ಹೆಚ್1 ಬಿ ವೀಸಾ ಪ್ರಸ್ತಾವನೆ ಕೈಬಿಟ್ಟ ಟ್ರಂಪ್ ಸರ್ಕಾರ: ಅನಿವಾಸಿ ಭಾರತೀಯರಿಗೆ ಭಾರೀ ರಿಲೀಫ್!

ವಾಷಿಂಗ್ಟನ್: ಮಹತ್ವದ ಬೆಳವಣಿಗೆಯಲ್ಲಿ ಅಮೆರಿಕದಿಂದ ಪರೋಕ್ಷ ಗಡಿಪಾರು ಆತಂಕ ಎದುರಿಸುತ್ತಿದ್ದ ಅನಿವಾಸಿ ಭಾರತೀಯರಿಗೆ ಟ್ರಂಪ್ ಸರ್ಕಾರ ಬಹುದೊಡ್ಡ ರಿಲೀಫ್ ನೀಡಿದ್ದು, ಹೆಚ್1 ಬಿ ವೀಸಾದಾರರ ಗಡಿಪಾರು ಪ್ರಸ್ತಾಪ  ಇಲ್ಲ ಎಂದು ಹೇಳಿದೆ.

ಈ ಹಿಂದೆ ಹೆಚ್ 1 ಬಿ ವೀಸಾ ಅವಧಿ ವಿಸ್ತರಣೆ ಮಾಡುವುದಿಲ್ಲ ಎಂದು ಹೇಳಿ ಅಮೆರಿಕದಲ್ಲಿರುವ ಕೋಟ್ಯಂತರ ವಿದೇಶಿ ಉದ್ಯೋಗಸ್ಥರಿಗೆ ಶಾಕ್ ನೀಡಿದ್ದ ಟ್ರಂಪ್ ಸರ್ಕಾರ ಇದೀಗ ತನ್ನ ನಿಯಮವನ್ನು ಸಡಿಲಗೊಳಿಸಿದ್ದು, ಹೆಚ್1 ಬಿ  ವೀಸಾದಾರರ ಗಡಿಪಾರು ಪ್ರಸ್ತಾಪ  ಇಲ್ಲ ಎಂದು ಹೇಳಿದೆ. ಈ ಬಗ್ಗೆ ಅಧಿಕೃತ ಹೇಳಿಕೆ ಬಿಡುಗಡೆ ಮಾಡಿರುವ ಟ್ರಂಪ್ ಸರ್ಕಾರ ವೀಸಾ ಅವಧಿ ವಿಸ್ತರಣೆಗೆ ವೀಸಾದರರು ಮನವಿ ಮಾಡಿಕೊಳ್ಳಬಹುದು ಎಂದು ಹೇಳಿದೆ.

ಯುನೈಟೆಡ್ ಸ್ಟೇಟ್ಸ್ ನಾಗರಿಕತ್ವ ಮತ್ತು ವಲಸೆ ನಿಯಮ ಸೆಕ್ಷನ್ 104(c), AC-21 ರ ಅಡಿಯಲ್ಲಿ ಹೆಚ್ 1ಬಿ ವೀಸಾ ಅವಧಿ ಮುಕ್ತಾಯವಾದ ವಿದೇಶಿಗರನ್ನು ಗಡಿಪಾರು ಮಾಡುವ ಪ್ರಸ್ತಾವನೆ ಸರ್ಕಾರದ ಮುಂದಿಲ್ಲ. ಅಂತೆಯೇ  ಪ್ರಸ್ತುತ 6 ವರ್ಷಗಳ ಅವಧಿ ಹೊಂದಿರುವ ಹೆಚ್ 1ಬಿ ವೀಸಾ ಅವಧಿಯನ್ನು ಅಗತ್ಯವಿದ್ದರೆ ಅವಧಿ ವಿಸ್ತರಣೆಗೆ ಅವಕಾಶ ಕೋರಬಹುದು. ಸೆಕ್ಷನ್ 106(a)-(b), AC21 ರ ಅಡಿಯಲ್ಲಿ ಒಂದು ವರ್ಷದ ಭತ್ಯೆ ಏರಿಕೆಯಡಿಯಲ್ಲಿ  ಒಂದು ವರ್ಷಗಳ ವೀಸಾ ಅವಧಿ ವಿಸ್ತಾರಕ್ಕೆ ಮನವಿ ಮಾಡಿಕೊಳ್ಳಬಹುದು ಎಂದು ಯುನೈಟೆಡ್ ಸ್ಟೇಟ್ಸ್ ನಾಗರಿಕತ್ವ ಮತ್ತು ವಲಸೆ ಸೇವೆಗಳ ಸಚಿವಾಲಯ ಮಾಧ್ಯಮ ವಕ್ತಾರ ಜೋನಾಥನ್ ವಿತಿಂಗ್ಟನ್ ಹೇಳಿದ್ದಾರೆ ಎಂದು  ಹಿಂದೂಸ್ತಾನ್ ಟೈಮ್ಸ್ ವರದಿ ಮಾಡಿದೆ.