ಸೌತ್ ಇಂಡಿಯನ್ ಬ್ಯಾಂಕ್‌ಗೆ 502.27 ಕೋಟಿ ನಿವ್ವಳ ಆದಾಯ

ಬೆಂಗಳೂರು:  ಸೌತ್ ಇಂಡಿಯನ್ ಬ್ಯಾಂಕ್ ಪ್ರಸಕ್ತ ಸಾಲಿನ ಆರ್ಥಿಕ ವರ್ಷದಲ್ಲಿ 502.27 ಕೋಟಿ ನಿವ್ವಳ ಆದಾಯ ಗಳಿಸಿದ್ದು, ಈ ಸಾಲಿನಲ್ಲಿ ಶೇ.25.05 ಪ್ರಗತಿ ಕಂಡಿದೆ.
ಬ್ಯಾಂಕ್‌ನ ವ್ಯವಸ್ಥಾಪಕ ನಿರ್ದೇಶಕ ಡಾ.ವಿ.ಎ. ಜೋಸೆಫ್ ಅವರು ನಗರದಲ್ಲಿ ಸೋಮವಾರ ಕರೆದ ಸುದ್ದಿಗೋಷ್ಠಿಯಲ್ಲಿ ಈ ವಿಷಯ ತಿಳಿಸಿದ್ದಾರೆ.
ಕಳೆದ ಆರ್ಥಿಕ ವರ್ಷದಲ್ಲಿ ಬ್ಯಾಂಕ್ 401.65 ಕೋಟಿ ಲಾಭ ಗಳಿಸಿದ್ದು, ಈ ಬಾರಿ ಶೇ.25.05 ಪ್ರಗತಿ  ಕಾಣುವ ಮೂಲಕ 502.27 ಕೋಟಿ ಆದಾಯ ಗಳಿಸಿದೆ.  ಅಲ್ಲದೆ ಈ ಸಾಲಿನ ನಾಲ್ಕನೇ ತ್ರೈಮಾಸಿಕದಲ್ಲಿ ಬ್ಯಾಂಕ್ 153.83 ಕೋಟಿ ಲಾಭ ಗಳಿಸಿದೆ. ಕಳೆದ ಸಾಲಿನ ಇದೇ ತ್ರೈಮಾಸಿಕದಲ್ಲಿ ಬ್ಯಾಂಕ್‌ನ ಆದಾಯ 121.95 ಕೋಟಿ ಇದ್ದುದು ಈ ಬಾರಿ ಶೇ.26.13 ಹೆಚ್ಚಳ ಕಂಡಿದೆ. ಅಲ್ಲದೆ ಈ ಬಾರಿ ಗ್ರಾಹಕರಿಗೆ ಕಳೆದ ಬಾರಿಗಿಂತ 10 ಪೈಸೆ ಅಧಿಕ ಅಂದರೆ 70 ಪೈಸೆ ಲಾಭಾಂಶ ನೀಡಲಾಗಿದೆ ಎಂದು ಅವರು ಹೇಳಿದರು. ಒಟ್ಟಾರೆಯಾಗಿ ಬ್ಯಾಂಕ್ ಪ್ರಸಕ್ತ ಆರ್ಥಿಕ ವರ್ಷದಲ್ಲಿ ಶೇ.24.51 ಅಭಿವೃದ್ಧಿ ಕಂಡು 4,769.22 ಕೋಟಿ ಆದಾಯ ಗಳಿಸಿದೆ. ಕಳೆದ ವರ್ಷ ಬ್ಯಾಂಕ್ 3,830.5 ಕೋಟಿ ಒಟ್ಟಾರೆ ಆದಾಯ ಕಂಡಿತ್ತು. ಅಲ್ಲದೆ ಪ್ರತಿ ಷೇರು ಆದಾಯ ಕಳೆದ ಬಾರಿ 3.55 ಇದ್ದಿದ್ದು, ಈ ಬಾರಿ 4.03 ತಲುಪಿದೆ ಎಂದು ಅವರು ತಿಳಿಸಿದರು. ಅಲ್ಲದೆ ಬ್ಯಾಂಕ್ ವಿಷನ್ ಡಾಕ್ಯುಮೆಂಟ್- 2008ರ ಪ್ರಕಾರ ತನ್ನ ಗುರಿ ತಲುಪಿದ್ದು, 75,000 ಕೋಟಿ ವಹಿವಾಟು, 750 ಶಾಖೆ ಹಾಗೂ 800 ಎಟಿಎಂ ಕೇಂದ್ರಗಳನ್ನು ಹೊಂದಿದೆ. ಬ್ಯಾಂಕ್ 2013- 14ನೇ ಆರ್ಥಿಕ ವರ್ಷಾಂತ್ಯಕ್ಕೆ 92,000 ಕೋಟಿ ವಹಿವಾಟು ನಡೆಸಲುದ್ದೇಶಿಸಿದ್ದು, 50 ಹೊಸ ಶಾಖೆ ಹಾಗೂ 200 ಹೊಸ ಎಟಿಎಂ ಕೇಂದ್ರ ಸ್ಥಾಪಿಸುವ ಗುರಿ ಹೊಂದಿದೆ ಎಂದು ತಿಳಿಸಿದರು.