ಎಲ್ಲಿವರೆಗೂ ಬಂದಿದೆ ಗೊತ್ತೇ 5 ನಿರ್ದೇಶಕರ ಕನ್ನಡ ಚಿತ್ರ?: ಶಶಾಂಕ್ ಚಿತ್ರಕ್ಕೆ ಪ್ರಖ್ಯಾತ್ ನಾಯಕ, ಸಂಜನ ಆನಂದ್ ನಾಯಕಿ

ಚಿತ್ರವೊಂದಕ್ಕೆ ಕನ್ನಡದ 5 ನಿರ್ದೇಶಕರು ಒಟ್ಟಿಗೆ ಕೆಲಸ ಮಾಡುವುದರ ಬಗ್ಗೆ ಈ ಹಿಂದೆ ದಿ ನ್ಯೂ ಇಂಡಿಯನ್ ಎಕ್ಸ್ ಪ್ರೆಸ್ ವರದಿ ಪ್ರಕಟಿಸಿತ್ತು. ಇದರ ಭಾಗವಾಗಿರುವ ನಿರ್ದೇಶಕ ಶಶಾಂಕ್ ಈಗಾಗಲೇ ತಮ್ಮ ತಂಡವನ್ನು ಆಯ್ಕೆ ಮಾಡಿಕೊಂಡಿದ್ದು ಪ್ರಖ್ಯಾತ್ ಹಾಗೂ ಸಂಜನಾ ಆನಂದ್ ನಾಯಕ-ನಾಯಕಿಯಾಗಿ ತೆರೆ ಮೇಲೆ ಕಾಣಿಸಿಕೊಳ್ಳಲಿದ್ದಾರೆ. 

ನಡುವೆ ಅಂತರವಿರಲಿ ಮೂಲಕ ಸಿನಿ ಪಯಣ ಆರಂಭಿಸಿದ್ದ ಪ್ರಖ್ಯಾತ್ ಪರಮೇಶ್ ಗೆ ಶಶಾಂಕ್ ನಿರ್ದೇಶನದ ಈ ಸೆಗ್ಮೆಂಟ್ ಎರಡನೇ ಸಿನಿಮಾ ಆದರೆ, ಕೆಮಿಸ್ಟ್ರಿ ಆಫ್ ಕರಿಯಪ್ಪ ಖ್ಯಾತಿಯ ಸಂಜನಾ ಆನಂದ್ ತಮ್ಮ ಎರಡನೇ ಸಿನಿಮಾ ಸಲಗ ಬಿಡುಗಡೆಯನ್ನು ಎದುರುನೋಡುತ್ತಿದ್ದಾರೆ.

ಶಶಾಂಕ್ ನಿರ್ದೇಶನದ ಸಿನಿಮಾದ ಸೆಗ್ಮೆಂಟ್ ಚಿತ್ರೀಕರಣ ಈ ವಾರದಿಂದ ಸಕಲೇಶಪುರದಲ್ಲಿ ಆರಂಭಗೊಳ್ಳಲಿದ್ದು 8 ದಿನಗಳವರೆಗೆ ಚಿತ್ರೀಕರಣ ಮಾಡುವ ಯೋಜನೆ ಹೊಂದಿದ್ದಾರೆ ನಿರ್ದೇಶಕರು.

ಇನ್ನು ಉಳಿದ ನಾಲ್ವರು ನಿರ್ದೇಶಕರು-ಯೋಗರಾಜ್ ಭಟ್, ಕೆಎಂ ಚೈತನ್ಯ, ಜಯತೀರ್ಥ, ಪವನ್ ಕುಮಾರ್ ಅವರ ಭಾಗದ ಸೆಗ್ಮೆಂಟ್ ಗಳ ಪ್ರೀ ಪ್ರೊಡಕ್ಷನ್ ಕೆಲಸಗಳಲ್ಲಿ ನಿರತರಾಗಿದ್ದಾರೆ. ಲಾಕ್ ಡೌನ್ ಅವಧಿಯಲ್ಲಿ ಚಿತ್ರವೊಂದಕ್ಕೆ 5 ನಿರ್ದೇಶಕರು ಒಟ್ಟಿಗೆ ಕೆಲಸ ಮಾಡುವ ಯೋಜನೆಗೆ ಜೀವ ಬಂದಿತ್ತು ಡಿಸೆಂಬರ್ ಅಂತ್ಯದ ವೇಳೆಗೆ ಚಿತ್ರೀಕರಣ ಮುಕ್ತಾಯಗೊಳಿಸಲು ಯೋಜನೆ ಹೊಂದಿದ್ದಾರೆ.