ಚಾಲಕನ ಅತಿರೇಕದ ವರ್ತನೆ: ಚಾಲಕನನ್ನು 100 ಮೀಟರ್ ಕಾರಿನಿಂದ ತಳ್ಳಿಕೊಂಡು ಹೋದ ಭೂಪ!

ಬೆಂಗಳೂರು: ಹೆಬ್ಬಾಳ ಮೇಲ್ಸೇತುವೆಯಲ್ಲಿ ಇಬ್ಬರು ಕಾರು ಚಾಲಕರ ನಡುವೆ ನಡೆದ ಜಗಳದ ವೇಳೆ ಚಾಲಕನೊಬ್ಬ ಕಾರಿನ ಬಾನೆಟ್ ಏರಿ ಕುಳಿತಾಗ ಕಾರು ಚಲಾಯಿಸಿರುವ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

ನ.29ರಂದು ಬೆಳಿಗ್ಗೆ 9 ಗಂಟೆ ಸುಮಾರಿಗೆ ಈ ಘಟನೆ ನಡೆದಿದ್ದು, ತಡವಾಗಿ ಬೆಳಕಿಗೆ ಬಂದಿದೆ. ಈ ಸಂಬಂಧ ಪ್ರದೀಪ್ ಹೆರ್ಲೆ ಎಂಬುವವರು ನಗರ ಸಂಚಾರ ಪೊಲೀಸರ ಸಾಮಾಜಿಕ ಜಾಲತಾಣ ಎಕ್ಸ್ ಖಾತೆಯಲ್ಲಿ ಚಾಲಕರ ಜಗಳದ ವಿಡಿಯೋವನ್ನು ಹಂಚಿಕೊಂಡಿದ್ದು, ತಪ್ಪಿತಸ್ಥರ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಆಗ್ರಹಿಸಿದ್ದಾರೆ.

ಹೆಬ್ಬಾಳ ಮೇಲ್ಸೇತುವೆಯಲ್ಲಿ ಇನೋವಾ ಮತ್ತು ಇಟಿಯಸ್ ಕಾರು ಚಾಲಕ ನಡುವೆ ಕ್ಷುಲ್ಲಕ ಕಾರಣಕ್ಕೆ ಜಗಳ ಆರಂಭವಾಗಿದೆ. ಈ ವೇಳೆ ಆಕ್ರೋಶಗೊಂಡ ಇಟಿಯಸ್ ಕಾರು ಚಾಲಕ ತನ್ನ ಕಾರಿನಿಂದ ಕೆಳಗೆ ಇಳಿದು ಇನೋವಾ ಕಾರಿನ ಬಾನೆಟ್ ಮೇಲೆ ಕುಳಿತು ಕೂಗಾಡಲು ಮುಂದಾಗಿದ್ದಾನೆ.

ಈ ವೇಳೆ ಕೋಪೋದ್ರಿಕ್ತನಾದ ಇನೋವಾ ಕಾರು ಚಾಲಕ ಕಾರು ಸ್ಟಾರ್ಟ್ ಮಾಡಿಕೊಂಡು ಬಾನೆಟ್ ಮೇಲೆ ಇಟಿಯಸ್ ಕಾರು ಚಾಲಕ ಕುಳಿತಿದ್ದಾಗಲೇ ಸುಮಾರು ನೂರು ಮೀಟರ್ ಮುಂದಕ್ಕೆ ಕಾರು ಚಲಾಯಿಸಿದ್ದಾನೆ.

ಈ ಚಾಲಕರ ಬೀದಿ ಜಗಳ ಕಾರೊಂದರ ಡ್ಯಾಶ್ ಬೋರ್ಡ್ ಕ್ಯಾಮೆರಾದಲ್ಲಿ ಸೆರೆಯಾಗಿದೆ. ಆ ವಿಡಿಯೋ ಇದೀಗ ವೈರಲ್ ಆಗಿದೆ.