ನನ್ನ ಗೃಹ ಬಂಧನಕ್ಕೆ ಮೋದಿ-ಟ್ರಂಪ್ ಸ್ನೇಹವೇ ಕಾರಣ: ಉಗ್ರ ಹಫೀಜ್ ಸಯೀದ್

ಕರಾಚಿ: ನನ್ನನ್ನು ಪಾಕಿಸ್ತಾನ ಸರ್ಕಾರ ಗೃಹ ಬಂಧನದಲ್ಲಿರಿಸಲು ಭಾರತದ ಪ್ರಧಾನಮಂತ್ರಿ ನರೇಂದ್ರ ಮೋದಿ ಹಾಗೂ ಅಮೆರಿಕಾದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ನಡುವಿನ ಸ್ನೇಹವೇ ಕಾರಣ ಎಂದು 26/11 ಮುಂಬೈ ದಾಳಿಯ ಪ್ರಮುಖ ರೂವಾರಿ ಉಗ್ರ ಹಫೀಜ್ ಸಯೀದ್ ಮಂಗಳವಾರ ಆರೋಪಿಸಿದ್ದಾನೆ.

ಹಫೀಜ್ ಸಯೀದ್ ಭಾರತ ಹಾಗೂ ಅಮೆರಿಕ ರಾಷ್ಟ್ರಗಳಿಗೆ ಬೇಕಿರುವ ಮೋಸ್ಟ್ ವಾಂಟೆಡ್ ಉಗ್ರನಾಗಿದ್ದಾನೆ. ಕೆಲ ದಿನಗಳ ಹಿಂದಷ್ಟೇ 7 ಮುಸ್ಲಿಂ ರಾಷ್ಟ್ರಗಳ ಪ್ರಜೆಗಳ ಪ್ರವೇಶಕ್ಕೆ ಅಮೆರಿಕಾ ನಿರ್ಬಂಧ ಹೇರಿತ್ತು. ಪಾಕಿಸ್ತಾನ ಕೂಡ ಭಯೋತ್ಪಾದನೆಗೆ ಪ್ರಚೋದನೆ ನೀಡುತ್ತಿದ್ದು, ಭಯೋತ್ಪಾದಕಾ ದಾಳಿಯೆ ಬೆದರಿಕೆಯುಳ್ಳ ರಾಷ್ಟ್ರಗಳ ಪಟ್ಟಿಯಲ್ಲಿ ಪಾಕಿಸ್ತಾನ ಕೂಡ ಸೇರಿದೆ. ಈ ಹಿನ್ನಲೆಯಲ್ಲಿ ಅಮೆರಿಕ ರಾಷ್ಟ್ರ ಶೀಘ್ರದಲ್ಲಿಯೇ ಪಾಕಿಸ್ತಾನದ ಮೇಲೂ ನಿಷೇಧ ಹೇರಲಿಗೆ ಎಂಬ ಸುಳಿವನ್ನು ಇತ್ತೀಚೆಗಷ್ಟೇ ಶ್ವೇತ ಭವನ ಸುಳಿವು ನೀಡಿತ್ತು.

ಈ ಎಲ್ಲಾ ಬೆಳವಣಿಗೆಯನ್ನು ಗಮನಿಸಿದ ಪಾಕಿಸ್ತಾನ ಸರ್ಕಾರ ನಿನ್ನೆ ರಾತ್ರಿ ಹಫೀಜ್ ಸಯೀದ್ ಸೇರಿದಂತೆ ಇನ್ನೂ ನಾಲ್ವರು ಕುಖ್ಯಾತ ಉಗ್ರರಾದ ಅಬ್ದುಲ್ಲಾ ಉಬೈದ್, ಜಾಫರ್ ಇಕ್ಬಾಲ್, ಅಬ್ದುಲ್ ರೆಹಮಾನ್ ಅಬಿದ್ ಮತ್ತು ಖಾಜಿ ಕಾಶಿಪ್ ನಿಯಾಜ್ ಎಂಬುವವರನ್ನೂ ಗೃಹ ಬಂಧನ ವಿಧಿಸಿತ್ತು.

ಈ ಹಿನ್ನಲೆಯಲ್ಲಿ ಹಫೀಜ್ ಸಯೀದ್ ಪ್ರತಿಕ್ರಿಯೆ ನೀಡಿರುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಹರಿಬಿಟ್ಟಿದ್ದಾನೆ. ವಿಡಿಯೋದಲ್ಲಿ ಸಯೀದ್, ತನ್ನ ಗೃಹ ಬಂಧನಕ್ಕೆ ಟ್ರಂಪ್ ಹಾಗೂ ಮೋದಿಯವರ ಸ್ನೇಹವೇ ಕಾರಣ ಎಂದು ಹೇಳಿಕೊಂಡಿದ್ದಾನೆ.