ಬ್ಯಾಂಕಾಕ್ ಹಿಂದೂ ದೇಗುಲ ಸ್ಫೋಟ: ಸಿಸಿಟಿವಿಯಲ್ಲಿ ಉಗ್ರನ ಕೈಚಳಕ ಸೆರೆ

ಬ್ಯಾಂಕಾಕ್: ಥಾಯ್ಲೆಂಡ್ ರಾಜಧಾನಿ ಬ್ಯಾಂಕಾಕ್‌ನ ಹಿಂದೂ ದೇವಾಲಯದ ಬಳಿ ಸೋಮವಾರ ಸಂಭವಿಸಿದ್ದ ಪ್ರಬಲ ಬಾಂಬ್ ಸ್ಫೋಟ ಪ್ರಕರಣಕ್ಕೆ ಸಂಬಂಧಿಸಿದಂತೆ ಥಾಯ್ ಪೊಲೀಸರು ಇದೇ ಮೊದಲ ಬಾರಿಗೆ ಉಗ್ರರ ಸಿಸಿಟಿವಿ ದೃಶ್ಯಾವಳಿಗಳನ್ನು ಬಿಡುಗಡೆ ಮಾಡಿದ್ದಾರೆ.

ಬ್ಯಾಂಕಾಕ್ ಪೊಲೀಸರು ಬಿಡುಗಡೆ ಮಾಡಿರುವ ಈ ದೃಶ್ಯಾವಳಿಯಲ್ಲಿ ಹಳದಿ ಬಣ್ಣದ ಟೀಶರ್ಟ್ ತೊಟ್ಟಿರುವ ಉಗ್ರನೋರ್ವ ಬಾಂಬ್ ಇರುವ ಬ್ಯಾಗ್ ಅನ್ನು ದೇವಾಲಯದ ಒಳಗೆ ತೆಗೆದು ಹೋಗುತ್ತಾನೆ. ಜನರಿಂದ ತುಂಬಿರುವ ಪ್ರದೇಶದ ಸಮೀಪವಿರುವ ಬೆಂಚ್ ನ ಮೇಲೆ ಕುಳಿತು ತನ್ನ ಬ್ಯಾಗ್ ಅನ್ನು ತೆಗೆದು ಅದರ ಕೆಳಗೆ ಇಟ್ಟು, ತನ್ನ ಸ್ಮಾರ್ಟ್ ಫೋನ್ ನೋಡುತ್ತಲೇ ನೀಲಿ ಬಣ್ಣದ ಕವರ್ ಅನ್ನು ಕೈಯಲ್ಲಿ ಹಿಡಿದು ಯಾರಿಗೂ ಅನುಮಾನ ಬಾರದಂತೆ ಅಲ್ಲಿಂದ ತೆರಳುತ್ತಾನೆ. ಇದಾದ ಕೇವಲ 3 ನಿಮಿಷಗಳಲ್ಲಿ ಬಾಂಬ್ ಸ್ಫೋಟಗೊಂಡು ಸುಮಾರು 20 ಮಂದಿ ಮೃತಪಟ್ಟು, 100 ಕ್ಕೂ ಹೆಚ್ಚು ಜನ ಗಾಯಗೊಂಡಿದ್ದರು. ಘಟನೆಯಲ್ಲಿ ಸಾವನ್ನಪ್ಪಿದವರ ಪೈಕಿ ಕನಿಷ್ಟ 11 ಮಂದಿ ವಿದೇಶಗರಾಗಿದ್ದು, ಚೀನಾ, ಹಾಂಕ್ ಕಾಂಗ್, ಸಿಂಗಾಪುರ, ಇಂಡೋನೇಷ್ಯಾ ಮತ್ತು ಮಲೇಷ್ಯಾ ದೇಶಗಳಿಗೆ ಸೇರಿದವರೆಂದು ತಿಳಿದುಬಂದಿದೆ.

ಚಿದ್ಲೋಮ್ ಜಿಲ್ಲಾ ಕೇಂದ್ರದ ಹೊರವಲಯದಲ್ಲಿನ ಇರಾವಾನ್(ಥಾಯ್ಲೆಂಡ್ ನಲ್ಲಿ ಬ್ರಹ್ಮನನ್ನು ಪ್ರತಿನಿಧಿಸುವ ಮೂರ್ತಿ) ಮಂದಿರದ ಬಳಿ ಸ್ಥಳೀಯ ಕಾಲಮಾನ ಸಂಜೆ 7ಕ್ಕೆ ಸ್ಫೋಟ ಸಂಭವಿಸಿತ್ತು. ಪ್ರಕರಣದ ವಿಚಾರಣೆ ನಡೆಸುತ್ತಿರುವ ಥಾಯ್ ಪೊಲೀಸರು ಪ್ರಸ್ತುತ ಶಂಕಿತ ವ್ಯಕ್ತಿ ರೇಖಾಚಿತ್ರ ಬಿಡುಗಡೆ ಮಾಡಿದ್ದಾರೆ.

ಈ ಬಗ್ಗೆ ಮಾಧ್ಯಮಗಳಿಗೆ ಮಾಹಿತಿ ನೀಡಿರುವ ರಾಷ್ಟ್ರೀಯ ಪೊಲೀಸ್ ವಕ್ತಾರ ಪ್ರಾವುತ್ ಥವಾರ್ನ್ ಅವರು, ಸಿಸಿಟಿವಿ ದೃಶ್ಯಾವಳಿಗಳ ಅನ್ವಯ ಈತನೇ ದೋಷಿ ಎಂದು ಮೇಲ್ನೋಟಕ್ಕೆ ತಿಳಿದುಬರುತ್ತಿದೆ. ಬ್ಯಾಗ್ ಬಿಟ್ಟು ಬೈಕ್ ಟ್ಯಾಕ್ಸಿಯಲ್ಲಿ ಈತ ತೆರಳಿದ ಕೇವಲ 3 ನಿಮಿಷಗಳ ಅಂತರದಲ್ಲಿ ಬಾಂಬ್ ಸ್ಫೋಟಗೊಂಡಿದೆ. ಹೀಗಾಗಿ ಈತ ಪ್ರಯಾಣ ಬೆಳೆಸಿದೆ ಬೈಕ್ ಟ್ಯಾಕ್ಸಿಯ ಕುರಿತು ಪತ್ತೆ ಹಚ್ಚಲು ನಾವು ಕ್ರಮ ಕೈಗೊಂಡಿದ್ದೇವೆ ಎಂದು ಹೇಳಿದ್ದಾರೆ.