ನಾಗರಹಾವು ತಮಿಳು ಅವತರಣಿಕೆಗೆ ವಿರೋಧ, ಮಂಡ್ಯ ಮಾಜಿ ಸಂಸದೆ ನಟಿ ರಮ್ಯಾ ಟಾರ್ಗೆಟ್!

ಚೆನ್ನೈ: ಖ್ಯಾತ ನಿರ್ದೇಶಕ ಕೋಡಿ ರಾಮಕೃಷ್ಣ ನಿರ್ದೇಶನದ ಹಾಗೂ ನಟಿ ರಮ್ಯಾ ಅಭಿನಯದ ಬಹು ನಿರೀಕ್ಷಿತ ಚಿತ್ರ ನಾಗರಹಾವು ತಮಿಳು ಅವರತರಿಣಿಕೆ ಶಿವನಾಗಂ ಗೆ ಆರಂಭಿಕ ವಿಘ್ನ  ಎದುರಾಗಿದ್ದು, ಚಿತ್ರ ಬಿಡುಗಡೆ ಮಾಡದಂತೆ ತಮಿಳುನಾಡಿನಲ್ಲಿ ಪ್ರತಿಭಟನೆ ನಡೆಸಲಾಗುತ್ತಿದೆ.

ತಮಿಳುನಾಡಿನ ಕೆಲ ಸಂಘಟನೆಗಳು ಚಿತ್ರಕ್ಕೆ ವಿರೋಧ ವ್ಯಕ್ತಪಡಿಸಿ ಪೋಸ್ಟರ್ ಗಳನ್ನು ಅಂಟಿಸುತ್ತಿದ್ದು, ಪ್ರಮುಖವಾಗಿ ನಟಿ ರಮ್ಯಾ ಅವರನ್ನು ಗುರಿಯಾಗಿಸಿಕೊಂಡು ಆಕ್ರೋಶ  ವ್ಯಕ್ತಪಡಿಸಿದ್ದಾರೆ. ಶಿವನಾಗಂ ಚಿತ್ರದಲ್ಲಿ ಅಭಿನಯಿಸಿರುವ ನಟಿ ರಮ್ಯಾ ಮಂಡ್ಯ ಜಿಲ್ಲೆಯ ಮಾಜಿ ಸಂಸದರಾಗಿದ್ದು, ಕಾವೇರಿ ವಿಚಾರವಾಗಿ ತಮಿಳರ ವಿರುದ್ಧ ಮಾತನಾಡಿದ್ದಾರೆ. ಹೀಗಾಗಿ ಅವರ  ಚಿತ್ರ ಯಾವುದೇ ಕಾರಣಕ್ಕೂ ತಮಿಳುನಾಡಿನಲ್ಲಿ ಬಿಡುಗಡೆಯಾಗಬಾರದು ಎಂದು ಪೋಸ್ಟರ್ ನಲ್ಲಿ ಬರೆದಿದ್ದಾರೆ.

ಇನ್ನು ಸಾಹಸಸಿಂಹ ವಿಷ್ಣು ವರ್ಧನ್ ಅವರ 201ನೇ ಚಿತ್ರ ಎಂದೇ ಬಿಂಬಿಸಲಾಗುತ್ತಿರುವ ಬಹುಕೋಟಿ ವೆಚ್ಚದ ನಾಗರಹಾವು ಚಿತ್ರ ಇದೇ ಅಕ್ಟೋಬರ್ 14 ಶುಕ್ರವಾರದಂದು ದೇಶಾದ್ಯಂತ  ಬಿಡುಗಡೆಯಾಗುತ್ತಿದ್ದು, ತಮಿಳಿನಲ್ಲಿ ಶಿವನಾಗಂ ಹೆಸರಿನಲ್ಲಿ ಚಿತ್ರ ಡಬ್ ಆಗಿ ತೆರೆ ಕಾಣುತ್ತಿದೆ. ಇದೀಗ ತಮಿಳರ ವಿರೋಧದಿಂದಾಗಿ ತಮಿಳುನಾಡಿನಲ್ಲಿ ಚಿತ್ರ ಬಿಡುಗಡೆ ಮುಂದಕ್ಕೆ ಹೋಗುವ  ಸಾಧ್ಯತೆಗಳಿವೆ ಎಂದು ಹೇಳಲಾಗುತ್ತಿದೆ.