ಕಾಂಗ್ರೆಸ್ ಪ್ರಕಾರ ರಾಮ ಅಸ್ತಿತ್ವದಲ್ಲಿರಲಿಲ್ಲ, ಅಯೋಧ್ಯೆ ಮಂದಿರಕ್ಕೂ ಪ್ರಾಮುಖ್ಯತೆ ಇಲ್ಲ: ಸ್ಮೃತಿ ಇರಾನಿ ಕಿಡಿ

ನವದೆಹಲಿ: ಅಯೋಧ್ಯೆ ರಾಮ ಮಂದಿರ ವಿಚಾರ ಸಂಬಂಧ ಕಾಂಗ್ರೆಸ್ ಅಧ್ಯಕ್ಷ ರಾಹುಲ್ ಗಾಂಧಿ ವಿರುದ್ಧ ಕೇಂದ್ರ ಸಚಿವೆ ಸ್ಮೃತಿ ಇರಾನಿಯವರು ಶನಿವಾರ ತೀವ್ರ ವಾಗ್ದಾಳಿ ನಡೆಸಿದ್ದಾರೆ. 

ಶುಕ್ರವಾರ ರಾಹುಲ್ ಗಾಂಧಿಯವರು ಅಮೇಥಿಗೆ ಭೇಟಿ ನೀಡುತ್ತಿದ್ದು, ಈ ಹಿನ್ನೆಲೆಯಲ್ಲಿ ಪ್ರತಿಕ್ರಿಯೆ ನೀಡಿರುವ ಸ್ಮೃತಿ ಇರಾನಿಯವರು, ಕಾಂಗ್ರೆಸ್ ಪ್ರಕಾರ ರಾಮ ಅಸ್ತಿತ್ವದಲ್ಲಿಲ್ಲ. ಅಯೋಧ್ಯೆಯಲ್ಲಿ ರಾಮ ಮಂದಿರ ವಿಚಾರ ಕೂಡ ಪ್ರಮುಖವಲ್ಲ ಎಂದು ಹೇಳಿದ್ದಾರೆ.

ರಾಮ ಮಂದಿರ ವಿಚಾರ ಕುರಿತು ಹೇಳಿಕೆ ನೀಡಿದ್ದ ರಾಹುಲ್ ಅವರು, ರಾಮ ಮಂದಿರ ಅವರಿಗೆ ಪ್ರಮುಖ ವಿಚಾರವಲ್ಲ ಎಂದು ಹೇಳಿದ್ದರು. ಗಾಂಧಿ ಕುಟುಂಬ ಹಾಗೂ ಕಾಂಗ್ರೆಸ್ ಪಕ್ಷ ಸಲ್ಲಿಸಿದ್ದ ಅಫಿಡವಿಟ್ ನಲ್ಲಿಯೂ, ರಾಮ ಅಸ್ತಿತ್ವದಲ್ಲಿರುವ ಬಗ್ಗೆ ಯಾವುದೇ ಪುರಾವೆಗಳಿಲ್ಲ. ಹೀಗಾಗಿ ಮಂದಿರ ನಿರ್ಮಾಣ ಪ್ರಾಮುಖ್ಯವಲ್ಲ ೆಂದು ಹೇಳಿದ್ದರು. ಈ ಹೇಳಿಕೆ ಮೂಲಕ ಕಾಂಗ್ರೆಸ್ ಅಧ್ಯಕ್ಷ ಮಂದಿರ ನಿರ್ಮಾಣ ವಿಚಾರದಲ್ಲಿ ತಾವು ಏನನ್ನೂ ಮಾಡುವುದಿಲ್ಲ ಎಂಬುದನ್ನು ಸ್ಪಷ್ಟವಾಗಿ ತಿಳಿಸಿದ್ದಾರೆಂದು ಹೇಳಿದ್ದಾರೆ. 

ಉತ್ತರಪ್ರದೇಶ ಹಾಗೂ ಬಿಹಾರ ರಾಜ್ಯಗಳ ವಿರುದ್ದ ಮಧ್ಯಪ್ರದೇಶ ಮುಖ್ಯಮಂತ್ರಿ ಕಮಲ್ ನಾಥ್ ಅವರು ಹೇಳಿಕೆ ನೀಡಿದ್ದಾಗ ರಾಹುಲ್ ಗಾಂಧಿಯೇಕೆ ಮೌನವಾಗಿದ್ದರು. ಕಾಂಗ್ರೆಸ್ ಮುಖ್ಯಮಂತ್ರಿ ನೀಡಿದ್ದ ಹೇಳಿಕೆಗೆ ರಾಹುಲ್ ಖಂಡನೆ ಕೂಡ ವ್ಯಕ್ತಪಡಿಸಲಿಲ್ಲ. ಇದೀಗ ಅಮೇಥಿಗೆ ಭೇಟಿ ನೀಡಿತ್ತಿರುವ ರಾಹುಲ್ ಅವರು ಅಮೇಥಿ ಜನರ ಕಣ್ಣನ್ನು ಹೇಗೆ ನೋಡಲು ಸಾಧ್ಯ? ಎಂದು ಪ್ರಶ್ನಿಸಿದ್ದಾರೆ.