ರೈಲ್ವೆ ಬಜೆಟ್: ಕರ್ನಾಟಕಕ್ಕೆ ದಾಖಲೆಯ 7,561 ಕೋಟಿ ರೂ. ಅನುದಾನ

ಬೆಂಗಳೂರು: 2023-2024ರ ರೈಲ್ವೆ ಬಜೆಟ್‌ನಲ್ಲಿ ಕರ್ನಾಟಕಕ್ಕೆ 7,561 ಕೋಟಿ ರೂಪಾಯಿಗಳ ದಾಖಲೆಯ ಮೊತ್ತ ಸಿಕ್ಕಿದೆ. ಇದು ತನ್ನ ಅತ್ಯಧಿಕ ಬಂಡವಾಳದ ವೆಚ್ಚವಾಗಿದೆ ಎಂದು ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ತಿಳಿಸಿದ್ದಾರೆ. ಇದು ನೈಋತ್ಯ ರೈಲ್ವೆ (SWR) ವಲಯಕ್ಕೆ ಮೀಸಲಿಟ್ಟ 9,200 ಕೋಟಿ ರೂಪಾಯಿಗಳ ಭಾಗವಾಗಿದೆ, ಇದುವರೆಗೆ ಕರ್ನಾಟಕಕ್ಕೆ ಸಿಕ್ಕಿದ ಅತ್ಯಂತ ದೊಡ್ಡ ಮೊತ್ತವಾಗಿದೆ. 

ನಿನ್ನೆ ಸಂಸತ್ತಿನಲ್ಲಿ ಪಿಂಕ್ ಬುಕ್ (ದೇಶದಲ್ಲಿ ರೈಲ್ವೆ ಯೋಜನೆಗಳಿಗೆ ವಿವರವಾದ ಹಂಚಿಕೆ) ಮಂಡಿಸಲಾಯಿತು. ನಂತರ ಸಂಜೆ ವಿಡಿಯೋ ಕಾನ್ಫರೆನ್ಸ್ ಮೂಲಕ ಕರ್ನಾಟಕದಲ್ಲಿ ಮಾಧ್ಯಮಗಳಿಗೆ ಮಾಹಿತಿ ನೀಡಿದ ಅಶ್ವಿನ್ ವೈಷ್ಣವ್, 2009 ಮತ್ತು 2014 ರ ನಡುವಿನ ಸರಾಸರಿ ವಾರ್ಷಿಕ ವೆಚ್ಚವು 835 ಕೋಟಿ ರೂಪಾಯಿಗಳು. ಈ ವರ್ಷದ ಬಜೆಟ್ ಅದಕ್ಕಿಂತ ಒಂಬತ್ತು ಪಟ್ಟು ಹೆಚ್ಚಳವಾಗಿದೆ ಎಂದು ಹೇಳಿದರು.

2014 ರಿಂದ 2022 ರವರೆಗಿನ ಸರಾಸರಿ ವಾರ್ಷಿಕ ವೆಚ್ಚವು 3,424 ಕೋಟಿ ರೂಪಾಯಿಗಳಷ್ಟಿದೆ ಎಂದು ಅಧಿಕೃತ ಪ್ರಕಟಣೆ ತಿಳಿಸಿದೆ. ಹೊಸ ಮಾರ್ಗಗಳಿಗೆ 2,423 ಕೋಟಿ, ಡಬ್ಲಿಂಗ್‌ಗೆ 1,529 ಕೋಟಿ ಮತ್ತು ರಸ್ತೆ ಸುರಕ್ಷತಾ ಕಾಮಗಾರಿಗೆ 242 ಕೋಟಿ ರೂಪಾಯಿಗಳನ್ನು ವಿನಿಯೋಗಿಸಲಾಗಿದೆ ಎಂದು ಎಸ್‌ಡಬ್ಲ್ಯೂಆರ್ ಜನರಲ್ ಮ್ಯಾನೇಜರ್ ಸಂಜೀವ್ ಕಿಶೋರ್ ಸುದ್ದಿಗಾರರಿಗೆ ತಿಳಿಸಿದರು.

ಇದನ್ನೂ ಓದಿ: ನಿಲ್ದಾಣಗಳ ಮರು ನಿರ್ಮಾಣ, ಇನ್ನಷ್ಟು ವಂದೇ ಭಾರತ್ ರೈಲು: ರೈಲ್ವೆ ಸಚಿವರು ನೀಡಿದ ಬಜೆಟ್ ಬಳಕೆಯ ವಿವರ ಹೀಗಿದೆ...

ಬೆಂಗಳೂರು ಉಪನಗರ ರೈಲ್ವೇ ಯೋಜನೆಗೆ 1,350 ಕೋಟಿ ರೂಪಾಯಿ ಸೇರಿದಂತೆ ನೈರುತ್ಯ ರೈಲ್ವೆಗೆ 9,200 ಕೋಟಿ ರೂಪಾಯಿಗಳು,  ಹಿಂದಿನ ವರ್ಷದ 6,900 ಕೋಟಿ ರೂಪಾಯಿಗಳ ಹಂಚಿಕೆಗಿಂತ 33.3% ಹೆಚ್ಚಳ ಕಂಡಿದೆ. ಇದು ಈ ಹಿಂದೆ ಅದರ ಅತ್ಯಧಿಕ ಹಂಚಿಕೆಯಾಗಿತ್ತು. "ಅಮೃತ್ ಭಾರತ್ ಯೋಜನೆಯಡಿ ಪುನರಾಭಿವೃದ್ಧಿಗಾಗಿ ನೈರುತ್ಯ ರೈಲ್ವೆ ವಲಯದಲ್ಲಿ 51 ನಿಲ್ದಾಣಗಳನ್ನು ತೆಗೆದುಕೊಳ್ಳಲಾಗಿದೆ ಎಂದು ಅವರು ಹೇಳಿದರು.

ಇವುಗಳಲ್ಲಿ 16 ನಿಲ್ದಾಣಗಳು ಬೆಂಗಳೂರು ರೈಲ್ವೆ ವಿಭಾಗದಲ್ಲಿವೆ ಎಂದು ಬೆಂಗಳೂರು ವಿಭಾಗೀಯ ರೈಲ್ವೆ ವ್ಯವಸ್ಥಾಪಕ ಶ್ಯಾಮ್ ಸಿಂಗ್ ನ್ಯೂ ಇಂಡಿಯನ್ ಎಕ್ಸ್ ಪ್ರೆಸ್ ಪತ್ರಿಕೆಗೆ ತಿಳಿಸಿದರು. 

ಬೆಂಗಳೂರಿಗೆ ವಂದೇ ಮೆಟ್ರೋ ಸಾಧ್ಯತೆ: ವಂದೇ ಮೆಟ್ರೊ ಸೇವೆಗಳ ಪರಿಕಲ್ಪನೆಯ ಕುರಿತಾದ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ಸಂಜೀವ್ ಕಿಶೋರ್,  ಬೆಂಗಳೂರಿಗೆ ಪ್ರಯೋಜನವಾಗುವುದಾದರೆ, ಈ ರೈಲುಗಳು ಪರಸ್ಪರ 100 ಕಿಮೀ ಅಂತರದಲ್ಲಿರುವ ನಗರ ಪ್ರದೇಶಗಳಿಗೆ ಉದ್ದೇಶಿಸಲಾಗಿದೆ ಎಂದು ಹೇಳಿದರು. 

ಇದನ್ನೂ ಓದಿ: ಅಮೃತ್ ಭಾರತ್ ಯೋಜನೆಯಡಿ ರಾಜ್ಯದ 52 ರೈಲು ನಿಲ್ದಾಣ ಮೇಲ್ದರ್ಜೆಗೆ

ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಭೇಟಿ ನೀಡಿದ ಸಂದರ್ಭದಲ್ಲಿ ರೈಲ್ವೆ ಸಚಿವರು ಈ ಮಾರ್ಗದಲ್ಲಿ ಹೆಚ್ಚಿನ ಸೇವೆಗಳನ್ನು ನಡೆಸಲು ಸೂಚಿಸಿದ ಹಿನ್ನೆಲೆಯಲ್ಲಿ ಯಲಹಂಕ ಮತ್ತು ದೇವನಹಳ್ಳಿ ನಡುವಿನ ಲೈನ್ ಡಬ್ಲಿಂಗ್ ಪರಿಗಣಿಸಲು ಕಾರ್ಯಸಾಧ್ಯತೆಯ ಅಧ್ಯಯನವನ್ನು ಕೈಗೊಳ್ಳಲಾಗಿದೆ ಎಂದು ಅವರು ಹೇಳಿದರು. ಬೆಂಗಳೂರು ಮತ್ತು ಚೆನ್ನೈ ನಡುವೆ ವಂದೇ ಭಾರತ್ ರೈಲುಗಳ ವೇಗವನ್ನು ಹೆಚ್ಚಿಸುವ ಕುರಿತು ಕೇಳಿದ ಪ್ರಶ್ನೆಗೆ, ಅದಕ್ಕೆ ಅನುಕೂಲವಾಗುವಂತೆ ಕ್ರಿಯಾ ಯೋಜನೆಯನ್ನು ರೂಪಿಸಲಾಗುತ್ತಿದೆ ಎಂದು ಹೇಳಿದರು.

ದ್ವಿಗುಣಗೊಳಿಸುವ ಯೋಜನೆಗಳಿಗೆ ಹಂಚಿಕೆ
ಬೆಂಗಳೂರು-ಕ್ಯಾಂಟೋನ್ಮೆಂಟ್ ವೈಟ್‌ಫೀಲ್ಡ್ ನಾಲ್ಕು ಪಟ್ಟು: 250 ಕೋಟಿ ರೂ
ಬೈಯಪ್ಪನಹಳ್ಳಿ-ಹೊಸೂರು: 100 ಕೋಟಿ ರೂ
ಗದಗ-ಹೊಟಗಿ: 170 ಕೋಟಿ ರೂ
ಹೊಸ ಮಾರ್ಗಗಳಿಗೆ ಹಂಚಿಕೆ
ಗಿಣಿಗೇರಾ-ರಾಯಚೂರು: 300 ಕೋಟಿ ರೂ
ತುಮಕೂರು-ದಾವಣಗೆರೆ (ಚಿತ್ರದುರ್ಗ ಮೂಲಕ) 420.85 ಕೋಟಿ ರೂ
ತುಮಕೂರು-ರಾಯದುರ್ಗ: ರೂ 350 ಕೋಟಿ (ರಾಜ್ಯ ಸರ್ಕಾರವು ಪಾಲು ಕೊಡುಗೆ)

ಕರ್ನಾಟಕಕ್ಕೆ ಅತ್ಯಧಿಕ ನಿಧಿ: ಪ್ರಹ್ಲಾದ್ ಜೋಷಿ 
ಸಂಸದೀಯ ವ್ಯವಹಾರಗಳು, ಗಣಿ ಮತ್ತು ಕಲ್ಲಿದ್ದಲು ಕೇಂದ್ರ ಸಚಿವ ಪ್ರಹ್ಲಾದ್ ಜೋಷಿ ಮಾತನಾಡಿ, ಕರ್ನಾಟಕವು ಕೇಂದ್ರ ಸರ್ಕಾರದಿಂದ ಅತಿ ಹೆಚ್ಚು ಹಣವನ್ನು ಪಡೆದುಕೊಂಡಿದೆ. ರಸ್ತೆಗಳು, ರಾಷ್ಟ್ರೀಯ ಹೆದ್ದಾರಿಗಳು ಮತ್ತು ರೈಲುಮಾರ್ಗಗಳು ಸೇರಿದಂತೆ ಮೂಲಭೂತ ಸೌಕರ್ಯಗಳಿಗೆ ಗರಿಷ್ಠ ಹಣವನ್ನು ನೀಡಲಾಗಿದೆ - ಹೊಸ ಮಾರ್ಗಗಳು, ಟ್ರ್ಯಾಕ್ ಡಬ್ಲಿಂಗ್, ಟ್ರ್ಯಾಕ್ ವಿದ್ಯುದ್ದೀಕರಣ ಇತ್ಯಾದಿಗಳಿಗೆ ಅನುದಾನ ನೀಡಲಾಗಿದೆ ಎಂದರು.

2014ರ ವರೆಗೆ ಕರ್ನಾಟಕದಲ್ಲಿ ಕಳೆದ ಎಂಟು ವರ್ಷಗಳಲ್ಲಿ ದುಪ್ಪಟ್ಟು ಹಳಿಗಳನ್ನು ವಿದ್ಯುದೀಕರಣಗೊಳಿಸಲಾಗಿದೆ ಎಂದರು. ಭದ್ರಾ ಮೇಲ್ದಂಡೆ ಯೋಜನೆಗೆ 5,300 ಕೋಟಿ ರೂ.ಗಳನ್ನು ಮೀಸಲಿಟ್ಟಿದ್ದರೆ, ಸರ್ಕಾರವು ವಿಶ್ವದಲ್ಲೇ ಅತಿ ಹೆಚ್ಚು ಮೂಲಸೌಕರ್ಯಕ್ಕಾಗಿ 10 ಲಕ್ಷ ಕೋಟಿ ರೂಪಾಯಿಗಳನ್ನು ಖರ್ಚು ಮಾಡುತ್ತಿದೆ. ಉದ್ಯೋಗಗಳನ್ನು ಸೃಷ್ಟಿಸುತ್ತದೆ ಮತ್ತು ಆರ್ಥಿಕತೆಯನ್ನು ಉತ್ತೇಜಿಸುತ್ತದೆ ಎಂದು ಹೇಳಿದರು.