ಮುಂದುವರೆದ 'ಓಂ' ಮ್ಯಾಜಿಕ್; ಮತ್ತೆ ೧೦೦ ಚಿತ್ರಮಂದಿರಗಳಲ್ಲಿ ಬಿಡುಗಡೆ

ಬೆಂಗಳೂರು: ನಟ ಶಿವರಾಜ್ ಕುಮಾರ ಮತ್ತು ನಿರ್ದೇಶಕ ಉಪೇಂದ್ರ ಜುಗಲ್ ಬಂಧಿಯಲ್ಲಿ ಮೂಡಿ ಬಂದ ೧೯೯೫ ರಲ್ಲಿ ಬಿಡುಗಡೆಯಾದ 'ಓಂ' ಸಿನೆಮಾ ಮತ್ತೆ ಚಿತ್ರಮಂದಿರಗಳಲ್ಲಿ ಬಿಡುಗಡೆ ಕಾಣಲು ಸಿದ್ಧವಾಗಿದೆ. ಇತ್ತೀಚಿನ ಅಂಕಿ ಅಂಶಗಳ ಪ್ರಕಾರ ಈ ಸಿನೆಮಾ ೫೫೦ ಬಾರಿ ಮರುಬಿಡುಗಡೆಯಾಗಿದೆ. ಈ ಸಿನೆಮಾ ಮೊದಲ ಬಾರಿ ಬಿಡುಗಡೆಯಾಗಿದ್ದಾಗ, ೪೦೦ ಚಿತ್ರಮಂದಿರಗಳಲ್ಲಿ ಸಿನೆಮಾ ಓಡಿತ್ತು.

ಡಿಜಿಟಲ್ ಇಂಟರ್ ಮಿಡಿಯೇಟ್ ಮತ್ತು ಡಿಟಿಎಸ್ ತಂತ್ರಜ್ಞಾನ ಬಳಸಿ ಈ ಸಿನೆಮಾವನ್ನು ಕರ್ನಾಟಕದಾದ್ಯಂತ ಬಿಡುಗಡೆ ಮಾಡಲು ನಿರ್ಮಾಪಕರು ನಿರ್ಧರಿಸಿದ್ದಾರೆ. ಕಿಶೋರ್ ಫಿಲ್ಮ್ಸ್ ಅವರು ಈ ಸಿನೆಮಾವನ್ನು ವಿತರಿಸುತ್ತಿದ್ದಾರೆ.

ಈ ನೆಪದಲ್ಲೇ ಉಪೇಂದ್ರ ಮತ್ತು ಶಿವರಾಜ್ ಕುಮಾರ್ ಒಟ್ಟಾಗಿ ಸಿನೆಮಾ ಮಾಡಲಿದ್ದಾರೆ ಎಂಬ ಸುದ್ದಿ ಕೇಳಿಬರುತ್ತಿದೆ. "ನಾನು ಈ ಯೋಜನೆಗೆ ಸಿದ್ಧನಿದ್ದೇನೆ. ಉಪೇಂದ್ರ ಅವರು ಮನಸ್ಸು ಮಾಡಬೇಕಷ್ಟೆ. ಅವರು ಇನ್ನೂ ಸಮಯ ಬರಲಿ, ಒಳ್ಳೆಯ ಯೋಜನೆ ಮಾಡೋಣ ಎನ್ನುತ್ತಿದ್ದಾರೆ" ಎಂದಿದ್ದಾರೆ ಶಿವರಾಜ್ ಕುಮಾರ್.