ಇಸಿಸ್ ಉಗ್ರ ಸಂಘಟನೆ ವಕ್ತಾರ ಅದ್ನಾನಿ ಹತ್ಯೆ

ಬೈರುತ್: ವಿಶ್ವದ ಶ್ರೀಮಂತ ಉಗ್ರ ಸಂಘಟನೆ ಇಸ್ಲಾಮಿಕ್ ಸ್ಟೇಟ್ ಇನ್ ಇರಾಕ್ ಅಂಡ್ ಸಿರಿಯಾದ ವಕ್ತಾರ ಉಗ್ರ ಅಬು ಮಹಮದ್ ಅಲ್-ಅದ್ನಾನಿಯನ್ನು ಅಮೆರಿಕ ಸೇನಾಪಡೆಗಳು  ಅಲೆಪ್ಪೊದಲ್ಲಿ ಹೊಡೆದುರುಳಿಸಿವೆ.

ಗಲಭೆ ಪೀಡಿತ ಸಿರಿಯಾದಲ್ಲಿ ಇಸಿಸ್ ಉಗ್ರರ ಆಟಾಟೋಪ ಮುಂದುವರೆದಿರುವಂತೆಯೇ ಅಲ್ ಅರಬ್ ಪ್ರಾಂತ್ಯದಲ್ಲಿ ತನ್ನ ದಾಳಿಯನ್ನು ಮುಂದುವರೆಸಿರುವ ಅಮೆರಿಕ ನೇತೃತ್ವ ಮೈತ್ರಿ  ಪಡೆಗಳು ಮಂಗಳವಾರ ವಾಯುದಾಳಿ ನಡೆಸಿದ್ದು, ಈ ವೇಳೆ ಉಗ್ರ ಸಂಘಟನೆಯ ವಕ್ತಾರ ಎಂದು ಹೇಳಲಾಗುತ್ತಿದ್ದ ಅಬು ಮಹಮದ್ ಅಲ್-ಅದ್ನಾನಿ ಸಾವನ್ನಪ್ಪಿದ್ದಾನೆ ಎಂದು ಭದ್ರತಾ  ಪಡೆಗಳು ತಿಳಿಸಿವೆ.

ಇನ್ನು ಈ ಬಗ್ಗೆ ಸ್ವತಃ ಇಸಿಸ್ ಉಗ್ರಗಾಮಿ ಸಂಘಟನೆ ಸ್ಪಷ್ಟನೆ ನೀಡಿದ್ದು, ತನ್ನ ಅಧಿಕೃತ ಸುದ್ದಿ ವೆಬ್ ತಾಣ ಅಮಾಕ್ ನಲ್ಲಿ, ಇಸಿಸ್ ವಕ್ತಾರ ಅಬು ಮಹಮದ್ ಅಲ್-ಅದ್ನಾನಿ ಹುತಾತ್ಮರಾಗಿದ್ದು,  ಅಲೆಪ್ಪೋ ನಗರದಲ್ಲಿ ಅಮೆರಿಕದ ನಡೆಸಿದ ವಾಯುದಾಳಿಯಲ್ಲಿ ಅವರು ಸಾವನ್ನಪ್ಪಿದ್ದಾರೆ ಎಂದು ಉಗ್ರ ಸಂಘಟನೆ ಬರೆದುಕೊಂಡಿದೆ.

2014ರ ಜೂನ್ ತಿಂಗಳಿನಿಂದ ಇಸಿಸ್ ಉಗ್ರಗಾಮಿ ಸಂಘಟನೆಯಲ್ಲಿ ಸಕ್ರಿಯನಾಗಿದ್ದ ಅದ್ನಾನಿ, ಉಗ್ರ ಸಂಘಟನೆಯ ಪ್ರಮುಖ ನಾಯನಾಗಿದ್ದ. ಮೂಲತಃ ಸಿರಿಯಾದ ಇದ್ಲಿಬ್  ಪ್ರಾಂತ್ಯದವನಾಗಿದ್ದ ಅದ್ನಾನಿ, ಈ ಹಿಂದೆ ಅಲ್ ಖೈದಾ ಉಗ್ರ ಸಂಘಟನೆಯೊಂದಿಗೆ ಗುರುತಿಸಿಕೊಂಡಿದ್ದ. ಉಗ್ರ ಸಂಘಟನೆಗೆ ಯುವಕರನ್ನು ನೇಮಕ ಮಾಡುವಲ್ಲಿ ಈತ ಪ್ರಮುಖ ಪಾತ್ರ  ವಹಿಸಿದ್ದ ಎಂದು ಭದ್ರತಾ ಪಡೆಗಳು ಮಾಹಿತಿ ನೀಡಿವೆ.