ಯುಜ್ವೇಂದ್ರ ಚಾಹಲ್ ಬೌಲ್ ಮಾಡದ ಬಗ್ಗೆ ಪ್ರತಿಕ್ರಿಯಿಸಲು ಶ್ರೇಯಸ್ ಅಯ್ಯರ್ ನಿರಾಕರಣೆ; ಮೌನ ಮುರಿದ ಪಂಜಾಬ್ ಕಿಂಗ್ಸ್ ಕೋಚ್!

ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2026ರ ಆರಂಭದಲ್ಲಿ ಎಲ್ಲ ಪಂದ್ಯಗಳಲ್ಲಿ ಗೆದ್ದು ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದ್ದ ಪಂಜಾಬ್ ಕಿಂಗ್ಸ್ (PBKS) ಇದೀಗ ಸತತ ನಾಲ್ಕು ಪಂದ್ಯಗಳಲ್ಲಿ ಸೋಲು ಕಾಣುವ ಮೂಲಕ ಅಂಕಪಟ್ಟಿಯಲ್ಲಿ 4ನೇ ಸ್ಥಾನವನ್ನು ಕಾಯ್ದುಕೊಂಡಿದೆ. ಸೋಮವಾರ ಡೆಲ್ಲಿ ಕ್ಯಾಪಿಟಲ್ಸ್ (DC) ವಿರುದ್ಧ ನಡೆದ ಪಂದ್ಯದಲ್ಲಿನ ಸೋಲು ಈ ಆವೃತ್ತಿಯ ಅವರ ಸತತ ನಾಲ್ಕನೇ ಸೋಲಾಗಿದೆ. ನಿರ್ಣಾಯಕ ಪಂದ್ಯದಲ್ಲಿ ಪಂಜಾಬ್ ಕಿಂಗ್ಸ್ ತಂಡವು ಪ್ರಮುಖ ಬೌಲರ್ ಆದ ಯುಜ್ವೇಂದ್ರ ಚಾಹಲ್ ಅವರನ್ನು ಬಳಸದ ತಂಡದ ಕಾರ್ಯತಂತ್ರದ ಇದೀಗ ವ್ಯಾಪಕ ಚರ್ಚೆಗೆ ಕಾರಣವಾಗಿದೆ. ಪಿಬಿಕೆಎಸ್ ಫ್ರಾಂಚೈಸಿಯ ಸ್ಪಿನ್ ಬೌಲಿಂಗ್ ತರಬೇತುದಾರ ಸಾಯಿರಾಜ್ ಬಹುತುಲೆ, ಈ ನಿರ್ಧಾರವನ್ನು ಸಮರ್ಥಿಸಿಕೊಂಡಿದ್ದಾರೆ.

ಮೊದಲ ಏಳು ಪಂದ್ಯಗಳಲ್ಲಿ ಅಜೇಯರಾಗಿ ಉಳಿದ ನಂತರ, ಪಿಬಿಕೆಎಸ್ ಸತತ ನಾಲ್ಕು ಪಂದ್ಯಗಳಲ್ಲಿ ಸೋತಿದೆ. ಇದು ತಂಡದ ಪ್ಲೇಆಫ್ ಅರ್ಹತೆಯ ನಿರೀಕ್ಷೆಯನ್ನು ಅಪಾಯಕ್ಕೆ ಸಿಲುಕಿಸಿದೆ. ತಂಡದ ಪ್ಲೇಯಿಂಗ್ XI ನಲ್ಲಿ ಸ್ಥಾನ ಪಡೆದಿದ್ದ ಚಾಹಲ್, ಡೆಲ್ಲಿ ವಿರುದ್ಧ ಒಂದೇ ಒಂದು ಓವರ್ ಬೌಲ್ ಮಾಡಲಿಲ್ಲ. ಇದೀಗ ಅಭಿಮಾನಿಗಳು ಮತ್ತು ಪಂಡಿತರು ತಲೆ ಕೆರೆದುಕೊಳ್ಳುವಂತೆ ಮಾಡಿದೆ.

ಪಂದ್ಯದಲ್ಲಿ ವೇಗದ ಬೌಲಿಂಗ್ ತಂತ್ರದ ಬಗ್ಗೆ ಬಹುತುಲೆ ಅವರನ್ನು ಕೇಳಿದಾಗ, 'ಟೈಮ್-ಔಟ್ ಸಮಯದಲ್ಲಿ (ಸ್ಪಿನ್ನರ್‌ಗಳನ್ನು ಬೌಲಿಂಗ್ ಮಾಡುವ ಬಗ್ಗೆ) ಖಂಡಿತವಾಗಿಯೂ ಒಂದು ಆಲೋಚನೆ ಇತ್ತು. ಆದರೆ, ಚೆಂಡು ಸೀಮಿಂಗ್ ಆಗಿತ್ತು ಮತ್ತು ಪರಿಸ್ಥಿತಿಗಳು ವೇಗದ ಬೌಲರ್‌ಗಳಿಗೆ ಸೂಕ್ತವಾಗಿದ್ದವು ಎಂದು ನಾನು ಭಾವಿಸುತ್ತೇನೆ. ಆದ್ದರಿಂದ ವಿಕೆಟ್‌ಗಳನ್ನು ಪಡೆಯಲು ವೇಗದ ಬೌಲರ್‌ಗಳೊಂದಿಗೆ ಮುಂದುವರಿಯುವ ನಿರ್ಧಾರ ತೆಗೆದುಕೊಳ್ಳಲಾಯಿತು. ನಾವು ಅದನ್ನು ಮೊದಲೇ ಮಾಡಿದ್ದೇವೆ. ಆದರೆ ಒಂದು ಜೊತೆಯಾಟವು ನಮ್ಮಿಂದ ಪಂದ್ಯವನ್ನು ಕಸಿದುಕೊಂಡಿತು ಎಂದು ನಾನು ಭಾವಿಸುತ್ತೇನೆ' ಎಂದರು.

ಉಳಿದ ಪಂದ್ಯಗಳನ್ನು ಗೆಲ್ಲಲು ಮತ್ತು ಲೀಗ್ ಹಂತವನ್ನು ಉತ್ತಮ ಪ್ರದರ್ಶನದೊಂದಿಗೆ ಮುಗಿಸಲು ತಂಡದಲ್ಲಿ ಯಾವುದೇ ಪ್ರಮುಖ ಬದಲಾವಣೆಗಳನ್ನು ಮಾಡಬಹುದೇ ಎಂದು ಕೇಳಿದಾಗ, ಬಹುತುಲೆ ಅದನ್ನು ತಳ್ಳಿಹಾಕಿದರು.

'ಚೆನ್ನಾಗಿ ಆಡುತ್ತಿರುವ ತಂಡ ಇದು. ಹೌದು, ನಾವು ಕೆಲವು ಪಂದ್ಯಗಳನ್ನು ಸೋತಿದ್ದೇವೆ. ಆದರೆ, ನಾವು ಕೆಲವು ಕ್ಷೇತ್ರಗಳ ಬಗ್ಗೆ ಮಾತ್ರ ಚಿಂತಿಸುತ್ತೇವೆ. ಎಲ್ಲರೂ ಪ್ರದರ್ಶನ ನೀಡುತ್ತಿರುವುದರಿಂದ ಯಾವುದೇ ಪ್ರಮುಖ ಬದಲಾವಣೆಗಳಾಗುವುದಿಲ್ಲ. ಆದರೆ, ನಾವು ಖಂಡಿತವಾಗಿಯೂ ಅದನ್ನು ಪರಿಶೀಲಿಸುತ್ತೇವೆ ಮತ್ತು ತಂಡಕ್ಕಾಗಿ ಹೇಗೆ ಬದಲಿಸಬಹುದು ಎಂದು ನೋಡುತ್ತೇವೆ' ಎಂದರು.

ಸೋಲಿನ ಹಿಂದಿನ ಕಾರಣದ ಬಗ್ಗೆ ಕೇಳಿದಾಗ, ಪಿಬಿಕೆಎಸ್ ಸ್ಪಿನ್ ಬೌಲಿಂಗ್ ತರಬೇತುದಾರ ನಾಯಕ ಶ್ರೇಯಸ್ ಅಯ್ಯರ್ ಅವರ ಮಾತುಗಳನ್ನು ಪ್ರತಿಧ್ವನಿಸಿದರು ಮತ್ತು ತಮ್ಮ ಫೀಲ್ಡರ್‌ಗಳು ಮತ್ತು ಬೌಲರ್‌ಗಳನ್ನು ದೂರಿದರು.

'ಖಂಡಿತವಾಗಿಯೂ, ನಾವು ನಮ್ಮ ಬೌಲಿಂಗ್‌ನ ಕೆಲವು ಹಂತಗಳನ್ನು ಮತ್ತು ಫೀಲ್ಡಿಂಗ್ ಭಾಗವನ್ನು ಪರಿಶೀಲಿಸುತ್ತೇವೆ. ದುರದೃಷ್ಟವಶಾತ್, ನಾವು ನಿರ್ಣಾಯಕ ಸಮಯದಲ್ಲಿಯೂ ಮತ್ತೆ ಕೆಲವು ಕ್ಯಾಚ್‌ಗಳನ್ನು ಕೈಬಿಟ್ಟಿದ್ದೇವೆ. ಆದ್ದರಿಂದ ಅದು ಬಹಳ ಮುಖ್ಯವಾಗಿತ್ತು. ಮತ್ತು ಆ ಬಗ್ಗೆ ನಾವು ಯೋಚಿಸುತ್ತೇವೆ. ಆದರೆ ಅದನ್ನೇ ಚಿಂತಿಸುತ್ತಾ ಕೂರಲು ನಮಗೆ ಸಮಯವಿಲ್ಲ; ನಾವು ಮುಂದುವರಿಯಬೇಕು. ನಿರ್ಣಾಯಕ ಸಮಯದಲ್ಲಿ, ನಾವು ಕ್ಯಾಚ್‌ಗಳನ್ನು ಕೈಬಿಡುತ್ತಿದ್ದೇವೆ. ದುರದೃಷ್ಟವಶಾತ್ ಇದು ನಾವು ಪಡೆಯುತ್ತಿದ್ದ ಮೊಮೆಂಟಮ್ ಅನ್ನು ಮುರಿಯುತ್ತಿದೆ. ಏಕೆಂದರೆ, ನಾವು ಎರಡು ಕ್ಯಾಚ್‌ಗಳನ್ನು ತೆಗೆದುಕೊಂಡಿದ್ದರೆ, ಅವರು ಗುರಿ ತಲುಪುತ್ತಿರಲಿಲ್ಲ; ಅದು ಅವರಿಗೆ ತುಂಬಾ ಕಷ್ಟಕರವಾಗುತ್ತಿತ್ತು ಮತ್ತು ನಾವು 20 ರನ್‌ಗಳಿಂದ ಪಂದ್ಯವನ್ನು ಗೆದ್ದಿರಬಹುದಾಗಿತ್ತು' ಎಂದು ಅವರು ಪ್ರತಿಪಾದಿಸಿದರು.