ಚಳಿಗಾಲ ಒಲಿಂಪಿಕ್ಸ್: ಭಾರತಕ್ಕೆ 13 ಚಿನ್ನ

ನವದೆಹಲಿ: ದಕ್ಷಿಣ ಕೊರಿಯಾದಲ್ಲಿ ನಡೆಯುತ್ತಿರುವ ವಿಶೇಷ ಒಲಿಂಪಿಕ್ಸ್ ವಿಶ್ವ ಚಳಿಗಾಲ ಕ್ರೀಡಾಕೂಟದಲ್ಲಿ ಉತ್ತಮ ಪ್ರದರ್ಶನ ತೋರುತ್ತಿರುವ ಭಾರತದ ಕ್ರೀಡಾಪಟುಗಳು 13 ಚಿನ್ನದ ಪದಕ ಸೇರಿದಂತೆ ಒಟ್ಟು 40 ಪದಗಳನ್ನು ಗೆದ್ದುಕೊಂಡಿದ್ದಾರೆ. ಒಟ್ಟು 15 ಬೆಳ್ಳಿ ಮತ್ತು 12 ಕಂಚಿನ ಪದಕಗಳು ಭಾರತದ ಬುಟ್ಟಿಗೆ ಸೇರಿವೆ.
ಸೋಮವಾರ ನಡೆದ ಹಾಕಿ ಪಂದ್ಯದಲ್ಲಿ ಭಾರತದ ವನಿತೆಯರ ತಂಡ ಚಿನ್ನದ ಪದಕ ಗೆದ್ದುಕೊಂಡರೆ, ಪುರುಷರ ಹಾಕಿ ತಂಡ ತೈಪೇ ವಿರುದ್ಧ 1-2 ಅಂತರದಿಂದ ಸೋಲುವ ಮೂಲಕ ಬೆಳ್ಳಿ ಪದಕಕ್ಕೆ ತೃಪ್ತಿಪಟ್ಟಿತು. ಅಲ್ಪಿನೆ ಸ್ಕೀಯಿಂಗ್ ಗಿಯಾಂಟ್ ಸ್ಲಾಲೋಮ್ ವಿಭಾಗದಲ್ಲಿ ಭಾರತದ ಭಾಟಿಯಾ ಅವರು ಮೂರು ಚಿನ್ನದ ಪದಕಗಳೊಂದಿಗೆ ಒಂದು ಬೆಳ್ಳಿ ಹಾಗೂ ಒಂದು ಕಂಚಿನ ಪದಕ ಗೆದ್ದುಕೊಂಡಿದ್ದಾರೆ. ಅಲ್ಪಿನೆ ಸ್ಕೀಯಿಂಗ್ ಸೂಪರ್ ಗಿಯಾಂಟ್ ಸ್ಲಾಲೋಮ್ ವಿಭಾಗದಲ್ಲಿ ಲಖ್ನೌದ 12 ವರ್ಷದ ಅನಿಶ್ಕಾ ಉಪಾಧ್ಯಾಯ ಚಿನ್ನದ ಪದಕ ಗೆದ್ದುಕೊಂಡರು. ತಂಡ ವಿಭಾಗದಲ್ಲಿ ಭಾರತ ಮೂರು ಬೆಳ್ಳಿ ಹಾಗೂ ಮೂರು ಕಂಚಿನ ಪದಕ ಗೆದ್ದುಕೊಂಡಿದೆ. 14 ವರ್ಷದ ಬಿಪಾಶಾ ಮುಖರ್ಜಿ ಅವರು ಸ್ಪೀಡ್ ಸ್ಕೇಟಿಂಗ್‌ನ 25 ಮೀಟರ್ ವಿಭಾಗದಲ್ಲಿ ಚಿನ್ನ ಮತ್ತು 55 ಮೀಟರ್‌ನಲ್ಲಿ ಬೆಳ್ಳಿ ಪದಕ ಗೆದ್ದುಕೊಂಡರು. ಪಂದ್ಯಾವಳಿಯಲ್ಲಿ 120 ರಾಷ್ಟ್ರಗಳಿಂದ ಸುಮಾರು 2200 ಅಥ್ಲೀಟ್‌ಗಳು ಭಾಗವಹಿಸಿದ್ದಾರೆ.