ಕಾಮನ್‌ವೆಲ್ತ್ ಗೇಮ್ಸ್ ನ ಬೆಳ್ಳಿ ಪದಕ ವಿಜೇತೆ ಜ್ಞಾನೇಶ್ವರಿಗೆ ಬಂಪರ್ ಗಿಫ್ಟ್: 30 ಲಕ್ಷ ರೂ ನಗದು, DSP ಹುದ್ದೆ ನೀಡಿ ಗೌರವಿಸಿದ ಛತ್ತೀಸ್‌ಗಢ ಸಿಎಂ!

ರಾಯಪುರ: ಕಾಮನ್‌ವೆಲ್ತ್ ಗೇಮ್ಸ್ (ಗ್ಲ್ಯಾಸ್ಗೋ 2026) ಬೆಳ್ಳಿ ಪದಕ ವಿಜೇತೆ ಜ್ಞಾನೇಶ್ವರಿ ಯಾದವ್ ಅವರಿಗೆ ಛತ್ತೀಸ್‌ಗಢ ಸರ್ಕಾರ ಬಂಪರ್ ಗಿಫ್ಟ್ ನೀಡಿದೆ. ಮುಖ್ಯಮಂತ್ರಿ ವಿಷ್ಣು ದೇವ್ ಸಾಯಿ ಅವರು ಮಂಗಳವಾರ ರಾಯಪುರದ ತಮ್ಮ ನಿವಾಸದಲ್ಲಿ ಇಂದು ಅವರನ್ನು ಸನ್ಮಾನಿಸಿದರು. ಈ ಸಂದರ್ಭದಲ್ಲಿ ಅವರು 30 ಲಕ್ಷ ರೂ. ನಗದು ಬಹುಮಾನ ಹಾಗೂ DSP (ಉಪ ಪೊಲೀಸ್ ವರಿಷ್ಠಾಧಿಕಾರಿ) ಹುದ್ದೆಗೆ ವಿಶೇಷ ಬಡ್ತಿಯನ್ನು ಘೋಷಿಸಿದರು.

ಮಹಿಳೆಯರ 53 ಕೆಜಿ ವಿಭಾಗದ ವೇಟ್‌ಲಿಫ್ಟಿಂಗ್ ಸ್ಪರ್ಧೆಯಲ್ಲಿ ಜ್ಞಾನೇಶ್ವರಿ ಸಾಧನೆಯನ್ನು ಮಹತ್ವದ ಮೈಲಿಗಲ್ಲು ಎಂದು ಬಣ್ಣಿಸಿದ ಮುಖ್ಯಮಂತ್ರಿ, ರಾಜನಂದಗಾಂವ್ ಜಿಲ್ಲೆಯವರಾದ ಜ್ಞಾನೇಶ್ವರಿ ತಮ್ಮ ಅತ್ಯುತ್ತಮ ಪ್ರದರ್ಶನದ ಮೂಲಕ ಇಡೀ ರಾಜ್ಯಕ್ಕೆ ಹೆಮ್ಮೆ ತಂದಿದ್ದಾರೆ ಎಂದು ಹೇಳಿದರು. ಜ್ಞಾನೇಶ್ವರಿ ಒಟ್ಟು 199 ಕೆಜಿ ತೂಕವನ್ನು ಎತ್ತುವ ಮೂಲಕ ಬೆಳ್ಳಿ ಪದಕವನ್ನು ಗೆದ್ದುಕೊಂಡಿದ್ದು, ಇದು ಛತ್ತೀಸ್‌ಗಢದ ಕ್ರೀಡಾ ಇತಿಹಾಸದಲ್ಲಿ ಒಂದು ಪ್ರಮುಖ ಸಾಧನೆಯಾಗಿದೆ.

ಸೀಮಿತ ಸಂಪನ್ಮೂಲಗಳು ಮತ್ತು ಅನೇಕ ಸವಾಲುಗಳ ನಡುವೆಯೂ, ಜ್ಞಾನೇಶ್ವರಿ ತಮ್ಮ ದೃಢಸಂಕಲ್ಪವನ್ನು ಎಂದಿಗೂ ಕುಂದಲು ಬಿಡಲಿಲ್ಲ. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಅವರ ಯಶಸ್ಸು ರಾಜ್ಯದ ಯುವಜನತೆಗೆ ಪ್ರಬಲ ಸ್ಫೂರ್ತಿಯಾಗಲಿದೆ," ಎಂದು ಮುಖ್ಯಮಂತ್ರಿ ನುಡಿದರು.

ರಾಷ್ಟ್ರೀಯ ಮತ್ತು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಉತ್ತಮ ಸಾಧನೆ ಮಾಡುವ ಸಾಮರ್ಥ್ಯವಿರುವ ಕ್ರೀಡಾಪಟುಗಳನ್ನು ರೂಪಿಸಲು, ವಿಶ್ವ ದರ್ಜೆಯ ಕ್ರೀಡಾ ಮೂಲಸೌಕರ್ಯಗಳ ಅಭಿವೃದ್ಧಿ, ಅತ್ಯುತ್ತಮ ತರಬೇತಿ ಹಾಗೂ ನಿರಂತರ ಬೆಂಬಲವನ್ನು ಒದಗಿಸುವ ತಮ್ಮ ಬದ್ಧತೆಯನ್ನು ಪುನರುಚ್ಚರಿಸಿದರು.

ಕ್ರೀಡಾ ಪ್ರತಿಭೆಗಳನ್ನು ಗುರುತಿಸಿ ಗೌರವಿಸುವುದು ರಾಜ್ಯದ ಕ್ರೀಡಾ ನೀತಿಯ ಪ್ರಮುಖ ಭಾಗವಾಗಿದೆ ಎಂದು ಹೇಳಿದ ಮುಖ್ಯಮಂತ್ರಿಗಳು, ಛತ್ತೀಸ್‌ಗಢವು ಕ್ರೀಡಾ ಕ್ಷೇತ್ರದಲ್ಲಿ ಶ್ರೇಷ್ಠತೆಯನ್ನು ಸಾಧಿಸುವ ಪ್ರಮುಖ ಕೇಂದ್ರವಾಗಿ ಹೊರಹೊಮ್ಮುವ ಗುರಿಯನ್ನು ಹೊಂದಿದೆ ಎಂದು ತಿಳಿಸಿದರು.