ವಿಶ್ವ ಹಾಕಿ ಲೀಗ್: ಭಾರತಕ್ಕೆ ಮತ್ತೊಂದು ಜಯ

ನವದೆಹಲಿ: ವಿಶ್ವ ಹಾಲಿ ಲೀಗ್‍ನ 2ನೇ ಸುತ್ತಿನ ಪಂದ್ಯಾವಳಿಯಲ್ಲಿ ಭಾರತ ಮಹಿಳಾ ಹಾಕಿ ತಂಡ ಮತ್ತೊಂದು ಗೆಲವು ದಾಖಲಿಸಿದೆ. ಭಾನುವಾರ ನಡೆದ ಪಂದ್ಯದಲ್ಲಿ ಭಾರತೀಯ ವನಿತೆಯರು ಪೋಲೆಂಡ್ ತಂಡವನ್ನು 2-0 ಗೋಲುಗಳ ಅಂತರದಲ್ಲಿ ಮಣಿಸಿದರು.

ಪಂದ್ಯದ 13ನೇ ನಿಮಿಷದಲ್ಲಿ ವಂದನಾ ಕಟಾರಿಯಾ ಅವರು ಭಾರತ ತಂಡಕ್ಕೆ ಮೊದಲ ಗೋಲು ತಂದಿತ್ತರು. ಇದಾದ ಮೇಲೆ, 26ನೇ ನಿಮಿಷದಲ್ಲಿ ಪೂನಮ್ ರಾಣಿ ಮತ್ತೊಂದು ದಾಖಲಿಸುವ ಮೂಲಕ ಎದುರಾಳಿಗಳ ವಿರುದ್ಧ ಭಾರತಕ್ಕೆ 2-0 ಗೋಲುಗಳ ಮುನ್ನಡೆ ತಂದುಕೊಟ್ಟರು. ಭಾರತೀಯ ವನಿತೆಯರು ಹೀಗೆ ತಮ್ಮ ಮೇಲೆ ಸಾಧಿಸಿದ ಪ್ರಭುತ್ವವನ್ನು ತೊಡೆದುಹಾಕುವಲ್ಲಿ ಎಡವಿದ ಪೋಲೆಂಡ್ ತಂಡದ ಆಟಗಾರ್ತಿಯರು ಯಾವುದೇ ಹಂತದಲ್ಲೂ ಭಾರತಕ್ಕೆ ಪ್ರತಿಸ್ಪರ್ಧೆ ನೀಡಲಿಲ್ಲ.

ಅಂತಿಮವಾಗಿ, ಪೋಲೆಂಡ್ ತಂಡ ಭಾರತದ ವಿರುದ್ಧ 0-2 ಗೋಲುಗಳ ಅಂತರದಿಂದ ಪರಾಭವ ಹೊಂದಿತು. ಶನಿವಾರ ನಡೆದಿದ್ದ ಪಂದ್ಯದಲ್ಲಿ ಘಾನಾ ತಂಡವನ್ನು 13-0 ಗೋಲುಗಳ ಭಾರೀ ಅಂತರದಿಂದ ಭಾರತ ತಂಡ ಮಣಿಸಿತ್ತು.

ಮಲೇಷ್ಯಾಕ್ಕೆ ಜಯ
ವಿಶ್ವ ಹಾಕಿ ಲೀಗ್‍ನ ಮತ್ತೊಂದು ಪಂದ್ಯದಲ್ಲಿ ಮಲೇಷ್ಯಾ ಮಹಿಳಾ ಹಾಕಿ ತಂಡ, ರಷ್ಯಾ ತಂಡವನ್ನು 3-0 ಗೋಲುಗಳಿಂದ ಪರಾಭವಗೊಳಿಸಿತು.

ಪಂದ್ಯದ ಪ್ರತಿ ಹಂತದಲ್ಲೂ ಚುರುಕು ಆಟ ಪ್ರದರ್ಶಿಸಿದ ಮಲೇಷ್ಯಾ ತಂಡದ ಆಟಗಾರ್ತಿಯರು ಮೊದಲಾರ್ಧದಲ್ಲೇ 3 ಗೋಲು ದಾಖಲಿಸುವ ಮೂಲಕ ಎದುರಾಳಿಗಳ ವಿರುದ್ಧ ದೊಡ್ಡ ಮುನ್ನಡೆ ದಾಖಲಿಸಿದ್ದರು. ಪಂದ್ಯ ಮುಗಿಯುವವರೆಗೂ ಇದೇ ಮುನ್ನಡೆ ಕಾಯ್ದುಕೊಳ್ಳುವಲ್ಲ ಯಶಸ್ವಿಯಾದ ಅವರು, ಪಂದ್ಯದಲ್ಲಿ ಜಯ ದಾಖಲಿಸುವಲ್ಲಿ ಯಶಸ್ವಿಯಾದರು.