ತೆರಿಗೆ ವಂಚನೆ: ಫುಟ್ಬಾಲ್ ಆಟಗಾರ ಲಿಯೋನಲ್ ಮೆಸ್ಸಿಗೆ 21 ತಿಂಗಳ ಜೈಲು ಶಿಕ್ಷೆ

ತೆರಿಗೆ ವಂಚನೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಜಗತ್ತಿನ ಅತ್ಯಂತ ಶ್ರೀಮಂತ ಕ್ರೀಡಾ ತಾರೆ ಅರ್ಜೈಂಟೀನಾ ಹಾಗೂ ಬಾರ್ಸಿಲೋನಾ ತಂಡದ ಫುಟ್ಬಾಲ್ ಖ್ಯಾತ ಆಟಗಾರ ಲಿಯೋನಲ್ ಮೆಸ್ಸಿಗೆ ಸ್ಪ್ಯಾನಿಷ್ ಕೋರ್ಟ್ 21 ತಿಂಗಳ ಕಾಲ ಜೈಲು ವಾಸ ಶಿಕ್ಷೆ ವಿಧಿಸಿದೆ.

ಲಿಯೋನಲ್ ಮೆಸ್ಸಿ ಹಾಗೂ ಆತನ ತಂದೆ ಜಾರ್ಜ್ ಹಾರ್ಸಿಯೋ ಮೆಸ್ಸಿ ತೆರಿಗೆ ವಂಚನೆ ಮಾಡಿರುವುದು ಸಾಬೀತಾಗಿದ್ದು, ಮೆಸ್ಸಿ 15 ಕೋಟಿ ಹಾಗೂ ತಂದೆ 11 ಕೋಟಿ ದಂಡ ಕಟ್ಟಿ 21 ತಿಂಗಳ ಸೆರೆಮನೆ ವಾಸ ಅನುಭವಿಸಬೇಕಿದೆ.

ಸ್ಪ್ಯಾನಿಷ್ ಕಾನೂನು ಪ್ರಕಾರ, 2 ವರ್ಷಕ್ಕಿಂತ ಕಡಿಮೆ ಅವಧಿಗೆ ಜೈಲು ಶಿಕ್ಷೆಯಾದರೆ ಅಂತಹ ಅಪರಾಧಿ ಜೈಲಿನಲ್ಲಿ ಶಿಕ್ಷೆ ಅನುಭವಿಸುವುದಕ್ಕೆ ಬದಲಾಗಿ ಮನೆಯಲ್ಲೇ ಇರಬಹುದಾಗಿದ್ದು ಮೇಲ್ವಿಚಾರಕರೊಬ್ಬರು ಅವರನ್ನು ಗಮನಿಸಲಿದ್ದಾರೆ.

ಲಿಯೋನಲ್ ಮೆಸ್ಸಿ ಹಾಗೂ ಆತನ ತಂದೆ ಜಾರ್ಜ್ ಹಾರ್ಸಿಯೋ ಮೆಸ್ಸಿ ತೆರಿಗೆ ಪಾವತಿಯಿಂದ ತಪ್ಪಿಸಿಕೊಳ್ಳಲು ಬೆಲಿಜ್ ಹಾಗೂ ಉರುಗ್ವೆಯಲ್ಲಿ ನಕಲಿ ಕಂಪನಿಗಳು ತೆರೆದಿದ್ದು, ತಂದೆ ಮಗ ಇಬ್ಬರು 4.6 ಮಿಲಿಯನ್ ಡಾಲರ್ ತೆರಿಗೆ ವಂಚನೆ ಮಾಡಿದ್ದಾರೆ ಎಂಬ ಆರೋಪ ಕೇಳಿಬಂದಿತ್ತು.