ನೂಡಲ್ಸ್‌ಗಿಂತಲೂ ಟೇಸ್ಟಿ; ಉಳಿದ ಚಪಾತಿಯಿಂದ 10 ನಿಮಿಷದಲ್ಲಿ ಮಾಡಿ ಈ ಸುಲಭ ರೆಸಿಪಿ..!

ಮನೆಯಲ್ಲಿ ಉಳಿದಿರುವ ಚಪಾತಿಯನ್ನು ಏನು ಮಾಡಬೇಕು ಎಂದು ಯೋಚಿಸುತ್ತಿದ್ದೀರಾ? ಅದನ್ನು ಎಸೆಯುವ ಬದಲು ಮಕ್ಕಳಿಂದ ಹಿಡಿದು ದೊಡ್ಡವರವರೆಗೂ ಇಷ್ಟಪಡುವ ಚಪಾತಿ ನೂಡಲ್ಸ್ ಮಾಡಿ ಸವಿಯಬಹುದು.

ನೂಡಲ್ಸ್‌ನ ರುಚಿಯನ್ನು ನೀಡುವ ಈ ಸುಲಭ ರೆಸಿಪಿ ಆರೋಗ್ಯಕರವೂ ಆಗಿದ್ದು, ಕೇವಲ 10–15 ನಿಮಿಷಗಳಲ್ಲಿ ತಯಾರಿಸಬಹುದು. ಬೆಳಗಿನ ಉಪಾಹಾರ, ಸಂಜೆ ತಿಂಡಿ ಅಥವಾ ಮಕ್ಕಳ ಟಿಫಿನ್‌ ಬಾಕ್ಸ್‌ಗೆ ಇದು ಅತ್ಯುತ್ತಮ ಆಯ್ಕೆಯಾಗಿದೆ.

ಬೇಕಾಗುವ ಪದಾರ್ಥಗಳು...

• ಉಳಿದಿರುವ ಚಪಾತಿ – 4

• ಈರುಳ್ಳಿ – 1 (ಉದ್ದವಾಗಿ ಕತ್ತರಿಸಿದ್ದು)

• ಕ್ಯಾರೆಟ್ – 1 (ಉದ್ದವಾಗಿ ಕತ್ತರಿಸಿದ್ದು)

• ಕ್ಯಾಪ್ಸಿಕಂ – 1 (ಉದ್ದವಾಗಿ ಕತ್ತರಿಸಿದ್ದು)

• ಎಲೆಕೋಸು – 1 ಕಪ್ (ಸಣ್ಣದಾಗಿ ಹೆಚ್ಚಿದ್ದು)

• ಹಸಿಮೆಣಸಿನಕಾಯಿ – 2 (ಉದ್ದವಾಗಿ ಸೀಳಿದ್ದು)

• ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ – 1 ಚಮಚ

• ಟೊಮೇಟೊ ಸಾಸ್ – 2 ಚಮಚ

• ಸೋಯಾ ಸಾಸ್ – 1 ಚಮಚ

• ರೆಡ್ ಸಾಸ್ – 1 ಚಮಚ (ಐಚ್ಛಿಕ)

• ಕಾಳುಮೆಣಸಿನ ಪುಡಿ – ½ ಚಮಚ

• ಉಪ್ಪು – ರುಚಿಗೆ ತಕ್ಕಷ್ಟು

• ಎಣ್ಣೆ – 2 ಚಮಚ

• ಕೊತ್ತಂಬರಿ ಸೊಪ್ಪು – ಸ್ವಲ್ಪ

• ಸ್ಪ್ರಿಂಗ್ ಆನಿಯನ್ – ಅಲಂಕಾರಕ್ಕೆ (ಐಚ್ಛಿಕ)

ಮಾಡುವ ವಿಧಾನ...

• ಮೊದಲು ಚಪಾತಿಯನ್ನು ಒಂದರ ಮೇಲೊಂದು ಇಟ್ಟು ರೋಲ್ ಮಾಡಿ, ನೂಡಲ್ಸ್‌ನಂತೆ ಉದ್ದವಾದ ತೆಳುವಾದ ಪಟ್ಟಿಗಳಾಗಿ ಕತ್ತರಿಸಿ.

• ಒಂದು ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿ, ಹಸಿಮೆಣಸಿನಕಾಯಿ ಮತ್ತು ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಹಾಕಿ ಸ್ವಲ್ಪ ಹುರಿಯಿರಿ.

• ನಂತರ ಈರುಳ್ಳಿ ಸೇರಿಸಿ ಬಂಗಾರದ ಬಣ್ಣ ಬರುವವರೆಗೆ ಹುರಿಯಿರಿ.

• ಈಗ ಕ್ಯಾರೆಟ್, ಕ್ಯಾಪ್ಸಿಕಂ ಹಾಗೂ ಎಲೆಕೋಸು ಸೇರಿಸಿ ಹೆಚ್ಚಿನ ಉರಿಯಲ್ಲಿ 2–3 ನಿಮಿಷ ಹುರಿಯಿರಿ. ತರಕಾರಿಗಳು ಸ್ವಲ್ಪ ಗರಿಗರಿಯಾಗಿದ್ದರೆ ರುಚಿ ಹೆಚ್ಚಾಗುತ್ತದೆ.

• ಬಳಿಕ ಟೊಮೇಟೊ ಸಾಸ್, ಸೋಯಾ ಸಾಸ್, ರೆಡ್ ಸಾಸ್, ಕಾಳು ಮೆಣಸಿನ ಪುಡಿ ಹಾಗೂ ಉಪ್ಪು ಸೇರಿಸಿ ಚೆನ್ನಾಗಿ ಕಲಸಿ.

• ಈಗ ಕತ್ತರಿಸಿದ ಚಪಾತಿ ತುಂಡುಗಳನ್ನು ಸೇರಿಸಿ ಸಾಸ್ ಮತ್ತು ತರಕಾರಿಗಳೊಂದಿಗೆ ಚೆನ್ನಾಗಿ ಮಿಶ್ರಣ ಮಾಡಿ.

• ಮಧ್ಯಮ ಉರಿಯಲ್ಲಿ 2–3 ನಿಮಿಷ ಬೇಯಿಸಿ, ಕೊನೆಯಲ್ಲಿ ಕೊತ್ತಂಬರಿ ಸೊಪ್ಪು ಅಥವಾ ಸ್ಪ್ರಿಂಗ್ ಓನಿಯನ್ ಹಾಕಿ, ಮಿಶ್ರಣ ಮಾಡಿ.

• ಬಿಸಿ ಬಿಸಿಯಾಗಿ ಟೊಮೇಟೊ ಸಾಸ್ ಜೊತೆಗೆ ಬಡಿಸಿದರೆ ರುಚಿಕರವಾದ ಚಪಾತಿ ನೂಡಲ್ಸ್ ಸವಿಯಲು ಸಿದ್ಧ.

ಟಿಪ್ಸ್...

• ಹೆಚ್ಚು ಖಾರ ಬೇಕಾದರೆ ಹಸಿಮೆಣಸಿನಕಾಯಿ ಅಥವಾ ಚಿಲ್ಲಿ ಸಾಸ್ ಪ್ರಮಾಣ ಹೆಚ್ಚಿಸಬಹುದು.

• ಸ್ವೀಟ್ ಕಾರ್ನ್, ಬೀನ್ಸ್, ಅಣಬೆ ಅಥವಾ ಪನೀರ್ ಸೇರಿಸಿದರೆ ಇನ್ನಷ್ಟು ಪೌಷ್ಟಿಕವಾಗುತ್ತದೆ.

• ಚಪಾತಿ ಸ್ವಲ್ಪ ಒಣಗಿದ್ದರೆ ರೆಸಿಪಿಗೆ ಇನ್ನೂ ಉತ್ತಮವಾಗಿರುತ್ತದೆ.

• ಮಕ್ಕಳಿಗಾಗಿ ತಯಾರಿಸುವಾಗ ಖಾರದ ಪ್ರಮಾಣವನ್ನು ಕಡಿಮೆ ಇಡಿ.