ಬೆಸ್ಟ್ ಕ್ರಿಕೆಟಿಂಗ್ ಬ್ರೈನ್ ಇರುವುದು ಯಾರಿಗೆ?; ಎಂಎಸ್ ಧೋನಿ ಖಂಡಿತಾ ಅಲ್ಲ, RCB ಮಾಜಿ ಮೆಂಟರ್ ಹೆಸರೇಳಿದ ಮೊಯಿನ್ ಅಲಿ!

ಎಂಎಸ್ ಧೋನಿ ಅವರನ್ನು ಕ್ರಿಕೆಟ್ ಜಗತ್ತಿನ ಅತ್ಯುತ್ತಮ ತಂತ್ರಗಾರರಲ್ಲಿ ಒಬ್ಬರು ಎಂದು ಪರಿಗಣಿಸಲಾಗುತ್ತದೆ; ಕೆಲವರ ಪ್ರಕಾರ ಅವರೇ ಈ ವಿಷಯದಲ್ಲಿ ಅತ್ಯುತ್ತಮರು. 2007ರ ಟಿ20 ವಿಶ್ವಕಪ್ ಫೈನಲ್‌ನಲ್ಲಿ ಅಂತಿಮ ಓವರ್ ಅನ್ನು ಜೋಗಿಂದರ್ ಶರ್ಮಾ ಅವರಿಗೆ ವಹಿಸಿ ಅವರಿಂದ ನಿರೀಕ್ಷಿತ ಫಲಿತಾಂಶವನ್ನು ಪಡೆದುಕೊಂಡಿದ್ದಿರಲಿ ಅಥವಾ ಅತ್ಯಂತ ಚಾಣಾಕ್ಷತನದ ರನ್-ಔಟ್ ಹಾಗೂ ಸ್ಟಂಪಿಂಗ್‌ಗಳನ್ನು ಮಾಡಿದ್ದಿರಲಿ- ಭಾರತದ ಮಾಜಿ ನಾಯಕನನ್ನು ಈ ಕ್ರೀಡೆಯ ಅತ್ಯುತ್ತಮ ತಂತ್ರಗಾರರಲ್ಲಿ ಒಬ್ಬರೆಂದು ಏಕೆ ಕೊಂಡಾಡಲಾಗುತ್ತದೆ ಎಂಬುದಕ್ಕೆ ಹಲವಾರು ಉದಾಹರಣೆಗಳಿವೆ. ಆದಾಗ್ಯೂ, ಇಂಗ್ಲೆಂಡ್‌ನ ಮಾಜಿ ಆಲ್‌ರೌಂಡರ್ ಮೊಯಿನ್ ಅಲಿ ಅವರು ಧೋನಿ ಬದಲಿಗೆ ಭಾರತದ ಮಾಜಿ ಆಟಗಾರ ಹಾಗೂ ಸದ್ಯದ ಗುಜರಾತ್ ಟೈಟಾನ್ಸ್ ತಂಡದ ಮುಖ್ಯ ಕೋಚ್ ಆಗಿರುವ ಆಶಿಶ್ ನೆಹ್ರಾರನ್ನು ಆರಿಸಿಕೊಂಡರು.

'ಬಿಯರ್ಡ್ ಬಿಫೋರ್ ವಿಕೆಟ್' (Beard Before Wicket) ಕಾರ್ಯಕ್ರಮದಲ್ಲಿ ಮಾತನಾಡಿದ ಮೊಯಿನ್, 'ನನ್ನ ಪ್ರಕಾರ, ಕ್ರಿಕೆಟ್ ಕುರಿತಾದ ಉತ್ತಮ ತಿಳುವಳಿಕೆ ಅಥವಾ 'ಕ್ರಿಕೆಟಿಂಗ್ ಬ್ರೈನ್' (cricketing brain) ಹೊಂದಿರುವ ವ್ಯಕ್ತಿ ಎಂದರೆ ಆಟದ ಪ್ರತಿಯೊಂದು ಸನ್ನಿವೇಶದ ಬಗ್ಗೆಯೂ ಅರಿವು ಇರುವವರು. ಅಂತಹವರು ಪ್ರತಿಯೊಂದು ಸನ್ನಿವೇಶಕ್ಕೂ ಸೂಕ್ತ ಉತ್ತರ ಅಥವಾ ಸಿದ್ಧಾಂತವನ್ನು ಹೊಂದಿರುತ್ತಾರೆ. ಅವರು ಆಟದ ಎಲ್ಲ ಆಯಾಮಗಳ ಬಗ್ಗೆಯೂ ಚರ್ಚಿಸುತ್ತಾರೆ; ಉದಾಹರಣೆಗೆ, ಒಬ್ಬ ಆಟಗಾರ ಏಕೆ ಅಷ್ಟೊಂದು ಉತ್ತಮವಾಗಿಲ್ಲ ಅಥವಾ ಏಕೆ ಉತ್ತಮವಾಗಿದ್ದಾರೆ, ಈ ಸನ್ನಿವೇಶದಲ್ಲಿ ಏನು ನಡೆಯಬೇಕು ಮತ್ತು ಮುಂದೆ ಏನು ಸಂಭವಿಸಬಹುದು ಎಂಬಿತ್ಯಾದಿ ವಿಷಯಗಳ ಬಗ್ಗೆ ಅವರು ಮಾತನಾಡುತ್ತಾರೆ' ಎಂದು ಹೇಳಿದರು.

2018 ರಿಂದ 2020 ರವರೆಗಿನ ಇಂಡಿಯನ್ ಪ್ರೀಮಿಯರ್ ಲೀಗ್ (IPL)ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡದ ಪರ ಆಡಿದ್ದ ಮೊಯಿನ್, ಆ ತಂಡದಲ್ಲಿ ನೆಹ್ರಾ ಅವರು ಬೌಲಿಂಗ್ ಕೋಚ್ ಮತ್ತು ಮಾರ್ಗದರ್ಶಕ (ಮೆಂಟರ್) ಆಗಿ ಮಾಡಿದ್ದನ್ನು ಕಂಡಿದ್ದರು.

'ಆದರೆ ಅವರಲ್ಲಿ ಏನೋ ವಿಶೇಷವಿದೆ. ಆ ವಿಶೇಷತೆಯ ಹಿಂದೆ ದತ್ತಾಂಶ ಅಥವಾ ಸಾಕ್ಷ್ಯವಿರುತ್ತದೆ. ಉದಾಹರಣೆಗೆ, 'ಹಿಂದೆ ಹೀಗೆ ನಡೆದಿತ್ತು, ಆ ಘಟನೆ ಸಂಭವಿಸಿತ್ತು, ಹಾಗಾಗಿ ಈಗಲೂ ಹೀಗೆ ಆಗಬಹುದು' ಎಂಬಂತಹ ವಿಶ್ಲೇಷಣೆ ಅವರಲ್ಲಿರುತ್ತದೆ. ಹಾಗಾಗಿ ನಾನು ಹೆಸರಿಸುವ ವ್ಯಕ್ತಿ ಆಶಿಶ್ ನೆಹ್ರಾ. ಅವರು ಗುಜರಾತ್ (ಟೈಟಾನ್ಸ್) ತಂಡದ ಕೋಚ್ ಆಗಿದ್ದಾರೆ. ಆರ್‌ಸಿಬಿಯಲ್ಲಿ ಅವರು ನನ್ನೊಂದಿಗೆ ಒಂದೆರಡು ವರ್ಷಗಳ ಕಾಲ ಇದ್ದರು. ಕ್ರಿಕೆಟ್ ಕುರಿತಾದ ತಿಳುವಳಿಕೆಯ ವಿಷಯಕ್ಕೆ ಬಂದರೆ, ಅವರು ತಾವು ಏನು ಹೇಳುತ್ತಿದ್ದೇವೆ ಎಂಬ ಬಗ್ಗೆ ಸ್ಪಷ್ಟ ಅರಿವು ಹೊಂದಿರುವ ವ್ಯಕ್ತಿ. ತಂಡದ ವಾತಾವರಣವನ್ನು ಹೇಗೆ ರೂಪಿಸಬೇಕು, ಹಾಗೂ ಜನರು, ಆಟಗಾರರು ಮತ್ತು ಕೋಚ್‌ಗಳೊಂದಿಗೆ ಹೇಗೆ ವ್ಯವಹರಿಸಬೇಕು ಎಂಬುದು ಅವರಿಗೆ ಚೆನ್ನಾಗಿ ತಿಳಿದಿದೆ. ಅದ್ಭುತವಾದ ಕ್ರಿಕೆಟ್ ಪ್ರಜ್ಞೆ ಅವರಲ್ಲಿದೆ' ಎಂದು ಮೊಯಿನ್ ಹೇಳಿದರು.

ಎಡಗೈ ವೇಗದ ಬೌಲರ್ ಆಗಿದ್ದ ನೆಹ್ರಾ, ಭಾರತದ ಪರ 120 ಏಕದಿನ ಪಂದ್ಯಗಳನ್ನು ಆಡಿ 157 ವಿಕೆಟ್‌ಗಳನ್ನು ಪಡೆದಿದ್ದಾರೆ. ಅವರು 17 ಟೆಸ್ಟ್ ಮತ್ತು 27 ಟಿ20 ಅಂತಾರಾಷ್ಟ್ರೀಯ ಪಂದ್ಯಗಳನ್ನೂ ಆಡಿದ್ದು, ಕ್ರಮವಾಗಿ 44 ಮತ್ತು 34 ವಿಕೆಟ್‌ಗಳನ್ನು ಕಬಳಿಸಿದ್ದಾರೆ.

ಐಪಿಎಲ್ 2022ರ ಆವೃತ್ತಿಗಾಗಿ ಗುಜರಾತ್ ಟೈಟಾನ್ಸ್ (GT) ತಂಡದ ಮುಖ್ಯ ಕೋಚ್ ಆಗಿ ನೇಮಕಗೊಂಡ ನೆಹ್ರಾ, ತಂಡವು ತನ್ನ ಚೊಚ್ಚಲ ಆವೃತ್ತಿಯಲ್ಲೇ ಪ್ರಶಸ್ತಿ ಗೆಲ್ಲುವಂತೆ ಮುನ್ನಡೆಸಿದರು. ಅವರು ಈಗಲೂ ಗುಜರಾತ್ ಟೈಟಾನ್ಸ್ ತಂಡದೊಂದಿಗೆ ಇದೇ ಹುದ್ದೆಯನ್ನು ಮುಂದುವರಿಸಿದ್ದಾರೆ.