ಪಾಕ್ ಸ್ಪಿನ್ನರ್ ಅಬ್ರಾರ್ ಅಹ್ಮದ್ ವಿವಾದದ ನಂತರ, CSK ವಿರುದ್ಧ ನ್ಯಾಯಾಲಯದ ಮೆಟ್ಟಿಲೇರಿದ ಸನ್ ಟಿವಿ!

ಸನ್‌ರೈಸರ್ಸ್ ಹೈದರಾಬಾದ್ (SRH) ಮತ್ತು ಅದರ ಮಾಲೀಕರಾದ ಕಾವ್ಯಾ ಮಾರನ್ ಇದೀಗ ಸಾಕಷ್ಟು ಸುದ್ದಿಯಲ್ಲಿದ್ದಾರೆ. ಸನ್‌ರೈಸರ್ಸ್ ಲೀಡ್ಸ್ ತಂಡವು ಪಾಕಿಸ್ತಾನದ ಸ್ಪಿನ್ನರ್ ಅಬ್ರಾರ್ ಅಹ್ಮದ್ ಅವರನ್ನು ದಿ ಹಂಡ್ರೆಡ್ ಹರಾಜಿನಲ್ಲಿ ಖರೀದಿಸಿದ ನಂತರ ಫ್ರಾಂಚೈಸಿ ವಿರುದ್ಧ ಈಗಾಗಲೇ ಸಾಕಷ್ಟು ಟೀಕೆ ಕೇಳಿಬಂದಿದೆ. ಇದರ ಬೆನ್ನಲ್ಲೇ, ಐಪಿಎಲ್ 2026ರ ಆರಂಭಕ್ಕೂ ಮುನ್ನ ಚೆನ್ನೈ ಸೂಪರ್ ಕಿಂಗ್ಸ್ (CSK) ವಿರುದ್ಧ ಸನ್ ಟಿವಿ ಮದ್ರಾಸ್ ಹೈಕೋರ್ಟ್‌ನಲ್ಲಿ ಕಾನೂನು ಹೋರಾಟ ಪ್ರಾರಂಭಿಸಿದೆ.

ದಿ ಇಂಡಿಯನ್ ಎಕ್ಸ್‌ಪ್ರೆಸ್ ವರದಿ ಪ್ರಕಾರ, ಐಪಿಎಲ್ 2026ಕ್ಕೂ ಮೊದಲು ಬಿಡುಗಡೆಯಾದ ಪ್ರಚಾರದ ವಿಡಿಯೋದಲ್ಲಿ ರಜನಿಕಾಂತ್ ನಟನೆಯ ಜೈಲರ್, ಜೈಲರ್ 2 ಮತ್ತು ಕೂಲಿ ಚಿತ್ರದ ಹಾಡುಗಳು, ಸಂಭಾಷಣೆಗಳು ಮತ್ತು ಹಿನ್ನೆಲೆ ಸಂಗೀತದ ಅಂಶಗಳನ್ನು ಬಳಸಿಕೊಂಡಿದ್ದಕ್ಕಾಗಿ ಸನ್ ಟಿವಿ ನೆಟ್‌ವರ್ಕ್ ಲಿಮಿಟೆಡ್ ಸಿಎಸ್‌ಕೆ ವಿರುದ್ಧ ಕೃತಿಸ್ವಾಮ್ಯ ಉಲ್ಲಂಘನೆ ಮೊಕದ್ದಮೆ ಹೂಡಿದೆ.

ಮಾರ್ಚ್ 1 ರಂದು ಸಿಎಸ್‌ಕೆ ತನ್ನ ಹೊಸ ಜೆರ್ಸಿಯನ್ನು ಅನಾವರಣಗೊಳಿಸಲು ಬಿಡುಗಡೆ ಮಾಡಿದ ಈ ವೀಡಿಯೊದಲ್ಲಿ ರಜನಿಕಾಂತ್ ಅವರ ಚಿತ್ರಗಳಲ್ಲಿನ ಆಡಿಯೊ ಬಳಸಲಾಗಿದೆ. ಇದು ತ್ವರಿತವಾಗಿ ಆನ್‌ಲೈನ್‌ನಲ್ಲಿ ಗಮನ ಸೆಳೆಯಿತು. ಆದರೆ, ನಂತರ ಅದನ್ನು ತೆಗೆದುಹಾಕಲಾಯಿತು ಮತ್ತು ಧ್ವನಿಯಲ್ಲಿ ಬದಲಾವಣೆಗಳೊಂದಿಗೆ ರೀ-ಅಪ್‌ಲೋಡ್ ಮಾಡಲಾಯಿತು.

ಇಂಡಿಯನ್ ಎಕ್ಸ್‌ಪ್ರೆಸ್‌ ವರದಿ ಪ್ರಕಾರ, ಸನ್ ಟಿವಿ ತನ್ನ ದೂರಿನಲ್ಲಿ, ಚಲನಚಿತ್ರಗಳು ತನ್ನ ನಿರ್ಮಾಣಗಳಾಗಿವೆ ಮತ್ತು ಸಂಗೀತ ಸಂಯೋಜಕ ಅನಿರುದ್ಧ್ ರವಿಚಂದರ್ ಲಿಖಿತ ಒಪ್ಪಂದದ ಮೂಲಕ ಕಂಪನಿಗೆ ಎಲ್ಲ ಹಕ್ಕುಗಳನ್ನು ವಹಿಸಿದ್ದಾರೆ. ಇನ್‌ಸ್ಟಾಗ್ರಾಂ, ಎಕ್ಸ್, ಯೂಟ್ಯೂಬ್ ಮತ್ತು ಫೇಸ್‌ಬುಕ್ ಸೇರಿದಂತೆ ಬಹು ಸಾಮಾಜಿಕ ಮಾಧ್ಯಮ ವೇದಿಕೆಗಳಲ್ಲಿ ಸಿಎಸ್‌ಕೆ ಅನುಮತಿಯಿಲ್ಲದೆ ಕಾಪಿರೈಟ್ ವಿಷಯವನ್ನು ಬಳಸಿದೆ ಎಂದು ಆರೋಪಿಸಿದೆ.

ಈ ವಿಡಿಯೋವನ್ನು ವಾಣಿಜ್ಯ ಲಾಭಕ್ಕೆ ಬಳಸಿಕೊಳ್ಳಲಾಗಿದೆ. ಸಿಎಸ್‌ಕೆಯ ಐಪಿಎಲ್ 2026ರ ಜೆರ್ಸಿ ಮತ್ತು ಸರಕುಗಳನ್ನು ಮಾರಾಟ ಮಾಡಲು ಬಳಸಲಾಗಿದೆ. ಪ್ರತಿ ಜೆರ್ಸಿಯನ್ನು ₹2,399ಕ್ಕೆ ಮಾರಾಟ ಮಾಡಲಾಗುತ್ತಿದೆ ಮತ್ತು ಚೆನ್ನೈ ಮೂಲದ ಫ್ರಾಂಚೈಸಿಯ ಪ್ರಚಾರದಲ್ಲಿ ರಜನಿಕಾಂತ್ ಚಿತ್ರದ ಆಡಿಯೋ ಬಳಸುವುದರಿಂದ ಸ್ಪಷ್ಟ ಪ್ರಚಾರ ಮೌಲ್ಯ ಸಿಕ್ಕಿದಂತಾಗಿದೆ ಎಂದು ಕಂಪನಿ ನ್ಯಾಯಾಲಯಕ್ಕೆ ತಿಳಿಸಿದೆ.

ಸಿಎಸ್‌ಕೆ ತನ್ನ ಕೃತಿಸ್ವಾಮ್ಯ ಹೊಂದಿರುವ ಕೃತಿಗಳನ್ನು ಬಳಸದಂತೆ ತಡೆಯುವಂತೆ ಮತ್ತು ಅಂತಹ ಅನಧಿಕೃತ ಬಳಕೆಯ ಮೂಲಕ ಗಳಿಸಲಾಗಿದೆ ಎನ್ನಲಾದ ಹಣದ ಬಗ್ಗೆ ವಿವರಗಳನ್ನು ನೀಡುವಂತೆ ಸನ್ ಟಿವಿ ನ್ಯಾಯಾಲಯವನ್ನು ಕೋರಿದೆ.

ವಿಚಾರಣೆಯ ಸಮಯದಲ್ಲಿ, ಸನ್ ಟಿವಿ ಪರವಾಗಿ ಹಾಜರಾದ ಹಿರಿಯ ವಕೀಲ ಜೆ. ರವೀಂದ್ರನ್, ಮಾರ್ಚ್ 1 ರಂದು ಅಧಿಕೃತ ಇಮೇಲ್ ಕಳುಹಿಸಿದ ನಂತರ ಸಿಎಸ್‌ಕೆ ಈಗಾಗಲೇ ಈ ವಿಷಯವನ್ನು ಬಳಸುವುದನ್ನು ನಿಲ್ಲಿಸಿದೆ ಎಂದು ಹೇಳಿದರು.

ಸಿಎಸ್‌ಕೆಯನ್ನು ಪ್ರತಿನಿಧಿಸಿದ ಹಿರಿಯ ವಕೀಲ ಪಿ.ಎಸ್. ರಾಮನ್, ಫ್ರಾಂಚೈಸಿ ನಿಜವಾಗಿಯೂ ಆಡಿಯೋವನ್ನು ಬಳಸುವುದನ್ನು ನಿಲ್ಲಿಸಿದೆ ಮತ್ತು ಭವಿಷ್ಯದಲ್ಲಿ ಅಂತಹ ವಿಷಯವನ್ನು ಮತ್ತೆ ಬಳಸಲು ಬಯಸಿದರೆ ಅನುಮತಿ ಪಡೆಯುತ್ತದೆ ಎಂದು ನ್ಯಾಯಾಲಯಕ್ಕೆ ಹೇಳಿದರು.