ಖಾಲಿ ಸೈಟ್ ಕ್ಲೀನ್ ಮಾಡುವಾಗ ಸಿಕ್ತು ಕೊಳೆತ ಶವ; ಬಟ್ಟೆಯ ಟ್ಯಾಗ್ ಬೆನ್ನತ್ತಿ ಹೋದ ಪೊಲೀಸರಿಗೆ ಸಿಕ್ಕಿದ್ದು ಶಾಕಿಂಗ್ ಸತ್ಯ!

ಬೆಂಗಳೂರು: ಗ್ರೇಟರ್ ಬೆಂಗಳೂರು ಪ್ರಾಧಿಕಾರ (GBA) ಖಾಲಿ ನಿವೇಶನಗಳನ್ನು ಕಡ್ಡಾಯವಾಗಿ ಸ್ವಚ್ಛವಾಗಿಟ್ಟುಕೊಳ್ಳಬೇಕು ಎಂದು ನೀಡಿದ್ದ ಕಟ್ಟುನಿಟ್ಟಿನ ನೋಟಿಸ್‌ ಹಿನ್ನೆಲೆಯಲ್ಲಿ, ಸೈಟ್ ಮಾಲೀಕರು ಜಾಗವನ್ನು ಸ್ವಚ್ಛಗೊಳಿಸುವಾಗ ಬೆಂಗಳೂರಿನಲ್ಲಿ ನಡೆದಿದ್ದ ಭೀಕರ ಕೊಲೆ ಪ್ರಕರಣವೊಂದು ತಡವಾಗಿ ಬೆಳಕಿಗೆ ಬಂದಿದೆ. ಖಾಲಿ ನಿವೇಶನದಲ್ಲಿದ್ದ ಹಾಸಿಗೆಯೊಂದರಲ್ಲಿ ಸುತ್ತಿ ಎಸೆಯಲಾಗಿದ್ದ ಮಹಿಳೆಯ ಕೊಳೆತ ಶವವನ್ನು ಪತ್ತೆಹಚ್ಚಿದ ಸಂಪಿಗೆಹಳ್ಳಿ ಠಾಣೆ ಪೊಲೀಸರು, ತನಿಖೆ ನಡೆಸಿ ಆಕೆಯ ಪತಿಯನ್ನೇ ಕೊಲೆಗಾರ ಎಂದು ಬಂಧಿಸಿದ್ದಾರೆ. ಆ ಕುರಿತ ವರದಿ ಇಲ್ಲಿದೆ:

ಏನಿದು ಘಟನೆ?

ಬೆಂಗಳೂರಿನ ಸಂಪಿಗೆಹಳ್ಳಿ ಪೊಲೀಸ್ ಠಾಣಾ ವ್ಯಾಪ್ತಿಯ ಎಂ.ಎಸ್ ನಗರದ ಅಗ್ರಹಾರ ಲೇಔಟ್‌ನಲ್ಲಿ ಖಾಲಿ ಸೈಟ್ ಇತ್ತು. ಜಿಬಿಎ ನಿಯಮದಂತೆ ಸೈಟ್ ಮಾಲೀಕರು ತಮ್ಮ ಜಾಗವನ್ನು ಸ್ವಚ್ಛಗೊಳಿಸಲು ಕಾರ್ಮಿಕರನ್ನು ಕಳುಹಿಸಿದ್ದರು. ಅದರಂತೆ, ಕಾರ್ಮಿಕರು ಅಲ್ಲಿನ ಕಸಕಡ್ಡಿಗಳನ್ನು ತೆಗೆಯುತ್ತಿದ್ದಾಗ ಬೆಡ್ ಮತ್ತು ಹಾಸಿಗೆಯಲ್ಲಿ ಸುತ್ತಿ ತಗ್ಗಿನಲ್ಲಿ ಎಸೆಯಲಾಗಿದ್ದ, ಸಂಪೂರ್ಣವಾಗಿ ಕೊಳೆತು ಅಸ್ಥಿಪಂಜರವಾಗುತ್ತಿದ್ದ ಮಹಿಳೆಯ ಮೃತದೇಹ ಪತ್ತೆಯಾಗಿದೆ. ಇನ್ನು, ಶವ ಪತ್ತೆಯಾದಾಗ ಅದು ಸುಮಾರು 20 ರಿಂದ 30 ದಿನಗಳಷ್ಟು ಹಳೆಯದಾಗಿದ್ದರಿಂದ ಗುರುತು ಸಿಗುವುದು ಅಸಾಧ್ಯವಾಗಿತ್ತು. ಆದರೆ, ಮೃತದೇಹದ ಮೇಲಿದ್ದ ಬಟ್ಟೆಯ ಒಂದೇ ಒಂದು ಮಾಲ್‌ನ ಬಟ್ಟೆ ಟ್ಯಾಗ್ ಪೊಲೀಸರ ಕೈಗೆ ಸಿಕ್ಕಿತು. ಅದರಂತೆ, ತನಿಖಾ ತಂಡವು ಆ ಟ್ಯಾಗ್ ಅನ್ನು ಹಿಂಬಾಲಿಸಿ ಭುವನೇಶ್ವರದ ಶಾಪಿಂಗ್ ಕಾಂಪ್ಲೆಕ್ಸ್‌ನ ಬಿಲ್ ವಿವರಗಳನ್ನು ಕಲೆಹಾಕಿದಾಗ, ಅದು ಅನಸೂಯ ಅವರ ಬಟ್ಟೆ ಎಂದು ದೃಢಪಟ್ಟು ಕೊಲೆಯ ರಹಸ್ಯ ಬಯಲಾಗಿದೆ.

ಉಸಿರುಗಟ್ಟಿಸಿ ಬರ್ಬರವಾಗಿ ಕೊಲೆ....

ತನಿಖೆಯನ್ನು ತೀವ್ರಗೊಳಿಸಿದ ಸಂಪಿಗೆಹಳ್ಳಿ ಪೊಲೀಸರು ಮೃತ ಅನಸೂಯ ಅವರ ಪತಿ, ಒಡಿಶಾ ಮೂಲದ ಸಾಗರ್ ಚಂದ್ರ ರಾವತ್ (32) ಎಂಬಾತನನ್ನು ಬಂಧಿಸಿದ್ದಾರೆ. ಅದರಲ್ಲೂ, ದಂಪತಿಗಳು ಕೆಲವು ತಿಂಗಳ ಹಿಂದಷ್ಟೇ ಪ್ರೀತಿಸಿ ವಿವಾಹವಾಗಿ ಜೀವನೋಪಾಯಕ್ಕಾಗಿ ಬೆಂಗಳೂರಿಗೆ ಬಂದು ನೆಲೆಸಿದ್ದರು. ಆದರೆ, ಆಗಸ್ಟ್ 11ರಂದು ಹಣಕಾಸು ಹಾಗೂ ಸಂಬಳದ ವಿಚಾರವಾಗಿ ಇವರಿಬ್ಬರ ನಡುವೆ ತೀವ್ರ ಗಲಾಟೆ ನಡೆದಿತ್ತು. ಇದರಿಂದ ಆಕ್ರೋಶಗೊಂಡ ಸಾಗರ್, ಪತ್ನಿಯನ್ನು ಉಸಿರುಗಟ್ಟಿಸಿ ಬರ್ಬರವಾಗಿ ಕೊಲೆ ಮಾಡಿದ್ದ. ಜೊತೆಗೆ, ಪತ್ನಿಯನ್ನು ಕೊಂದ ನಂತರ ಆರೋಪಿ ಸಾಗರ್ ಯಾರಿಗೂ ಅನುಮಾನ ಬಾರದಂತೆ ಬರೋಬ್ಬರಿ ಮೂರು ದಿನಗಳ ಕಾಲ ಅದೇ ಕೋಣೆಯಲ್ಲಿ ಶವದ ಜೊತೆಯೇ ವಾಸವಿದ್ದ! ಆದರೆ, ನಾಲ್ಕನೇ ದಿನ ಶವ ವಾಸನೆ ಬರಲಾರಂಭಿಸಿದಾಗ, ಅದನ್ನು ಹಾಸಿಗೆಯಲ್ಲಿ ಸುತ್ತಿ ತಡರಾತ್ರಿ ಯಾರಿಗೂ ತಿಳಿಯದಂತೆ ಸಮೀಪದ ಖಾಲಿ ಸೈಟ್‌ಗೆ ಎಸೆದು, ಏನೂ ಅರಿಯದವನಂತೆ ಎಂದಿನಂತೆ ಹೋಟೆಲ್ ಕೆಲಸಕ್ಕೆ ಹೋಗುತ್ತಿದ್ದ.

ಸದ್ಯ ಸಂಪಿಗೆಹಳ್ಳಿ ಪೊಲೀಸರು ಆರೋಪಿ ಸಾಗರ್‌ನನ್ನು ಬಿಗಿ ಬಂದೋಬಸ್ತ್‌ನಲ್ಲಿ ಬಂಧಿಸಿದ್ದು, ಭಾರತೀಯ ನ್ಯಾಯ ಸಂಹಿತೆ (BNS) ಸೆಕ್ಷನ್ 103(1) ರ ಅಡಿಯಲ್ಲಿ ಪ್ರಕರಣ ದಾಖಲಿಸಿಕೊಂಡು ಮುಂದಿನ ಕ್ರಮ ಕೈಗೊಂಡಿದ್ದಾರೆ. ಈ ವೇಳೆ, ಆರೋಪಿ ಸಾಗರ್ ಚಂದ್ರ ರಾವತ್, ಕೌಟುಂಬಿಕ ಕಲಹದ ಹಿನ್ನೆಲೆಯಲ್ಲಿ ಪತಿಯೇ ಪತ್ನಿಯನ್ನು ಕೊಲೆ ಮಾಡಿ, ಶವವನ್ನು ಖಾಲಿ ಸೈಟ್‌ನಲ್ಲಿ ತಂದು ಬಿಸಾಡಿದ್ದಾಗಿ ಒಪ್ಪಿಕೊಂಡಿದ್ದಾನೆ.