ಪ್ರಾಚೀನ ಜೀವ ಸಂಕುಲದ ಸಂಶೋಧನೆಗಾಗಿ ನಾಸಾದಿಂದ ಅತ್ಯಾಧುನಿಕ ಮಾರ್ಸ್ ರೋವರ್ ಉಡಾವಣೆ 

ಪ್ರಾಚೀನ ಜೀವ ಸಂಕುಲದ ಸಂಶೋಧನೆಗಾಗಿ ನಾಸಾ ಅತಿ ದೊಡ್ಡ, ಅತ್ಯಾಧುನಿಕ ಮಾರ್ಸ್ ರೋವರ್ ನ್ನು ಉಡಾವಣೆ ಮಾಡಿದೆ. 

ಒಂದು ಕಾರಿನ ಗಾತ್ರದಲ್ಲಿ ಈ ಅತ್ಯಾಧುನಿಕ ಮಾರ್ಸ್ ರೋವರ್ ನ್ನು ತಯಾರಿಸಲಾಗಿದ್ದು, ಕ್ಯಾಮರಾ, ಮೈಕ್ರೋಫೋನ್ ಗಳಾ ಜೊತೆಗೆ, ಮಂಗಳ ಗ್ರಹದಿಂದ ಬಂಡೆ, ಕಲ್ಲುಗಳ ಮಾದರಿಯನ್ನು ಸಂಗ್ರಹಿಸಿ ಭೂಮಿಗೆ ತರಲು ಡ್ರಿಲ್ ಹಾಗೂ ಲೇಸರ್ ಗಳನ್ನೂ ಹೊಂದಿದೆ. .

ಮಂಗಳ ಗ್ರಹದಿಂದ ಭೂಮಿಗೆ ಲಭ್ಯವಾಗುವ ಈ ಕಲ್ಲು-ಬಂಡೆಗಳ ಮಾದರಿಯನ್ನಿಟ್ಟುಕೊಂಡು ಪ್ರಾಚೀನ ಜೀವ ಸಂಕುಲದ ಬಗ್ಗೆ ಸಂಶೋಧನೆ ನಡೆಸಲಾಗುತ್ತದೆ. ಚೀನಾ ಹಾಗೂ ಯುನೈಟೆಡ್ ಅರಬ್ ಎಮಿರೈಟ್ಸ್ ಕಳೆದ ವಾರ ಅತ್ಯಾಧುನಿಕ ಒಂದು ಮಂಗಳಯಾನ ನೌಕೆಯನ್ನು ಉಡಾವಣೆ ಮಾಡಿದ್ದವು, ಈಗ ನಾಸಾ ಉಡಾವಣೆ ಮಾಡಿರುವುದು ಈ ಸಾಲಿನಲ್ಲಿ ಮೂರನೇಯ ಮಂಗಳಯಾನ ನೌಕೆಯಾಗಿದೆ. ಎಲ್ಲಾ ಮೂರು ನೌಕೆಗಳೂ 300 ಮಿಲಿಯನ್ ಮೈಲಿ (480 ಮಿಲಿಯನ್ ಕಿಲೋಮೀಟರ್) ಸಂಚರಿಸಿ ಫೆಬ್ರವರಿ ತಿಂಗಳ ವೇಳೆಗೆ ಮಂಗಳ ಗ್ರಹವನ್ನು ತಲುಪಲಿವೆ.

ಆರು ಚಕ್ರಗಳಾನ್ನು ಹೊಂದಿರುವ ಈ ರೋವರ್ ನ್ನು ಕಠಿಣ ಪರಿಸ್ಥಿತಿಗಳಿಗೆ ಹೊಂದಿಕೊಳ್ಳುವಂತೆ ತಯಾರಿಸಲಾಗಿದ್ದು ಮಂಗಳನ ಮೇಲ್ಮೈ ನಲ್ಲಿ ಲಭ್ಯವಾಗುವ ಘನ ಮಾದರಿಗಳನ್ನು ಕಳಿಸಿಕೊಡಲಿದೆ. ಇದು 2031 ರ ವೇಳೆಗೆ ಭೂಮಿಗೆ ಲಭ್ಯವಾಗಲಿವೆ. 

ಇದರ ಜೊತೆಗೆ ಮಂಗಳನ ಮೇಲೆ 'ಜೀವ'ಸಂಕುಲ ಅಸ್ತಿತ್ವದಲ್ಲಿತ್ತೇ? ಎಂಬ ಬಗ್ಗೆಯೂ ಸಂಶೋಧನೆ ನಡೆಯಲಿದೆ. ಮಂಗಳನ ಮೇಲ್ಮೈ ತಲುಪುವುದು ಕಠಿಣ ಪರಿಶ್ರಮದ ಕೆಲಸ ಅದಕ್ಕಾಗಿಯೇ ಈ ನೌಕೆಗೆ ನಾವು ಪರ್ಸೀವರೆನ್ಸ್ (Perseverance) ಎಂಬ ಹೆಸರನ್ನು ನಾಮಕರಣ ಮಾಡಿದ್ದೇವೆ ಎನ್ನುತ್ತಾರೆ ನಾಸಾದ ಅಡ್ಮಿನಿಸ್ಟ್ರೇಟರ್ ಜಿಮ್ ಬ್ರಿಡೆನ್‌ಸ್ಟೈನ್

ಈ ಹೆಸರನ್ನು ವರ್ಜಿನಿಯಾದ 13 ವರ್ಷದ ಬಾಲಕ ಸಲಹೆ ನೀಡಿದ್ದಾಗಿ ತಿಳಿದುಬಂದಿದೆ. ಎಲ್ಲವೂ ಅಂದುಕೊಂಡಂತೆಯೇ ಆದರೆ ಫೆ.18, 2021 ರ ವೇಳೆಗೆ ನೌಕೆ ಮಂಗಳ ಗ್ರಹದ ಮೇಲೆ ಇಳಿಯಲಿದೆ. ಮಾನವನ ಮಧ್ಯಪ್ರವೇಶ ಇಲ್ಲದೇ ಮಂಗಳನಲ್ಲಿ ಸ್ವಯಂಚಾಲಿತವಾಗಿ ಈ ನೌಕೆ ಇಳಿಯಲಿದ್ದು, 7 ನಿಮಿಷಗಳ ಅತ್ಯಂತ ಕಠಿಣ ಪ್ರಕ್ರಿಯೆ ಯಶಸ್ವಿಯಾದರೆ ಈ ಮಿಷನ್ ಸಾರ್ಥಕಗೊಳ್ಳಲಿದೆ. ಈ ನೌಕೆ 25 ಕ್ಯಾಮರಾಗಳನ್ನು ಹೊಂದಿದೆ.