'ಇದು ಆಟೋ, ಹೊಟೆಲ್ ರೂಂ ಅಲ್ಲ… ಇಲ್ಲಿ ರೊಮ್ಯಾನ್ಸ್‌ಗೆ ಅವಕಾಶವಿಲ್ಲ': ಪ್ರಯಾಣಿಕರಿಗೆ ಬೆಂಗಳೂರು ಆಟೋ ಚಾಲಕನ ಖಡಕ್‌ ಸಂದೇಶ, Video

ಬೆಂಗಳೂರು: ಇತ್ತೀಚಿನ ದಿನಗಳಲ್ಲಿ ಪ್ರಯಾಣಿಕರ ಅಶ್ಲೀಲ ವರ್ತನೆಯಿಂದ ಬೇಸತ್ತಿರುವ ಆಟೋ ಚಾಲಕನೋರ್ವ ಪ್ರಯಾಣಿಕರಿಗೆ ಖಡಕ್ ಎಚ್ಚರಿಕೆ ನೀಡಿದ್ದು, 'ಇದು ಆಟೋ, ಹೊಟೆಲ್ ರೂಂ ಅಲ್ಲ… ಇಲ್ಲಿ ರೊಮ್ಯಾನ್ಸ್‌ಗೆ ಅವಕಾಶವಿಲ್ಲ' ಎಂಬ ಬರಹ ಬರೆಸಿದ್ದಾರೆ.

ಹೌದು.. ಇತ್ತೀಚಿನ ದಿನಗಳಲ್ಲಿ ಆಟೋ ಮತ್ತು ಕ್ಯಾಬ್ ಗಳ ಪ್ರಯಾಣಿಕರ ಅಶ್ಲೀಲ ವರ್ತನೆ ವ್ಯಾಪಕವಾಗಿ ವರದಿಯಾಗುತ್ತಿದ್ದು, ಈ ಕುರಿತ ವಿಡಿಯೋಗಳು ವ್ಯಾಪಕ ವೈರಲ್ ಆಗುತ್ತಿವೆ. ಇದೇ ಹೊತ್ತಿನಲ್ಲೇ ಬೆಂಗಳೂರಿನ ಆಟೋ ಚಾಲಕನೊಬ್ಬ, 'ಇದು ಆಟೋ, OYO ಅಲ್ಲ. ಇಲ್ಲಿ ರೊಮ್ಯಾನ್ಸ್‌ ಇಲ್ಲ. ಬ್ಲಡಿ ಇಡಿಯಟ್ಸ್‌” ಎಂದು ಆಟೋ ಮೇಲೆ ಬರೆಸಿದ್ದು, ಇದು ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್‌ ಆಗಿದೆ.

ಆಟೋದಲ್ಲಿ ಪ್ರಯಾಣಿಸುತ್ತಿದ್ದ ಜೋಡಿಯ ವರ್ತನೆಗೆ ಚಾಲಕ ಆಕ್ಷೇಪ ವ್ಯಕ್ತಪಡಿಸಿದ ವೇಳೆ ಈ ಮಾತುಗಳನ್ನು ಹೇಳಿದ್ದಾರೆ ಎನ್ನಲಾಗುತ್ತಿದೆ. ಚಾಲಕನ ಹೇಳಿಕೆಯ ವಿಡಿಯೋ ಅಥವಾ ಅದರ ತುಣುಕು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದು, ನೆಟ್ಟಿಗರು ತಮ್ಮದೇ ರೀತಿಯಲ್ಲಿ ಪ್ರತಿಕ್ರಿಯಿಸುತ್ತಿದ್ದಾರೆ.

ಸಾರ್ವಜನಿಕ ಸಾರಿಗೆ ವಾಹನಗಳಲ್ಲಿ ಪ್ರಯಾಣಿಸುವಾಗ ಪ್ರಯಾಣಿಕರು ಇತರರಿಗೆ ಮುಜುಗರ ಉಂಟುಮಾಡುವಂತಹ ವರ್ತನೆ ಮಾಡಬಾರದು ಎಂಬ ಅಭಿಪ್ರಾಯವನ್ನು ಕೆಲವರು ವ್ಯಕ್ತಪಡಿಸಿದ್ದಾರೆ. ಮತ್ತೊಂದೆಡೆ, ಪ್ರಯಾಣಿಕರ ವೈಯಕ್ತಿಕ ವಿಚಾರದಲ್ಲಿ ಚಾಲಕ ಈ ರೀತಿಯಾಗಿ ಕಠಿಣ ಪದಗಳನ್ನು ಬಳಸಿರುವುದು ಸರಿಯೇ ಎಂಬ ಪ್ರಶ್ನೆಯನ್ನೂ ಕೆಲವರು ಎತ್ತಿದ್ದಾರೆ.

ವಿಶೇಷವಾಗಿ “This is an auto, not OYO” ಎಂಬ ಚಾಲಕನ ಒಂದು ಸಾಲು ಸಾಮಾಜಿಕ ಜಾಲತಾಣ ಬಳಕೆದಾರರ ಗಮನ ಸೆಳೆದಿದೆ. ಈ ಹೇಳಿಕೆಯನ್ನು ಕೆಲವರು ತಮಾಷೆಯಾಗಿ ಹಂಚಿಕೊಳ್ಳುತ್ತಿದ್ದರೆ, ಇನ್ನೂ ಕೆಲವರು ಸಾರ್ವಜನಿಕ ಸ್ಥಳಗಳಲ್ಲಿ ವೈಯಕ್ತಿಕ ಮಿತಿಗಳನ್ನು ಕಾಪಾಡಿಕೊಳ್ಳುವ ಅಗತ್ಯದ ಬಗ್ಗೆ ಚರ್ಚೆ ನಡೆಸುತ್ತಿದ್ದಾರೆ.

ಆದರೆ, ಘಟನೆ ನಡೆದ ನಿಖರ ಸ್ಥಳ, ಸಮಯ ಹಾಗೂ ಚಾಲಕ ಮತ್ತು ಪ್ರಯಾಣಿಕರ ನಡುವಿನ ಸಂಪೂರ್ಣ ಸಂಭಾಷಣೆಯ ಬಗ್ಗೆ ಸ್ಪಷ್ಟ ಮಾಹಿತಿ ಸದ್ಯ ಲಭ್ಯವಿಲ್ಲ. ವೈರಲ್‌ ಆಗಿರುವ ವಿಡಿಯೋ ಅಥವಾ ಹೇಳಿಕೆಯ ಸಂಪೂರ್ಣ ಸಂದರ್ಭ ತಿಳಿದುಬಂದ ಬಳಿಕವೇ ಘಟನೆಯ ಬಗ್ಗೆ ಸ್ಪಷ್ಟ ಚಿತ್ರಣ ಸಿಗಲಿದೆ.

ಸದ್ಯ “ಆಟೋ, OYO ಅಲ್ಲ” ಎಂಬ ಚಾಲಕನ ಹೇಳಿಕೆ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಯ ವಿಷಯವಾಗಿದ್ದು, ಬೆಂಗಳೂರಿನ ಆಟೋ ಪ್ರಯಾಣಿಕರ ವರ್ತನೆ, ಸಾರ್ವಜನಿಕ ಸ್ಥಳಗಳಲ್ಲಿನ ಶಿಷ್ಟಾಚಾರ ಮತ್ತು ವೈಯಕ್ತಿಕ ಸ್ವಾತಂತ್ರ್ಯದ ಮಿತಿಗಳ ಕುರಿತು ಚರ್ಚೆಗೆ ಕಾರಣವಾಗಿದೆ.