IPL 2026: 'ಚಿನ್ನಸ್ವಾಮಿ ಶತಕ' ಐಪಿಎಲ್ ಇತಿಹಾಸದಲ್ಲೇ ಈ ಐತಿಹಾಸಿಕ ದಾಖಲೆ ಬರೆದ ಏಕೈಕ ತಂಡ RCB

ಬೆಂಗಳೂರು: ಐಪಿಎಲ್ ಟೂರ್ನಿ ಇತಿಹಾಸದಲ್ಲೇ ಇಂದು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಐತಿಹಾಸಿಕ ಅಪರೂಪದ ಸಾಧನೆಗೆ ಪಾತ್ರವಾಗಿದ್ದು, ಈ ಸಾಧನೆ ಮಾಡಿದ ಐಪಿಎಲ್ ನ ಮೊದಲ ತಂಡ ಎಂಬ ಕೀರ್ತಿಗೆ ಭಾಜನವಾಗಿದೆ.

ಹೌದು... ಐಪಿಎಲ್ 2026ರ ಟೂರ್ನಿಯ 26ನೇ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಸೆಣಸಾಡಿದ್ದ ಆರ್ ಸಿಬಿ 6 ವಿಕೆಟ್ ಅಂತರದಲ್ಲಿ ಸೋಲು ಕಂಡಿತಾದರೂ ಈ ಪಂದ್ಯ ಮಾತ್ರ ಆರ್ ಸಿಬಿಗೆ ಐತಿಹಾಸಿಕ ಸ್ಮರಣೀಯ ಪಂದ್ಯವಾಗಿತ್ತು.

ಇದು ಆರ್ ಸಿಬಿಗೆ ಬೆಂಗಳೂರಿನಲ್ಲಿ ನಡೆದ 100 ಪಂದ್ಯವಾಗಿದ್ದು, ಆ ಮೂಲಕ ಒಂದು ಮೈದಾನದಲ್ಲಿ ಅತೀ ಹೆಚ್ಚು ಪಂದ್ಯಗಳನ್ನಾಡಿದ ಮತ್ತು ಒಂದು ಮೈದಾನದಲ್ಲಿ 100 ಪಂದ್ಯಗಳನ್ನಾಡಿದ ಐಪಿಎಲ್ ನ ಮೊದಲ ತಂಡ ಎಂಬ ಕೀರ್ತಿಗೆ ಆರ್ ಸಿಬಿ ಪಾತ್ರವಾಗಿದೆ.

ಬೆಂಗಳೂರಿನ ಎಂ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಆರ್ ಸಿಬಿ 100 ಪಂದ್ಯಗಳನ್ನಾಡುವ ಮೂಲಕ ಈ ಸಾಧನೆಗೆ ಪಾತ್ರವಾಗಿದೆ.

ಅಂತೆಯೇ ಕೋಲ್ಕತಾ ನೈಟ್ ರೈಡರ್ಸ್ ತಂಡ ಈ ಪಟ್ಟಿಯಲ್ಲಿ 2ನೇ ಸ್ಥಾನದಲ್ಲಿದ್ದು ಈಡೆನ್ ಗಾರ್ಡನ್ ಮೈದಾನದಲ್ಲಿ ಕೆಕೆಆರ್ ಈವರೆಗೂ 98 ಪಂದ್ಯಗಳನ್ನಾಡಿದೆ.

ಸ್ಮರಣೀಯ ಪಂದ್ಯದಲ್ಲೇ ಸೋಲು

ಇನ್ನು ಆರ್ ಸಿಬಿ ಈ ಸ್ಮರಣೀಯ ಪಂದ್ಯದಲ್ಲೇ ಹೀನಾಯ ಸೋಲು ಕಂಡಿದ್ದು ಮೊದಲು ಬ್ಯಾಟಿಂಗ್ ಮಾಡಿದ್ದ ಆರ್ ಸಿಬಿ ನಿಗಧಿತ 20 ಓವರ್ ಗಳಲ್ಲಿ 175 ರನ್ ಕಲೆಹಾಕಿತ್ತು. ಇದಕ್ಕೆ ಉತ್ತರವಾಗಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡ 19.5 ಓವರ್ ನಲ್ಲಿ 4 ವಿಕೆಟ್ ನಷ್ಟಕ್ಕೆ 178 ರನ್ ಗಳಿಸುವ ಮೂಲಕ 6 ವಿಕೆಟ್ ಅಂತರದ ಭರ್ಜರಿ ಜಯ ದಾಖಲಿಸಿತು.