ಅಮೆರಿಕಾದ ಟೆಕ್ಸಾಸ್ ನಲ್ಲಿ ಶೂಟೌಟ್: ಭಾರತೀಯ ಮೂಲದ ಸಿಖ್ ಪೊಲೀಸ್ ಅಧಿಕಾರಿ ಹತ್ಯೆ 

ಟೆಕ್ಸಾಸ್ : ಅಮೆರಿಕಾದ ಟೆಕ್ಸಾಸ್ ನ  ಟ್ರಾಫಿಕ್ ವೊಂದರಲ್ಲಿ ವಾಹನ ತಡೆದ ಹಿನ್ನೆಲೆಯಲ್ಲಿ  ವ್ಯಕ್ತಿಯೋರ್ವ ಮನಬಂದಂತೆ ಗುಂಡಿನ ದಾಳಿ ನಡೆಸಿದ ಹಿನ್ನೆಲೆಯಲ್ಲಿ  ಭಾರತೀಯ ಮೂಲದ ಅಮೆರಿಕಾದ ಸಿಖ್  ಪೊಲೀಸ್  ಅಧಿಕಾರಿಯೊಬ್ಬರು ಮೃತಪಟ್ಟಿದ್ದಾರೆ.

ಹ್ಯಾರಿಸ್ ಕೌಂಟಿ ಶೆರಿಫ್‌ನ ಉಪ ಅಧಿಕಾರಿ ಸಂದೀಪ್ ಸಿಂಗ್ ದಾಲಿವಾಲ್ ಮೃತ ದುರ್ದೈವಿ. ಅವರಿಗೆ ಇನ್ನೂ 40 ವರ್ಷ ವಯಸ್ಸಾಗಿತ್ತು ಎಂದು ಶೆರಿಫ್ ಇಡಿ ಗೊನ್ಜಾಲೆಜ್ ಹೇಳಿದ್ದಾರೆ. 

ಪುರುಷ ಹಾಗೂ ಮಹಿಳೆಯೊಬ್ಬರಿದ್ದ ವಾಹನವನ್ನು ಸಂದೀಪ್ ಸಿಂಗ್ ತಡೆದಿದ್ದಾರೆ. ಇದರಿಂದ ಆಕ್ರೋಶಗೊಂಡು ಕಾರಿನಿಂದ ಇಳಿದು ಬಂದ ವ್ಯಕ್ತಿಯೊಬ್ಬ ಮನ ಬಂದಂತೆ ಗುಂಡಿನ ದಾಳಿ ನಡೆಸಿದ್ದು, ನಿರ್ದಯವಾಗಿ ಹತ್ಯೆ ಮಾಡಿದ್ದಾನೆ. ನಂತರ ಹಂತಕ ಹತ್ತಿರವಿದ್ದ ಶಾಫಿಂಗ್ ಸೆಂಟರ್ ನತ್ತ ಓಡಿದ್ದಾನೆ ಎಂದು ಅವರು ತಿಳಿಸಿದ್ದಾರೆ.

ತನಿಖಾಧಿಕಾರಿಗಳು ಹಂತಕನ ಗುರುತು ಪತ್ತೆ ಹಚ್ಚಿದ್ದಾರೆ.  ಗನ್ ಮ್ಯಾನ್ ಹಾಗೂ ಮಹಿಳೆಯನ್ನು ವಶಕ್ಕೆ ಪಡೆದುಕೊಳ್ಳಲಾಗಿದೆ .ದಾಲಿವಾಲ್  ವಿವಾಹವಾಗಿದ್ದು, ಮೂವರು ಮಕ್ಕಳ ತಂದೆಯಾಗಿದ್ದು, ಪರೋಪಕಾರ ಗುಣದಿಂದ ಎಲ್ಲರಿಗೂ ಚಿರಪರಿಚಿತರಾಗಿದ್ದರು ಎಂದು ಗೊನ್ಜಾಲೆಜ್ ಹೇಳಿದ್ದಾರೆ