'ಇಸಿಸ್ ಕಮಿಂಗ್ ಸೂನ್': ಸೊಲಾನ್ ಸೇನಾ ಕಂಟೋನ್ಮೆಂಟ್ ಬಳಿ ಪೋಸ್ಟರ್ ಪತ್ತೆ

ಶಿಮ್ಲಾ: ಪಾಕಿಸ್ತಾನ ಆಕ್ರಮಿತ ಕಾಶ್ಮೀರದ ಉಗ್ರ ನೆಲೆಗಳ ಮೇಲೆ ಭಾರತೀಯ ಸೇನೆ ದಾಳಿ ನಡೆಸಿದ ಬಳಿಕ ಭಾರತದ ಮೇಲೆ ದಾಳಿ ನಡೆಸಲು ಉಗ್ರ ಸಂಘಟನೆಗಳು ಸತತ ಯತ್ನ ನಡೆಸುತ್ತಲೇ ಇವೆ. ಇದಕ್ಕೆ ಉದಾಹರಣೆ ಎಂಬಂತೆ ಹಿಮಾಚಸ ಪ್ರದೇಶದ ಸೊಲಾನ್ ಸೇನಾ ಕಂಟೋನ್ಮೆಂಟ್ ನಲ್ಲಿ ಪೋಸ್ಟರ್ ವೊಂದು ದೊರಕಿದ್ದು, ಶೀಘ್ರದಲ್ಲೇ ದಾಳಿ ನಡೆಸುವ ಎಚ್ಚರಿಕೆಯನ್ನು ನೀಡಲಾಗಿದೆ ಎಂದು ತಿಳಿದುಬಂದಿದೆ.

ಹಿಮಾಚಲ ಪ್ರದೇಶದ ಸೊನಾಲ್ ಜಿಲ್ಲೆಯಲ್ಲಿರುವ ಸೇನಾ ಕಂಟೋನ್ಮೆಂಟ್ ಬಳಿ ಪೋಸ್ಟರ್ ಗಳು ದೊರಕಿದ್ದು, ಪೋಸ್ಟರ್ ನಲ್ಲಿ ಇಸಿಸ್ (ಇಸ್ಲಾಮಿಕ್ ಸ್ಟೇಟ್ ಆಫ್ ಇರಾಕ್ ಆ್ಯಂಡ್ ಇರಾನ್) ಕಮಿಂಗ್ ಸೂನ್ ಎಂದು ಇಂಗ್ಲೀಷ್, ಹಿಂದಿ ಮತ್ತು ಉರ್ದು ಭಾಷಣೆಯಲ್ಲಿ ಬರೆಯಲಾಗಿದೆ.

ಒಂದು ಪೋಸ್ಟರ್ ನಲ್ಲಿ ಇಸಿಸ್ ಕಮಿಂಗ್ ಸೂನ್ ಎಂದು ಬರೆದಿದ್ದರೆ, ಮತ್ತೊಂದು ಪೋಸ್ಟರ್ ನಲ್ಲಿ ಶೀಘ್ರದಲ್ಲಿಯೇ ಸುಬತುವಿನಿಂದ ನೇಪಾಳದವರೆಗೂ ಮೂರು ಪ್ರಬಲ ಬಾಂಬ್ ಗಳನ್ನು ಸ್ಫೋಟಿಸಲಾಗುತ್ತದೆ ಎಂದು ಎಚ್ಚರಿಕೆಯನ್ನು ನೀಡಿದ್ದಾರೆಂದು ಹೇಳಲಾಗುತ್ತಿದೆ.

ಇದೀಗ ಪೋಸ್ಟರ್ ಗಳನ್ನು ವಶಕ್ಕೆ ಪಡೆದುಕೊಂಡಿರುವ ಅಧಿಕಾರಿಗಳು, ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿ ತನಿಖೆ ಆರಂಭಿಸಿದ್ದಾರೆ. ಅಲ್ಲದೆ, ಪೋಸ್ಟರ್ ಗಳಿಂದ ಹೆದರಂತೆ ಸ್ಥಳೀಯರಿಗೆ ಧೈರ್ಯವನ್ನು ಹೇಳಿದ್ದಾರೆ.