16 ಭಾರತೀಯ ಮೀನುಗಾರರು, 3 ದೋಣಿಗಳನ್ನು ವಶಪಡಿಸಿಕೊಂಡ ಶ್ರೀಲಂಕಾ ನೌಕಾಪಡೆ

ನೆಡುಂತೀವು: ಗುರುವಾರ ಬೆಳಗ್ಗೆ ಶ್ರೀಲಂಕಾದ ನೌಕಾಪಡೆ 16 ಭಾರತೀಯ ಮೀನುಗಾರರನ್ನು ಬಂಧಿಸಿ ಅವರಿಗೆ ಸೇರಿದ್ದ ಮೂರು ದೋಣಿಗಳನ್ನು ವಶಪಡಿಸಿಕೊಂಡಿದೆ. ಮೊನ್ನೆ 3ನೇ ತಾರೀಖಿನಂದು ಐವರು ಭಾರತೀಯ ಮೀನುಗಾರರನ್ನು ಅಪಹರಿಸಿ ಅವರ ದೋಣಿಗಳನ್ನು ವಶಪಡಿಸಿಕೊಂಡಿತ್ತು. ಇದಾಗಿ ನಾಲ್ಕನೇ ದಿನಕ್ಕೆ ಮತ್ತೆ ಭಾರತೀಯ ಮೀನುಗಾರರನ್ನು ಬಂಧಿಸಿದೆ.

ಈ ಬಂಧನಕ್ಕೂ ಮುನ್ನ 57 ಮಂದಿ ಭಾರತೀಯ ಮೀನುಗಾರರು ಶ್ರೀಲಂಕಾದ ಕಸ್ಟಡಿಯಲ್ಲಿದ್ದರು.ತಮಿಳುನಾಡು ಮುಖ್ಯಮಂತ್ರಿ ಜಯಲಲಿತಾ ನಿನ್ನೆ ಪ್ರಧಾನಿ ನರೇಂದ್ರ ಮೋದಿಯವರಿಗೆ ಪತ್ರ ಬರೆದು ತಮಿಳು ಮೀನುಗಾರರ ಶೀಘ್ರ ಹಾಗೂ ಸುರಕ್ಷಿತ ಬಿಡುಗಡೆಗೆ ಮಧ್ಯೆ ಪ್ರವೇಶಿಸಬೇಕೆಂದು ಮತ್ತು ಮೀನುಗಾರರ ಬಂಧನ ಸಮಸ್ಯೆಗೆ ಶಾಶ್ವತ ಪರಿಹಾರ ಕಲ್ಪಿಸಬೇಕೆಂದು ಒತ್ತಾಯಿಸಿದ್ದರು. 

ತಮಿಳುನಾಡಿನ ಮೀನುಗಾರರು ರಾಮೇಶ್ವರ ಸಮುದ್ರದಲ್ಲಿ ಸೊಂಟದವರೆಗೆ ನೀರು ತುಂಬಿಕೊಂಡು ಶ್ರೀಲಂಕಾದ ಜೈಲಿನಿಂದ ಶೀಘ್ರವೇ ಮೀನುಗಾರರನ್ನು ಬಿಡುಗಡೆ ಮಾಡುವಂತೆ ಪ್ರತಿಭಟನೆ ನಡೆಸಿದ್ದರು.

ಶ್ರೀಲಂಕಾದ ನೌಕಾಪಡೆಯಿಂದ ದೇಶದ ದೋಣಿ ಮೀನುಗಾರರನ್ನು ಬಂಧಿಸಿರುವುದಕ್ಕೆ ಮೀನುಗಾರರು ಆತಂಕ ವ್ಯಕ್ತಪಡಿಸಿದ್ದರು. ಪಾಲ್ಕ್ ಸಮುದ್ರ ತೀರದಲ್ಲಿ ಭಾರತೀಯ ಮೀನುಗಾರರಿಗೆ ಮೀನುಗಾರಿಕೆ ನಡೆಸುವ ಹಕ್ಕನ್ನು ನಿರಾಕರಿಸಲಾಗಿದೆ. ಹೀಗಾಗಿ ಶ್ರೀಲಂಕಾ ನೌಕಾಪಡೆ ಸಿಬ್ಬಂದಿ ಅವರನ್ನು ಬಂಧಿಸುತ್ತಾರೆ. ಶ್ರೀಲಂಕಾ ನೌಕಾಪಡೆಯಲ್ಲಿ 57 ಭಾರತೀಯ ಮೀನುಗಾರರು ಮತ್ತು 98 ದೋಣಿಗಳು ವಶದಲ್ಲಿವೆ. ಸೌಹಾರ್ದ ನೆಲೆಗಟ್ಟಿನಲ್ಲಿ ಮೀನುಗಾರರನ್ನು ಇದುವರೆಗೆ ಶ್ರೀಲಂಕಾ ಬಿಡುಗಡೆ ಮಾಡಿದರೂ ಕೂಡ ದೋಣಿಗಳನ್ನು ಹಾಗೆಯೇ ಇಟ್ಟುಕೊಂಡಿದೆ.