ಲೈಂಗಿಕ ದೌರ್ಜನ್ಯ ನಡೆಸಿದ ಡೊನಾಲ್ಡ್ ಟ್ರಂಪ್ ಬಲವಂತವಾಗಿ ಮುತ್ತು ಕೊಟ್ಟರು!

ವಾಷಿಂಗ್ಟನ್: ರಿಪಬ್ಲಿಕನ್ ಪಕ್ಷದ ಅಧ್ಯಕ್ಷೀಯ ಅಭ್ಯರ್ಥಿ ಉದ್ಯಮಿ ಡೊನಾಲ್ಡ್ ಟ್ರಂಪ್ ತಮ್ಮ ಮೇಲೆ ಲೈಂಗಿಕ ದೌರ್ಜನ್ಯ ನಡೆಸಿ ಬಲವಂತವಾಗಿ ಮುತ್ತು ನೀಡಿದರು ಎಂದು ಮೂವರು  ಮಹಿಳೆಯರು ಗಂಭೀರ ಆರೋಪ ಮಾಡಿದ್ದಾರೆ.

ಅಮೆರಿಕ ಅಧ್ಯಕ್ಷೀಯ ಚುನಾವಣೆ ಹತ್ತಿರವಾಗುತ್ತಿದ್ದಂತೆಯೇ ರಿಪಬ್ಲಿಕನ್ ಪಕ್ಷದ ಅಧ್ಯಕ್ಷೀಯ ಅಭ್ಯರ್ಥಿ ಉದ್ಯಮಿ ಡೊನಾಲ್ಡ್ ಟ್ರಂಪ್ ವಿರುದ್ಧ ಆರೋಪಗಳ ಸರಣಿ ಕೂಡ ಹೆಚ್ಚಾಗುತ್ತಿದ್ದು, ಇದಕ್ಕೆ  ತಾಜಾ ಉದಾಹರಣೆ ಎಂಬಂತೆ ಮೂವರು ಮಹಿಳೆಯರು ತಮ್ಮ ಮೇಲೆ ಟ್ರಂಪ್ ಲೈಂಗಿಕ ದೌರ್ಜನ್ಯ ನಡೆಸಿದ್ದಾರೆ ಮತ್ತು ಬಲವಂತವಾಗಿ ಮುತ್ತು ನೀಡಿದ್ದರು ಎಂದು ಆರೋಪಿಸಿದ್ದಾರೆ.

ಅಮೆರಿಕದ ನಿಯತಕಾಲಿಕೆಯಲ್ಲಿ ಪ್ರಕಟವಾಗಿರುವಂತೆ ಉದ್ಯಮಿ ಮಹಿಳೆಯೊಬ್ಬಳು ಮೂವತ್ತು ವರ್ಷಗಳ ಹಿಂದೆ ತಾನು ವಿಮಾನದಲ್ಲಿ ಪ್ರಯಾಣಿಸುತ್ತಿದ್ದಾಗ ಅದೇ ವಿಮಾನದಲ್ಲಿ  ಪ್ರಯಾಣಿಸುತ್ತಿದ್ದ ಟ್ರಂಪ್ ತನ್ನ ಎದೆಗೆ ಕೈಹಾಕಿ ಲೈಂಗಿಕವಾಗಿ ಬಳಸಿಕೊಳ್ಳಲು ಯತ್ನಿಸಿದ್ದರು ಎಂದು ಆರೋಪಿಸಿದ್ದಾರೆ. 74 ವರ್ಷದ ಜೆಸ್ಸಿಕಾ ಲೀಡ್ಸ್ ಎಂಬ ಮಹಿಳೆ ಇಂತಹುದೊಂದು ಗಂಭೀರ  ಆರೋಪ ಮಾಡಿದ್ದು, ನ್ಯೂಯಾರ್ಕ್ ಗೆ ತೆರಳುತ್ತಿದ್ದಾಗ ಟ್ರಂಪ್ ಕೂಡ ಅದೇ ವಿಮಾನದಲ್ಲಿ ಪ್ರಯಾಣಿಸುತ್ತಿದ್ದರು. ಆಗ ತನ್ನ ಮೇಲೆ ಲೈಂಗಿಕ ದೌರ್ಜನ್ಯ ನಡೆಸಿದರು ಎಂದು ಆರೋಪಿಸಿದ್ದಾರೆ.

ಮತ್ತೊಂದು ವರದಿಯಲ್ಲಿ 2005ರಲ್ಲಿ ರಾಚೆಲ್ ಕ್ರೂಕ್ಸ್ ಎಂಬ ಮಹಿಳೆ ಟ್ರಂಪ್ ಟವರ್ ನಲ್ಲಿ ರಿಸೆಪ್ಶನಿಸ್ಟ್ ಆಗಿ ಕಾರ್ಯ ನಿರ್ವಹಿಸುತ್ತಿದ್ದರು. ಆಗ ಮಾಲ್ ನ ಎಲಿವೇಟರ್ ನಲ್ಲಿ ತೆರಳುತ್ತಿದ್ದಾಗ  ಟ್ರಂಪ್ ಎದುರಿಗೆ ಬಂದರು. ಆಗ ತನ್ನನ್ನು ತಾನು ಪರಿಚಯಿಸಿಕೊಂಡೆ. ದಿಢೀರನೇ ಟ್ರಂಪ್ ನನ್ನನ್ನು ತಮ್ಮತ್ತೆ ಸೆಳೆದುಕೊಂಡು ಬಲವಂತವಾಗಿ ಮುತ್ತುಕೊಟ್ಟಿದ್ದರು ಎಂದು ಆರೋಪಿಸಿದ್ದಾರೆ.  ಅಂತೆಯೇ 13 ವರ್ಷಗಳ ಹಿಂದೆ ಮರ್ ಎ ಲಾಗೋ ರೆಸಾರ್ಟ್ ಗೆ ಬಂದಿದ್ದ ಟ್ರಂಪ್ ಪಾಲ್ಮ್ ಬೀಚ್ ಪೋಸ್ಟ್ ನಲ್ಲಿ ತನ್ನ ಬಳಿ ಅಸಭ್ಯವಾಗಿ ನಡೆದುಕೊಂಡಿದ್ದರು ಎಂದು ಮತ್ತೋರ್ವ ಮಹಿಳೆ  ಆರೋಪಿಸಿದ್ದಾರೆ.

ಆದರೆ ಈ ಮೂವರು ಮಹಿಳೆಯರು ಘಟನೆ ನಡೆದಾಗ ತಮ್ಮ ಸಂಬಂಧಿಕರನ್ನು ಹೊರತು ಪಡಿಸಿ ಬೇರೆಯಾರಿಗೂ ವಿಷಯ ತಿಳಿಸಿರಲಿಲ್ಲವಂತೆ.  ಆದರೆ ಮಹಿಳೆಯರ ಆರೋಪವನ್ನು ಟ್ರಂಪ್  ವಕ್ತಾರರು ಸಾರಾಸಗಟಾಗಿ ತಳ್ಳಿ ಹಾಕಿದ್ದು, ಈ ಆರೋಪಗಳೆಲ್ಲವೂ ಸತ್ಯಕ್ಕೆ ದೂರವಾದದ್ದು ಎಂದು ಹೇಳಿದ್ದಾರೆ.

ಇದೀಗ ಮಹಿಳೆಯರ ಆರೋಪ ಅಮೆರಿಕದಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದ್ದು, ಇತ್ತೀಚೆಗಷ್ಟೇ ಮಹಿಳೆ ಮತ್ತು ಡೋನಾಲ್ಡ್ ಟ್ರಂಪ್ ನಡುವಿನ ಸಂಭಾಷಣೆಯ ವಿಡಿಯೋ ಹಾಗೂ ಆಡಿಯೋ  ಸಾಮಾಜಿಕ ಜಾಲತಾಣದಲ್ಲಿ ಬಿಡುಗಡೆಯಾಗಿ ಭಾರಿ ವಿವಾದ ಸೃಷ್ಟಿಸಿತ್ತು. ಇದರ ಬೆನ್ನಲ್ಲೇ ನ್ಯೂಯಾರ್ಕ್ ಟೈಮ್ಸ್ ಪತ್ರಿಕೆಯ ವರದಿ ರಿಪಬ್ಲಿಕನ್ ಪಕ್ಷದ ಅಭ್ಯರ್ಥಿ ಡೊನಾಲ್ಡ್ ಟ್ರಂಪ್ ಗೆ ಭಾರಿ  ಹಿನ್ನಡೆಯುನ್ನುಂಟು ಮಾಡಿದೆ.