ಕೊರೋನಾಗಿಂತಲೂ ಮಾರಣಾಂತಿಕ ವೈರಸ್ ಕಜಕಿಸ್ತಾನದಲ್ಲಿ ಜನ್ಮ ತಾಳಿದೆ: ವಿಶ್ವಕ್ಕೆ ಚೀನಾ ಎಚ್ಚರಿಕೆ

ಬೀಜಿಂಗ್: ಜಗತ್ತಿನ 213ಕ್ಕೂ ಹೆಚ್ಚು ರಾಷ್ಟ್ರಗಳಲ್ಲಿ ಮಾರಕ ಕೊರೋನಾ ವೈರಸ್ ಮರಣ ಮೃದಂಗ ಮುಂದುವರೆದಿರುವಂತೆಯೇ ಇತ್ತ ಕೊರೋನಾ ವೈರಸ್ ನ ತವರು ಚೀನಾ ಮತ್ತೊಂದು ಮಾರಣಾಂತಿಕ ವೈರಸ್ ನ ಮಾಹಿತಿ ನೀಡಿದೆ.

ಹೌದು.. ಕೊರೋನಾಗಿಂತಲೂ ಅಪಾಯಕಾರಿ ಮತ್ತು ಪ್ರಾಣಾಂತಕ ವೈರಸ್ ವೊಂದು ಜನ್ಮತಾಳಿದೆ ಎಂದು ಚೀನಾ ವಿಜ್ಞಾನಿಗಳು ಎಚ್ಚರಿಕೆ ನೀಡಿದ್ದಾರೆ. ಕಜಕಿಸ್ತಾನದಲ್ಲಿ ಈ ಅನಾಮಧೇಯ ಮತ್ತು ಪ್ರಾಣಾಂತಕ ವೈರಸ್ ಜನ್ಮ ತಾಳಿದ್ದು ಕಳೆದ 6 ತಿಂಗಳಲ್ಲಿ ಈ ವೈರಸ್ ಗೆ ಆ ದೇಶದಲ್ಲಿ  1,772 ಮಂದಿ ಬಲಿಯಾಗಿದ್ದಾರೆ. ಈ ಪೈಕಿ ಜೂನ್ ತಿಂಗಳೊಂದರಲ್ಲಿಯೇ 628 ಮಂದಿ ಸಾವನ್ನಪ್ಪಿದ್ದಾರೆ ಎಂದು ಸೆಂಟ್ರಲ್ ಏಷ್ಯಾದ ಚೀನಾದ ರಾಯಭಾರ ಕಚೇರಿ ಹೇಳಿದೆ.

ಈ ಬಗ್ಗೆ ವಿ-ಚಾಟ್ ನಲ್ಲಿ ಹೇಳಿಕೆ ಬಿಡುಗಡೆ ಮಾಡಿರುವ ಚೀನಾ ರಾಯಭಾರ ಕಚೇರಿ, ಕಜಕಿಸ್ಥಾನದಲ್ಲಿ ಈ ವೈರಸ್ ಗೆ ಬಲಿಯಾದವರ ಪೈಕಿ ಚೀನಾ ದೇಶದ ನಿವಾಸಿಗಳು ಕೂಡ ಇದ್ದಾರೆ. ಪ್ರಸ್ತುತ ಪತ್ತೆಯಾಗಿರುವ ಈ ಅನಾಮಧೇಯ ವೈರಸ್ ನ ಜೀವಹಾನಿ ಪ್ರಮಾಣ ಕೋವಿಡ್-19ಗಿಂತಲೂ ಹೆಚ್ಚಾಗಿದೆ ಎಂದು ಚೀನಾ ಸರ್ಕಾರದ ಮುಖವಾಣಿ ಗ್ಲೋಬಲ್ ಟೈಮ್ಸ್ ವರದಿ ಮಾಡಿದೆ.

ಪ್ರಸ್ತುತ ಈ ನಿಗೂಢ ಮತ್ತು ಅನಾಮಧೇಯ ವೈರಸ್ ಕುರಿತಂತೆ ಜಗತ್ತಿನ ಸಾಕಷ್ಟು ವೈದ್ಯಕೀಯ ಸಂಶೋಧನಾ ಸಂಸ್ಥೆಗಳು ಮತ್ತು ಕಜಕಿಸ್ತಾನ ಆರೋಗ್ಯ ಇಲಾಖೆ ಅಧ್ಯಯನ ನಡೆಸುತ್ತಿದ್ದು, ಇದು ಕೊರೋನಾ ವೈರಸ್ ನ ರೂಪಾಂತರವೇ ಅಥವಾ ಇದೇ ಬೇರೆ ಜಾತಿಯ ವೈರಸ್ ಆಗಿರಬಹುದೇ ಎಂಬುದನ್ನು ಪತ್ತೆ ಮಾಡುತ್ತಿದ್ದಾರೆ.  ಕಜಕಿಸ್ತಾನದಲ್ಲಿರುವ ಈ ವೈರಸ್ ಜಗತ್ತಿನ ಇತರೆ ದೇಶಗಳಿಗೆ ವ್ಯಾಪಿಸದಂತೆ ತುರ್ತು ಕ್ರಮ ಕೈಗೊಳ್ಳಬೇಕಿದ್ದು, ಇದೇ ಕಾರಣಕ್ಕೆ ಚೀನಾ ತನ್ನ ವಾಯುವ್ಯ ಭಾಗದ ಚೀನಾ-ಕಜಕಿಸ್ತಾನ ಗಡಿಯನ್ನು ತಾತ್ಕಾಲಿಕವಾಗಿ ಮುಚ್ಚಿದೆ. ಕಜಕಿಸ್ತಾನದಲ್ಲಿರುವ ರಾಯಭಾರ ಕಚೇರಿ ಈ ಬಗ್ಗೆ ಜಗತ್ತಿಗೆ ಮಾಹಿತಿ ನೀಡಿದ್ದು, ಈ ಅನಾಮಧೇಯ ವೈರಸ್ ನ ಪ್ರಸರಣವನ್ನು ಈ ಕೂಡಲೇ ತಡೆಯಬೇಕಿದೆ ಎಂದು ಹೇಳಿದೆ. 

ಇನ್ನು ಇದೇ ವಿಚಾರವಾಗಿ ಕಜಕಿಸ್ಥಾನದ ಸ್ಥಳೀಯ ಮಾಧ್ಯಮಗಳೂ ಕೂಡ ವರದಿ ಮಾಡಿದ್ದು, ಜೂನ್ ತಿಂಗಳ ಮಧ್ಯಭಾಗದಲ್ಲೇ 500ಕ್ಕೂ ಅಧಿಕ ಮಂದಿ ಈ ವೈರಸ್ ಸೋಂಕಿಗೆ ತುತ್ತಾಗಿ ಸಾವನ್ನಪ್ಪಿದ್ದಾರೆ. 

ಇತ್ತ ಕಜಕಿಸ್ತಾನ ಆರೋಗ್ಯ ಸಚಿವರು ಮಾತನಾಡಿ ಕೋವಿಡ್-19ಗೆ ಹೋಲಿಕೆ ಮಾಡಿದರೆ ಈ ಅನಾಮಾಧೇಯ ವೈರಸ್ ಗೆ ತುತ್ತಾಗುತ್ತಿರುವವರ ಪ್ರಮಾಣ 2ರಿಂದ ಮೂರು ಪಟ್ಟು ಅಧಿಕವಾಗಿದೆ. ಮುಂದಿನವಾರದಿಂದ ಕೊರೋನಾ ವೈರಸ್ ನಂತೆಯೇ ಈ ನಿಗೂಢ ವೈರಸ್ ಗೆ ತುತ್ತಾದವರ ಮತ್ತು ಬಲಿಯಾದವ ಅಂಕಿ ಅಂಶಗಳನ್ನು ಮಾಧ್ಯಮಗಳಿಗೆ ನೀಡುವ ಕುರಿತು ನಿರ್ಧರಿಸಲಾಗುತ್ತದೆ. ಪ್ರಸ್ತುತ ಈ ವೈರಸ್ ನ ಸ್ಥಿತಿಗತಿ ತಿಳಿಯುವ ಕುರಿತು ಸರ್ಕಾರ ಪ್ರಯತ್ನ ನಡೆಸುತ್ತಿದೆ ಎಂದು ಹೇಳಿದ್ದಾರೆ ಎಂದು ಕಜಕಿಸ್ತಾನದ ಪ್ರಮುಖ ಸುದ್ದಿಸಂಸ್ಥೆ ಕಜಿನ್ ಫಾರ್ಮ್ ವರದಿ ಮಾಡಿದೆ.

ಇನ್ನು ಕಜಕಿಸ್ತಾನದಲ್ಲಿ ಕೊರೋನಾ ಸೋಂಕಿತರ ಸಂಖ್ಯೆ 51,059ಕ್ಕೆ ಏರಿಕೆಯಾಗಿದ್ದು, ಈ ಪೈಕಿ 264 ಮಂದಿ ಸೋಂಕಿತರು ಸಾವನ್ನಪ್ಪಿದ್ದಾರೆ.