ಮಾಜಿ ಕ್ರಿಕೆಟಿಗ ವಸಂತ್‌ಗೆ 100ರ ಸಂಭ್ರಮ : ಶುಭಾಶಯ ಕೋರಿದ ಕ್ರಿಕೆಟ್ ದಂತಕತೆ

ಮುಂಬೈ: ಪ್ರಥಮ ದರ್ಜೆ ಕ್ರಿಕೆಟ್‌ನ ಮಾಜಿ ಆಟಗಾರ ಹಾಗೂ ಅತ್ಯಂತ ಹಿರಿಯ ವಯಸ್ಸಿನ ವಸಂತ್ ರೈಜಿ ಅವರು ಭಾನುವಾರ 100 ವಸಂತಕ್ಕೆ ಕಾಲಿಟ್ಟರು.

ವಸಂತ್ ರೈಜಿ ಬಲಗೈ ಬ್ಯಾಟ್ಸ್‌‌ಮನ್ ಆಗಿದ್ದು, 1940ರಲ್ಲಿ ಒಂಬತ್ತು ಪ್ರಥಮ ದರ್ಜೆ ಪಂದ್ಯಗಳಾಡಿ 277 ರನ್ ಗಳಿಸಿದ್ದರು. ಇವರ ವೈಯಕ್ತಿಕ ಗರಿಷ್ಠ ರನ್ 68 ರನ್. ಇತಿಹಾಸಗಾರರಾಗಿರುವ ರೈಜಿ ಅವರು 13ನೇ ವಯಸ್ಸಿನಲ್ಲಿದ್ದಾಗ ಭಾರತ ತಂಡ ದಕ್ಷಿಣ ಮುಂಬೈನ ಬಾಂಬೆ ಜಿಮ್ಖಾನ ಅಂಗಳದಲ್ಲಿ ಮೊದಲ ಟೆಸ್ಟ್‌ ಪಂದ್ಯ ಆಡಿತ್ತು. ಅಂದಿನಿಂದ ಇಲ್ಲಿಯವರೆಗೂ ಭಾರತೀಯ ಕ್ರಿಕೆಟ್‌ನ ಪಯಣವನ್ನು ವಸಂತ ರೈಜಿ ಕಣ್ತುಂಬಿಸಿಕೊಂಡಿದ್ದಾರೆ. ಇವರು ಬಾಂಬೆ (ಮುಂಬೈ) ಹಾಗೂ ಬರೋಡ ಪರ ಪ್ರಥಮ ದರ್ಜೆ ಕ್ರಿಕೆಟ್ ಆಡಿದ್ದಾರೆ.

ಕ್ರಿಕೆಟ್ ದಂತಕತೆ ಸಚಿನ್ ತೆಂಡೂಲ್ಕರ್ ಹಾಗೂ ಆಸ್ಟ್ರೇಲಿಯಾ ಮಾಜಿ ನಾಯಕ ಸ್ಟೀವ್ ವಾ ಅವರು ಇತ್ತೀಚೆಗೆ ವಸಂತ್ ಅವರ ನಿವಾಸಕ್ಕೆ ತೆರಳಿದ್ದರು.