"ಈ ಸಂಭ್ರಮ ನೋಡಲು ವಿಷ್ಣು ಸರ್ ಇರಬೇಕಿತ್ತು": ಅಮೃತ ಮಹೋತ್ಸವದಲ್ಲಿ ನಟ ರಮೇಶ್ ಅರವಿಂದ್ ಭಾವುಕ

ಕನ್ನಡ ಚಿತ್ರರಂಗದ ಇತಿಹಾಸದಲ್ಲಿ ಎಂದೂ ಮರೆಯಲಾಗದ ಸಾಹಸ ಸಿಂಹ, ಡಾ. ವಿಷ್ಣುವರ್ಧನ್ ಅವರ 75ನೇ ಜನ್ಮ ವರ್ಷಾಚರಣೆಯ 'ಅಮೃತ ಮಹೋತ್ಸವ' ಸಮಾರಂಭವು ಬೆಂಗಳೂರಿನ ಹೊಸಕೆರೆಹಳ್ಳಿಯ ನಂದಿ ಲಿಂಕ್ ಮೈದಾನದಲ್ಲಿ ಅತ್ಯಂತ ಅದ್ಧೂರಿಯಾಗಿ ನೆರವೇರಿತು.

ಈ ಮಹಾ ಸಂಭ್ರಮದಲ್ಲಿ ಭಾಗವಹಿಸಿ ಮಾತನಾಡಿದ ಹಿರಿಯ ನಟ ರಮೇಶ್ ಅರವಿಂದ್ ಅವರು ವಿಷ್ಣು ಸರ್ ಅವರ ನೆನಪುಗಳನ್ನು ಹಂಚಿಕೊಳ್ಳುತ್ತಾ ಅತ್ಯಂತ ಭಾವುಕರಾದರು.

ಕನ್ನಡ ಚಿತ್ರರಂಗ ಹಾಗೂ ರಾಜ್ಯದ ವಿವಿಧ ಭಾಗಗಳಿಂದ ಆಗಮಿಸಿದ್ದ ಅಭಿಮಾನಿಗಳನ್ನು ಒಂದೆಡೆ ಸೇರಿಸಿದ್ದ ಈ ಸಂಭ್ರಮದಲ್ಲಿ, ವಿಷ್ಣುವರ್ಧನ್‌ ಅವರೊಂದಿಗೆ ಆತ್ಮೀಯ ಒಡನಾಟ ಹೊಂದಿದ್ದ ನಟ ರಮೇಶ್‌ ಅರವಿಂದ್‌ ಅವರು ಅವರೊಂದಿಗಿನ ನೆನಪುಗಳನ್ನು ಮೆಲುಕು ಹಾಕಿದರು.

ಇಂದು ನಡೆಯುತ್ತಿರುವ ಈ ಸಂಭ್ರಮವನ್ನು ನೋಡಲು ವಿಷ್ಣುವರ್ಧನ್ ಸರ್ ಅವರು ಇಲ್ಲೇ ಇರಬೇಕಿತ್ತು. ಕರ್ನಾಟಕ ರತ್ನ ಪ್ರಶಸ್ತಿ ಸ್ವೀಕರಿಸುವ ಸಂದರ್ಭದಲ್ಲಿ ಅವರು ಸ್ವತಃ ಇಲ್ಲಿದ್ದು ಇದನ್ನು ನೋಡಬೇಕಿತ್ತು ಎಂಬ ಭಾವನೆ ನಮ್ಮೆಲ್ಲರಲ್ಲೂ ಇದೆ ಎಂದು ಹೇಳಿದರು.

ಇದೇ ವೇಳೆ ವಿಷ್ಣುವರ್ಧನ್‌ ಅವರ ವ್ಯಕ್ತಿತ್ವವನ್ನು ಸ್ಮರಿಸಿದ ಅವರು, ಚಿತ್ರವೊಂದರ ಚಿತ್ರೀಕರಣದ ವೇಳೆ ನಡೆದ ಘಟನೆಯನ್ನು ಹಂಚಿಕೊಂಡರು. ಕಾಲು ಮುರಿದಿದ್ದರೂ, ವಿಷ್ಣುವರ್ಧನ್‌ ಅವರು ನೀಡಿದ್ದ ದಿನಾಂಕಗಳು ವ್ಯರ್ಥವಾಗಬಾರದು ಎಂಬ ಕಾರಣಕ್ಕೆ ಚಿತ್ರೀಕರಣಕ್ಕೆ ಆಗಮಿಸಿದ್ದ ಘಟನೆ ಸ್ಮರಿಸಿದರು.

“ನಾನು ಕುಂಟುತ್ತಾ ಬರುತ್ತಿರುವುದನ್ನು ನೋಡಿ ವಿಷ್ಣುವರ್ಧನ್‌ ಸರ್‌ ಏಕೆ ಹೀಗೆ ನಡೆಯುತ್ತಿದ್ದೀಯ ಎಂದು ಕೇಳಿದರು. ಕಾಲು ಮುರಿದಿದೆ, ಆದರೆ, ಅವರು ತಮ್ಮ ದಿನಾಂಕಗಳನ್ನು ನೀಡಿದ್ದಾರೆ ಎಂಬ ಕಾರಣಕ್ಕೆ ಚಿತ್ರೀಕರಣಕ್ಕೆ ಬಂದಿದ್ದೇನೆ ಎಂದು ಹೇಳಿದೆ. ತಕ್ಷಣ ನಿರ್ಮಾಪಕ ಮತ್ತು ನಿರ್ದೇಶಕರನ್ನು ಕರೆದು ಅವರು ತರಾಟೆಗೆ ತೆಗೆದುಕೊಂಡರು. ‘ನಾನು ಮತ್ತೆ ದಿನಾಂಕಗಳನ್ನು ಕೊಡುತ್ತೇನೆ. ಮೊದಲು ಈ ಹುಡುಗನನ್ನು ಮನೆಗೆ ಕಳುಹಿಸಿ’ ಎಂದು ಹೇಳಿದರು” ಎಂದು ರಮೇಶ್‌ ನೆನಪಿಸಿಕೊಂಡರು.

ತಮ್ಮ ಸಹೋದ್ಯೋಗಿಯ ಆರೋಗ್ಯವನ್ನು ತಮ್ಮ ಚಿತ್ರೀಕರಣದ ದಿನಾಂಕಗಳಿಗಿಂತ ಹೆಚ್ಚು ಮುಖ್ಯವೆಂದು ಪರಿಗಣಿಸಿದ ವಿಷ್ಣುವರ್ಧನ್‌ ಅವರ ಈ ಮಾನವೀಯ ಕಾಳಜಿ ಅವರ ವ್ಯಕ್ತಿತ್ವವನ್ನು ತೋರಿಸುತ್ತದೆ ಎಂದು ಹೇಳಿದರು.

ಚಿತ್ರರಂಗದ ಆಚೆಯೂ ವಿಷ್ಣುವರ್ಧನ್‌ ಅವರ ಮನೆ ಸ್ನೇಹಿತರಿಗೆ ಸದಾ ತೆರೆದಿದ್ದ ಸ್ಥಳವಾಗಿತ್ತು. ಊಟ, ಸ್ನೇಹಿತರ ಮಾತುಕತೆ ಹಾಗೂ ಕನ್ನಡದ ಮೇಲಿನ ಅಭಿಮಾನವೇ ಅಲ್ಲಿನ ಭೇಟಿಗಳ ಪ್ರಮುಖ ಭಾಗವಾಗಿತ್ತು. “ಅವರು ಆಗಾಗ ಆತ್ಮೀಯ ಸ್ನೇಹಿತರನ್ನು ಊಟಕ್ಕೆ ಕರೆಯುತ್ತಿದ್ದರು. ಒಮ್ಮೆ ನಾವು ಎಲ್ಲಿಗೇ ಹೋದರೂ ಕನ್ನಡದಲ್ಲೇ ಮಾತನಾಡಬೇಕು ಎಂದು ನಮಗೆ ನೆನಪಿಸಿದ್ದರು. ಇತ್ತೀಚೆಗೆ ಬಸವನಗುಡಿ ಮೇಲ್ಸೇತುವೆಯಲ್ಲಿ ಕಾರಿನಲ್ಲಿ ಹೋಗುತ್ತಿದ್ದಾಗ ಆ ನೆನಪು ಮತ್ತೆ ಕಣ್ಣಮುಂದೆ ಬಂತು” ಎಂದರು.

ವಿಷ್ಣುವರ್ಧನ್‌ ಅವರ ವಿಶಿಷ್ಟ ಧ್ವನಿ, ಸ್ಪಷ್ಟ ಉಚ್ಚಾರಣೆ, ಶಿಸ್ತು ಹಾಗೂ ದೈನಂದಿನ ಬದುಕಿನಲ್ಲೂ ತೋರುತ್ತಿದ್ದ ಸೌಜನ್ಯವೇ ಅವರನ್ನು ಜನರ ಮನಸ್ಸಿನಲ್ಲಿ ಅಚ್ಚಳಿಯದೆ ಉಳಿಯುವಂತೆ ಮಾಡಿದೆ ಎಂದು ಹೇಳಿದರು.

ಇದೇ ವೇಳೆ ಕಾರ್ಯಕ್ರಮದಲ್ಲಿ ಸೇರಿದ್ದ ಅಪಾರ ಜನಸ್ತೋಮವನ್ನು ಕಂಡು ಮಾತನಾಡಿದ ಅವರು, “ರಾಜ್ಯದ ಮೂಲೆಮೂಲೆಗಳಿಂದ ಜನರು ಬಂದಿದ್ದಾರೆ. ಇವರಲ್ಲಿ ಬಹುತೇಕರು ಒಬ್ಬರಿಗೊಬ್ಬರು ಪರಿಚಯವಿಲ್ಲ. ಆದರೆ, ಇವರನ್ನೆಲ್ಲ ಒಂದುಗೂಡಿಸಿರುವ ಶಕ್ತಿ ವಿಷ್ಣುವರ್ಧನ್‌ ಎಂದು ಹೇಳಿದರು.

ತಮ್ಮ ಮಾತಿನ ಕೊನೆಯಲ್ಲಿ ರಮೇಶ್‌ ಅರವಿಂದ್‌, ದಿಗ್ಗಜ ನಟನ ನೆನಪು ಹಾಗೂ ಅವರು ಸಾರಿದ ಮೌಲ್ಯಗಳನ್ನು ಗೌರವಿಸುವ ನಿಟ್ಟಿನಲ್ಲಿ ಕಾರ್ಯಕ್ರಮ ಆಯೋಜಿಸಿದ ವೀರಕಪುತ್ರ ಶ್ರೀನಿವಾಸ್‌, ಜಯಮಾಲಾ, ರಾಜೇಂದ್ರ ಸಿಂಗ್‌ ಬಾಬು ಹಾಗೂ ರಾಕ್‌ಲೈನ್‌ ವೆಂಕಟೇಶ್‌ ಅವರಿಗೆ ಧನ್ಯವಾದ ಅರ್ಪಿಸಿದರು.