ಉಗ್ರ ಚಟುವಟಿಕೆಯಲ್ಲಿ ತೊಡಗಿಲ್ಲ, ನಿರ್ಬಂಧ ತೆಗೆಯಿರಿ: ಹಫೀಜ್ ಸಯೀದ್

ಲಾಹೋರ್: ನಾನು ಯಾವುದೇ ಉಗ್ರ ಚಟುವಟಿಕೆಗಳಲ್ಲಿ ತೊಡಗಿಕೊಂಡಿಲ್ಲ. ನನ್ನ ಮೇಲಿರುವ ವಿದೇಶ ಪ್ರಯಾಣ ನಿರ್ಬಂಧವನ್ನು ಕೂಡಲೇ ತೆಗೆಯಿರಿ ಎಂದು ಜಮಾತ್-ಉದ್-ದಾವಾ ಸಂಘಟನೆಯ ಸಂಘಟನೆಯ ಮುಖ್ಯಸ್ಥ ಹಫೀಜ್ ಸಯೀದ್ ಪಾಕಿಸ್ತಾನ ಸರ್ಕಾರಕ್ಕೆ ಗುರುವಾರ ಒತ್ತಾಯಿಸಿದ್ದಾನೆ.

ಈ ಕುರಿತಂತೆ ಪಾಕಿಸ್ತಾನ ಸರ್ಕಾರ ಆಂತರಿಕ ಸಚಿವ ಚೌಧರಿ ನಿಸಾನ್ ಅಲಿ ಖಾನ್ ಅವರಿಗೆ ಪತ್ರ ಬರೆದಿರುವ ಹಫೀಜ್ ಜಮಾತ್-ಉದ್-ದಾವಾ ಸಂಘಟನೆ ಯಾವುದೇ ಭಯೋತ್ಪಾದಕ ಕೃತ್ಯಗಳಲ್ಲಿ ಭಾಗಿಯಾಗಿಲ್ಲ ಮತ್ತು ತನ್ನಿಂದ ದೇಶದ ಭದ್ರತೆಗೆ ಯಾವುದೇ ಅಪಾಯವೂ ಇಲ್ಲ. ಹೀಗಾಗಿ ಕೂಡಲೇ ನನ್ನ ಮೇಲಿರುವ ವಿದೇಶ ಪ್ರಯಾಣ ನಿರ್ಬಂಧವನ್ನು ತೆಗೆಯಬೇಕುಎಂದು ವಾದಿಸಿದ್ದಾನೆ.

ಹಫೀಜ್ 2008 26/11 ಮುಂಬೈ ಉಗ್ರ ದಾಳಿಯ ಪ್ರಮುಖ ರೂವಾರಿಯಾಗಿದ್ದಾನೆ. 2017ರ ಜನವರಿ 30 ರಂದು ಹೊರಡಿಸಲಾದ ಅಧಿಸೂಚನೆಯಲ್ಲಿ ವಿದೇಶ ನಿರ್ಗಮನ ನಿಷೇಧ ಪಟ್ಟಿಗೆ ಸೇರಿಸಲಾಗಿರುವ ತನ್ನ ಸಹಿತ 38 ಮಂದಿಯ ಹೆಸರನ್ನು ಪಟ್ಟಿಯಿಂದ ತೆಗೆದುಹಾಕಬೇಕೆಂದು ಹಫೀಸ್ ಪತ್ರದಲ್ಲಿ ಆಗ್ರಹಿಸಿದ್ದಾನೆಂದು ತಿಳಿದುಬಂದಿದೆ.

ಕಳೆದ ತಿಂಗಳು ಪಾಕಿಸ್ತಾನ ಸರ್ಕಾರ ಜೆಯುಡಿ ಮತ್ತು ಫಲಾಹ್-ಇ-ಇನ್ಸಾಯಿಯತ್ ಸಂಘಟನೆಯ ಇತರ 37 ನಾಯಕರನ್ನು ವಿದೇಶ ನಿರ್ಗಮನ ನಿಷೇಧ ಪಟ್ಟಿಗೆ ಸೇರಿಸುವ ಮೂಲಕ ದೇಶ ಬಿಟ್ಟು ಹೋಗದಂತೆ ನಿರ್ಬಂಧ ಹೇರಿತ್ತು. ಅಲ್ಲದೆ, ಹಫೀಜ್ ಸಯೀದ್ ಗೆ 90 ದಿನಗಳ ಕಾಲ ಗೃಹ ಬಂಧನ ವಿಧಿಸಿದೆ.