ಮಹಾರಾಷ್ಟ್ರ: ಸ್ಕೂಟರ್ ಖರೀದಿ ಡೀಲ್ ನಲ್ಲಿ 70 ಲಕ್ಷ ರೂ. ವಂಚನೆ; ಇಬ್ಬರ ವಿರುದ್ಧ ಪ್ರಕರಣ ದಾಖಲು

ನವಿ ಮುಂಬೈ: ಸ್ಕೂಟರ್ ಖರೀದಿ ಡೀಲ್ ನಲ್ಲಿ ಮಹಾರಾಷ್ಟ್ರದ ನವಿ ಮುಂಬೈನ ವ್ಯಕ್ತಿಯೊಬ್ಬರಿಗೆ 70.19 ಲಕ್ಷ ರೂ. ವಂಚಿಸಿದ ಆರೋಪದ ಮೇಲೆ ಆಟೋಮೊಬೈಲ್ ಕಂಪನಿಯೊಂದರ ನಿರ್ದೇಶಕರಾದ ವ್ಯಕ್ತಿ ಮತ್ತು ಅವರ ಮಗನ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ ಎಂದು ಪೊಲೀಸ್ ಅಧಿಕಾರಿಯೊಬ್ಬರು ಭಾನುವಾರ ತಿಳಿಸಿದ್ದಾರೆ.

ದ್ವಿಚಕ್ರ ವಾಹನಗಳ ವಿತರಣಾ ವ್ಯವಹಾರದಲ್ಲಿದ್ದ ನವಿ ಮುಂಬೈನ ವಾಶಿಯ 45 ವರ್ಷದ ಸಂತ್ರಸ್ತ 168 ಸ್ಕೂಟರ್‌ಗಳ ಖರೀದಿಗಾಗಿ ಕಂಪನಿಯ ಬ್ಯಾಂಕ್ ಖಾತೆಗೆ ಮುಂಗಡ ಹಣವಾಗಿ ರೂ. 1.20 ಕೋಟಿ ಪಾವತಿಸಿದ್ದರು.

ಆದರೆ, ಪುಣೆ ಮೂಲದ ಆರೋಪಿಗಳು ಕೇವಲ 49.8 ಲಕ್ಷ ಮೌಲ್ಯದ 56 ಸ್ಕೂಟರ್‌ಗಳನ್ನು ತಲುಪಿಸಿದ್ದು, ಉಳಿದ ಬೈಕ್ ಗಳನ್ನು ಪೂರೈಸಿರಲಿಲ್ಲ. 70.19 ಲಕ್ಷ ರೂ. ಬಾಕಿ ಮೊತ್ತವನ್ನು ಹಿಂದಿರುಗಿಸಿರಲಿಲ್ಲ ಎಂದು ಎಪಿಎಂಸಿ ಪೊಲೀಸ್ ಠಾಣೆಯ ಅಧಿಕಾರಿ ತಿಳಿಸಿದ್ದಾರೆ.

ಉಳಿದ ದ್ವಿಚಕ್ರ ವಾಹನಗಳನ್ನು ನೀಡುವಂತೆ ಸಂತ್ರಸ್ತ ಒತ್ತಾಯಿಸಿದಾಗ ಆರೋಪಿಗಳು ಸ್ಪಂದಿಸುತ್ತಿರಲಿಲ್ಲ. ಆಗ ತಾನು ಮೋಸ ಹೋಗಿರುವುದನ್ನು ಅರಿತ ಸಂತ್ರಸ್ತೆ ದೂರು ದಾಖಲಿಸಿದ್ದು, ಅದರ ಆಧಾರದ ಮೇಲೆ 62 ಮತ್ತು 40 ವರ್ಷ ವಯಸ್ಸಿನ ಇಬ್ಬರು ಆರೋಪಿಗಳ ವಿರುದ್ಧ ವಂಚನೆ ಮತ್ತು ಮೋಸ ಸಂಬಂಧಿತ ಕಾನೂನು ನಿಬಂಧನೆಗಳ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ ಎಂದು ಅಧಿಕಾರಿ ತಿಳಿಸಿದ್ದಾರೆ.