಾಂಡ್ಯ ಅವರು ಯಾವುದೇ ಫ್ರಾಂಚೈಸಿ ಜೊತೆ ನೇರ ಮಾತುಕತೆ ನಡೆಸಿಲ್ಲ. ಒಂದು ವೇಳೆ ಅವರನ್ನು ಯಾರಾದರೂ ಸಂಪರ್ಕಿಸಿದ್ದರೆ, ಆ ವಿಷಯವನ್ನು ಎಂಐ (MI) ಫ್ರಾಂಚೈಸಿಯ ಗಮನಕ್ಕೆ ತರಲಾಗಿತ್ತು' ಎಂದು ಪಾಂಡ್ಯ ಅವರ ವಕ್ತಾರರು ತಿಳಿಸಿದ್ದಾರೆ.

ಹಾರ್ದಿಕ್ ಅವರು 2022ರಲ್ಲಿ ಗುಜರಾತ್ ಟೈಟಾನ್ಸ್ ತಂಡವನ್ನು ಐಪಿಎಲ್ ಪ್ರಶಸ್ತಿಯತ್ತ ಮುನ್ನಡೆಸಿದ್ದರು ಎಂಬುದು ಗಮನಾರ್ಹ. ನಂತರದ ಸೀಸನ್‌ನಲ್ಲೂ ಅವರು ತಂಡವನ್ನು ಫೈನಲ್ ಹಂತದವರೆಗೆ ಮುನ್ನಡೆಸಿದ್ದರು. ಆ ಬಳಿಕದ ಸೀಸನ್‌ನಲ್ಲಿ ಅವರು ಮುಂಬೈ ಇಂಡಿಯನ್ಸ್ ತಂಡಕ್ಕೆ ಮರಳಿದರು.

ಮುಂಬೈ ಇಂಡಿಯನ್ಸ್‌ಗೆ (MI) ಬಂದ ತಕ್ಷಣವೇ ರೋಹಿತ್ ಶರ್ಮಾ ಅವರ ಬದಲಿಗೆ ತಾವೇ ನಾಯಕನಾಗಿ ಅಧಿಕಾರ ವಹಿಸಿಕೊಂಡಿದ್ದರಿಂದ, ಗುಜರಾತ್ ಟೈಟಾನ್ಸ್‌ನಲ್ಲಿ (GT) ಸಿಕ್ಕಿದ್ದಂತಹ ಜನಪ್ರಿಯತೆ ಮತ್ತು ಸ್ವೀಕಾರಾರ್ಹತೆಯನ್ನು ಪಡೆಯಲು ಹಾರ್ದಿಕ್ ಪರದಾಡಬೇಕಾಯಿತು. ಅಲ್ಲದೆ, ಹಿಂದಿನ ನಾಯಕ ರೋಹಿತ್ ಶರ್ಮಾ ಅವರಿಗೆ ತಂಡದ ಡ್ರೆಸ್ಸಿಂಗ್ ರೂಮ್‌ನಲ್ಲಿ ಇದ್ದಂತಹ ಗೌರವ ಮತ್ತು ಸ್ಥಾನಮಾನ ಹಾರ್ದಿಕ್‌ಗೆ ಇಲ್ಲ ಎಂಬ ಮಾತುಗಳೂ ಕೇಳಿಬರುತ್ತಿವೆ.

ಮತ್ತೊಂದೆಡೆ, ಐಪಿಎಲ್ 2026ರ ಸೀಸನ್ ಮುಕ್ತಾಯದ ನಂತರ ತರಬೇತಿ ಸಿಬ್ಬಂದಿಯು ಹಲವು ಹಿರಿಯ ಆಟಗಾರರನ್ನು 'ತರಬೇತಿ ನೀಡಲು ಸಾಧ್ಯವಾಗದವರು' (uncoachable) ಎಂದು ಬಣ್ಣಿಸಿದ ಹಿನ್ನೆಲೆಯಲ್ಲಿ, ಮುಂಬೈ ಇಂಡಿಯನ್ಸ್ ತನ್ನ ತಂಡವನ್ನು ಪುನರ್ನಿರ್ಮಿಸುವತ್ತ ಗಮನಹರಿಸಿದೆ. ಈ ವರ್ಷದ ಆಟಗಾರರ ಹರಾಜಿಗೂ ಮುನ್ನ, ನಾಯಕ ಹಾರ್ದಿಕ್ ಸೇರಿದಂತೆ ಹಲವು ಹಿರಿಯ ಆಟಗಾರರನ್ನು ತಂಡದಿಂದ ಕೈಬಿಡುವ ಸಾಧ್ಯತೆಯಿದೆ.