ಕಾಮನ್ ವೆಲ್ತ್ ಕ್ರೀಡಾಕೂಟ: ಬ್ಯಾಡ್ಮಿಂಟನ್ ಮಿಶ್ರ ಡಬಲ್ಸ್ ವಿಭಾಗದಲ್ಲಿ ಲಂಕಾ ವಿರುದ್ಧ ಭಾರತಕ್ಕೆ ಜಯ

ಗೋಲ್ಡ್ ಕೋಸ್ಟ್: 2018ನೇ ಸಾಲಿನ ಕಾಮನ್ ವೆಲ್ತ್ ಕ್ರೀಡಾಕೂಟದಲ್ಲಿ ಭಾರತೀಯ ಅಥ್ಲೀಟ್ ಗಳು ಉತ್ತಮ ಆರಂಭ ಮಾಡಿದ್ದು, ವೇಟ್ ಲಿಫ್ಟಿಂಗ್ ನಲ್ಲಿ 2 ಪದಕ ಬಂದ ಬೆನ್ನಲ್ಲೇ ಇತ್ತ ಬ್ಯಾಡ್ಮಿಂಟನ್ ವಿಭಾಗದಲ್ಲೂ ಭಾರತ ತಂಡ ಮುಂದಿನ ಸುತ್ತಿಗೆ ಪ್ರವೇಶ ಪಡೆದಿದೆ.

ಶ್ರೀಲಂಕಾ ವಿರುದ್ಧದ ಮಿಶ್ರ ಡಬಲ್ಸ್ ವಿಭಾಗದ ಪಂದ್ಯಗಳಲ್ಲಿ ಭಾರತ 5-0 ಅಂತರದ ಜಯ ಸಾಧಿಸಿದ್ದು, ದಿನದ ಆರಂಭದಲ್ಲೇ ಭಾರತದ ಪ್ರಣಾವ್ ಚೋಪ್ರಾ ಮತ್ತು ಋತ್ವಿಕಾ ಗಡ್ಡೆ ಜೋಡಿ ಲಂಕಾದ ಸಚಿನ್ ಡಯಾಸ್ ಮತ್ತು ತಿಲಿನಿ ಪ್ರಮೋದಿಕಾ ವಿರುದ್ಧ 21-15 19-21 22-20 ನೇರ ಸೆಟ್ ಗಳ  ಜಯ ಗಳಿಸಿತು. ಇದರ ಬೆನ್ನಲ್ಲೇ ನಡೆದ ಪುರುಷರ ಸಿಂಗಲ್ಸ್ ಪಂದ್ಯದಲ್ಲಿ ಭಾರತದ ಕಿದಾಂಬಿ ಶ್ರೀಕಾಂತ್, ಲಂಕಾದ ನಿಲುಕಾ ಕರುಣಾರತನೆ ಅವರನ್ನು 21-16 21-10 ಅಂತರದಲ್ಲಿ ಮಣಿಸಿದರು. ಬಳಿಕ ನಡೆದ ಪುರುಷರ ಡಬಲ್ಸ್ ಪಂದ್ಯದಲ್ಲಿ ಸಾತ್ವಿಕ್ ರೆಡ್ಡಿ ಮತ್ತು ಚಿರಾಗ್ ಶೆಟ್ಟಿ ಜೋಡಿ ಲಂಕಾದ ದಿನುಕಾ ಕರುಣಾರತ್ನಾ ಮತ್ತು ಬುವಾನೆಕಾ ಗುಯೊನ್ಥಿಲ್ಕೆಯಾ ವಿರುದ್ಧ 21-17 21-14 ಅಂತರದ ಜಯಗಳಿಸಿದರು.

ಬಳಿಕ ನಡೆದ ಮಹಿಳೆಯರ ಸಿಂಗಲ್ಸ್ ಪಂದ್ಯದಲ್ಲಿ ಭಾರತ ಸೈನಾ ನೆಹ್ವಾಲ್ ಶ್ರೀಲಂಕಾದ ಮಧುಶಿಕಾ ಬೆರುಲ್ಲೇಜ್ ಅವರ ವಿರುದ್ಧ 21-8 21-4 ನೇರ ಸೆಟ್ ಗಳ ಭರ್ಜರಿ ಜಯ ಸಾಧಿಸಿದರು. ಅಂತೆಯೇ ದಿನದ ಅಂತಿಮ ಪಂದ್ಯದಲ್ಲಿ ಮಹಿಳೆಯರ ಡಬಲ್ಸ್ ವಿಭಾಗದಲ್ಲಿ ಭಾರತದ ಅಶ್ವಿನಿ ಪೊನ್ನಪ್ಪ ಮತ್ತು ಎನ್ ಸಿಕ್ಕಿ ರೆಡ್ಡಿ ಶ್ರೀಲಂಕಾದ ತಿಲಿನಿ ಪ್ರಮೋದಿಕಾ ಮತ್ತು ಕವಿದಿ ಸಿರಿಅನ್ನಗೆ ಅವರನ್ನು 21-12 21-14 ಅಂತರದಲ್ಲಿ ಮಣಿಸಿ ಬ್ಯಾಡ್ಮಿಂಟನ್ ನಲ್ಲಿ ಭಾರತ 5+-0 ಅಂತರದಲ್ಲಿ ಲಂಕಾ ವಿರುದ್ದ ಜಯ ಸಾಧಿಸುವಂತೆ ಮಾಡಿದರು.