ಮೀನು ಖಾದ್ಯಕ್ಕೆ ಹೊಸ ಟೇಸ್ಟ್ ಬೇಕಾ? ಒಮ್ಮೆ ಮಾಡಿ ನೋಡಿ ತಂದೂರಿ ಪಾಂಫ್ರೆಟ್..!

ಮೀನು ಖಾದ್ಯಗಳಲ್ಲಿ ವಿಭಿನ್ನ ರುಚಿ ಸವಿಯಲು ಬಯಸುವವರು ತಂದೂರಿ ಪಾಂಫ್ರೆಟ್‌ನ್ನು ಖಂಡಿತ ಪ್ರಯತ್ನಿಸಬಹುದು. ಹೆಚ್ಚು ಸಮಯ ಅಥವಾ ಕಷ್ಟದ ತಯಾರಿ ಅಗತ್ಯವಿಲ್ಲದೆ ಮನೆಯಲ್ಲೇ ಸರಳವಾಗಿ ತಯಾರಿಸಬಹುದಾದ ಈ ಖಾದ್ಯವು ವಾರಾಂತ್ಯದ ಊಟ, ವಿಶೇಷ ಸಂದರ್ಭ ಅಥವಾ ಸಂಜೆ ತಿಂಡಿಗೆ ಅತ್ಯುತ್ತಮ ಆಯ್ಕೆಯಾಗಿದೆ.

ಬೇಕಾಗುವ ಪದಾರ್ಥಗಳು...

• ಪಾಂಫ್ರೆಟ್ ಮೀನು – 2 ಮಧ್ಯಮ ಗಾತ್ರದವು

• ದಪ್ಪ ಮೊಸರು – 3 ಚಮಚ

• ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ – 1 ಚಮಚ

• ಖಾರದ ಪುಡಿ – 1 ಚಮಚ

• ಕಾಶ್ಮೀರಿ ಮೆಣಸಿನ ಪುಡಿ – 1 ಚಮಚ

• ಅರಿಶಿನ ಪುಡಿ – ½ ಚಮಚ

• ಧನಿಯಾ ಪುಡಿ – 1 ಚಮಚ

• ಜೀರಿಗೆ ಪುಡಿ – ½ ಚಮಚ

• ಗರಂ ಮಸಾಲೆ – ½ ಚಮಚ

• ನಿಂಬೆಹಣ್ಣಿನ ರಸ – 1 ಚಮಚ

• ಕಡಲೆ ಹಿಟ್ಟು – 1 ಚಮಚ

• ಎಣ್ಣೆ – 1–2 ಚಮಚ

• ಉಪ್ಪು – ರುಚಿಗೆ ತಕ್ಕಷ್ಟು

• ಕಸೂರಿ ಮೆಂತೆ – ½ ಚಮಚ

• ಚಾಟ್ ಮಸಾಲೆ – ಸ್ವಲ್ಪ

• ಬೆಣ್ಣೆ – 1 ಚಮಚ

ಮಾಡುವ ವಿಧಾನ...

• ಮೊದಲು ಪಾಂಫ್ರೆಟ್ ಮೀನುಗಳನ್ನು ಚೆನ್ನಾಗಿ ತೊಳೆದು ಸ್ವಚ್ಛಗೊಳಿಸಿ. ಮೀನಿನ ಎರಡೂ ಬದಿಗಳಲ್ಲಿ ಚಾಕುವಿನಿಂದ ಲಘುವಾಗಿ ಗೆರೆಗಳನ್ನು ಹಾಕಿ. ಇದರಿಂದ ಮಸಾಲೆ ಒಳಗೆ ಚೆನ್ನಾಗಿ ಸೇರಿಕೊಳ್ಳುತ್ತದೆ.

• ಒಂದು ಪಾತ್ರೆಯಲ್ಲಿ ದಪ್ಪ ಮೊಸರು, ಶುಂಠಿ-ಬೆಳ್ಳುಳ್ಳಿ ಪೇಸ್ಟ್, ಖಾರದ ಪುಡಿ, ಕಾಶ್ಮೀರಿ ಮೆಣಸಿನ ಪುಡಿ, ಅರಿಶಿನ, ದನಿಯಾ ಪುಡಿ, ಜೀರಿಗೆ ಪುಡಿ, ಗರಂ ಮಸಾಲೆ, ನಿಂಬೆಹಣ್ಣಿನ ರಸ ಮತ್ತು ಉಪ್ಪನ್ನು ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿ.

• ಇದಕ್ಕೆ ಕಡಲೆ ಹಿಟ್ಟು, ಕಸೂರಿ ಮೇಥಿ ಮತ್ತು ಒಂದು ಟೇಬಲ್ ಸ್ಪೂನ್ ಎಣ್ಣೆ ಸೇರಿಸಿ ಗಟ್ಟಿಯಾದ ಮಸಾಲೆ ತಯಾರಿಸಿಕೊಳ್ಳಿ.

• ತಯಾರಿಸಿದ ಮಸಾಲೆಯನ್ನು ಮೀನಿನ ಎರಡೂ ಬದಿಗಳಿಗೆ ಹಾಗೂ ಗೆರೆಗಳ ಒಳಗೂ ಚೆನ್ನಾಗಿ ಹಚ್ಚಿ. ಕನಿಷ್ಠ 30 ನಿಮಿಷಗಳ ಕಾಲ ಮ್ಯಾರಿನೇಟ್ ಮಾಡಲು ಬಿಡಿ. ಹೆಚ್ಚು ರುಚಿ ಬೇಕಿದ್ದರೆ 2 ಗಂಟೆಗಳವರೆಗೆ ಫ್ರಿಜ್‌ನಲ್ಲಿ ಇಡಬಹುದು.

• ನಂತರ ತವಾ ಬಿಸಿ ಮಾಡಿ ಸ್ವಲ್ಪ ಎಣ್ಣೆ ಅಥವಾ ಬೆಣ್ಣೆ ಸವರಿ. ಮ್ಯಾರಿನೇಟ್ ಮಾಡಿದ ಪಾಂಫ್ರೆಟ್‌ಗಳನ್ನು ತವಾ ಮೇಲೆ ಇಟ್ಟು ಮಧ್ಯಮ ಉರಿಯಲ್ಲಿ ಬೇಯಿಸಿ. ಒಂದು ಬದಿ ಹೊಂಬಣ್ಣಕ್ಕೆ ತಿರುಗಿದ ನಂತರ ನಿಧಾನವಾಗಿ ತಿರುಗಿಸಿ ಮತ್ತೊಂದು ಬದಿಯನ್ನೂ ಬೇಯಿಸಿ.

• ಮೀನು ಚೆನ್ನಾಗಿ ಬೆಂದು ಹೊರಭಾಗದಲ್ಲಿ ಮಸಾಲೆ ಗರಿಗರಿಯಾಗುವವರೆಗೆ ತವಾ ಮೇಲೆ ಹುರಿಯಿರಿ. ಬೇಕಿದ್ದರೆ ಕೊನೆಯಲ್ಲಿ ಸ್ವಲ್ಪ ಬೆಣ್ಣೆ ಸವರಿ 1–2 ನಿಮಿಷ ಹುರಿದರೆ ತಂದುರಿ ಶೈಲಿಯ ಪರಿಮಳ ಬರುತ್ತದೆ.

• ಬಿಸಿ ಬಿಸಿಯಾದ ತಂದೂರಿ ಪಾಂಫ್ರೆಟ್ ಅನ್ನು ಈರುಳ್ಳಿ ಉಂಗುರಗಳು, ನಿಂಬೆಹಣ್ಣಿನ ತುಂಡುಗಳು ಮತ್ತು ಪುದೀನಾ-ಕೊತ್ತಂಬರಿ ಚಟ್ನಿಯೊಂದಿಗೆ ಸವಿಯಿರಿ.

ಟಿಪ್ಸ್...

• ಮೀನನ್ನು ಮ್ಯಾರಿನೇಟ್ ಮಾಡುವ ಮೊದಲು ಸ್ವಲ್ಪ ಉಪ್ಪು ಮತ್ತು ನಿಂಬೆಹಣ್ಣಿನ ರಸ ಹಚ್ಚಿ 10 ನಿಮಿಷ ಇಟ್ಟರೆ ರುಚಿ ಚೆನ್ನಾಗಿ ಒಳಗೆ ಸೇರುತ್ತದೆ.

• ತವಾ ಮೇಲೆ ಮೀನು ಬೇಯಿಸುವಾಗ ಹೆಚ್ಚಿನ ಉರಿ ಬಳಸಬೇಡಿ; ಮಧ್ಯಮ ಉರಿಯಲ್ಲಿ ನಿಧಾನವಾಗಿ ಬೇಯಿಸಿದರೆ ಮೀನು ಒಣಗದೆ ಮೃದುವಾಗಿ ಉಳಿಯುತ್ತದೆ.