ಸಾಧನೆಗೆ ಶಿಸ್ತು ರಹದಾರಿ: ವಜುಭಾಯಿ

ಬೆಂಗಳೂರು: ಯುವಕರು ಶಿಸ್ತಿನಿಂದ ವರ್ತಿಸಿದಾಗ ಮಾತ್ರ ಉತ್ತಮ ಸಾಧನೆ ಮಾಡಲು ಸಾಧ್ಯ. ರಾಜ್ಯಸರ್ಕಾರವು ಕ್ರೀಡೆಯನ್ನು ಉತ್ತೇಜಿಸಿದಾಗ ಮಾತ್ರ ದೇಶದ ಸರ್ವಾಂಗೀಣ ಅಭಿವೃದ್ಧಿಯಾಗಲು ಸಾಧ್ಯ ಎಂದು ರಾಜ್ಯಪಾಲ ಶ್ರೀವಜು ಭಾಯಿ ವಾಲ ಅಭಿಪ್ರಾಯಿಸಿದರು.

ಬುಧವಾರ ರಾಜಭವನದಲ್ಲಿ ಕರ್ನಾಟಕ ಒಲಿಂಪಿಕ್ ಸಂಸ್ಥೆ (ಕೆಒಎ) ಏರ್ಪಡಿಸಿ ದ್ದ ವಾರ್ಷಿಕ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಕ್ರೀಡಾಪಟುಗಳಿಗೆ ಪ್ರಶಸ್ತಿ ವಿತರಿಸಿ ಮಾತನಾಡಿದರು. ``ಸರ್ಕಾರ  ಪ್ರತಿಭಾವಂತ ಕ್ರೀಡಾಪಟುಗಳನ್ನು ಗುರುತಿಸಿ ಪ್ರೋತ್ಸಾಹದ ಜತೆಗೆ ಮೂಲಸೌರ್ಕಯಗಳನ್ನು ಕೂಡ ಒದಗಿಸಬೇಕು'' ಎಂದರು. ಗೃಹ ಸಚಿವ ಡಾ.ಜಿ.ಪರಮೇಶ್ವರ್ ಮಾತನಾಡಿ, ``ಕ್ರೀಡೆಯನ್ನು  ಉತ್ತೇಜಿಸುವ ಸಲುವಾಗಿ ಪ್ರತಿಬಾರಿ ಮುಂಗಡಪತ್ರದಲ್ಲಿ ಅನುದಾನ ಹೆಚ್ಚಿಸಲಾಗುತ್ತಿದೆ. ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆಯು ಪ್ರತಿ ಜಿಲ್ಲೆಗಳಲ್ಲಿ ಸಿಂಥೆಟಿಕ್ ಟ್ರ್ಯಾಕ್ ಮತ್ತು  ಒಳಾಂಗಣ ಕ್ರೀಡಾಂಗಣವನ್ನು ನಿರ್ಮಿಸಲು ಕ್ರಮ ಕೈಗೊಳ್ಳಬೇಕು'' ಎಂದು ನಿರ್ದೇಶಿಸಿದರು.

``ಕೆಲವು ಚಿಕ್ಕ ರಾಷ್ಟ್ರಗಳು ಒಲಿಂಪಿಕ್ ನಲ್ಲಿ ಉತ್ತಮ ಸಾಧನೆ ತೋರಿಸಿ ಪದಕಗಳನ್ನು ಗಳಿಸುತ್ತಿದೆ. ಬೃಹತ್ ಜನಸಂಖ್ಯೆ ಹೊಂದಿರುವ ಭಾರತದಲ್ಲಿ ಒಲಿಂಪಿಕ್‍ನಂತಹ ಕ್ರೀಡೆಗಳಲ್ಲಿ ಪದಕಗಳಿಸಲು ಕಷ್ಟಸಾಧ್ಯವಾಗುತ್ತಿದೆ. ಈ ನಿಟ್ಟಿನಲ್ಲಿ ಕ್ರೀಡಾ ಆಡಳಿತ ಅಭಿವೃದ್ಧಿ ಮಂಡಳಿ ಅವರು ಇದಕ್ಕೆ ಕಾರಣಗಳನ್ನು ಹುಡುಕಿ ಕ್ರಮ ಜರುಗಿಸಬೇಕಾಗಿದೆ'' ಎಂದರು. ಸಚಿವ ಕೆ.ಜೆ. ಜಾರ್ಜ್ ಸಮಾರಂಭದ ಕೈಪಿಡಿಗಳನ್ನು ಬಿಡುಗಡೆ ಮಾಡಿದರು. ಸಮಾರಂಭದಲ್ಲಿ ಕ್ರೀಡಾ ಸಚಿವ ಕೆ. ಅಭಯಚಂದ್ರಹಾಜರಿದ್ದರು.