ಕ್ಷಿಪಣಿ ತಂತ್ರಜ್ಞಾನದ ಅಭಿವೃದ್ಧಿಗಾಗಿ ಡಿಆರ್ ಡಿಒ ಮುಖ್ಯಸ್ಥರಿಗೆ ಅಮೆರಿಕಾದ ಪ್ರತಿಷ್ಠಿತ ಪ್ರಶಸ್ತಿ

ನವದೆಹಲಿ:ಡಿಆರ್ ಡಿಒ ಮುಖ್ಯಸ್ಥ ಜಿ ಸತೀಶ್ ರೆಡ್ಡಿ ಭಾರತದಲ್ಲಿ  ಕ್ಷಿಪಣಿ ಅಭಿವೃದ್ಧಿಯಲ್ಲಿ ನೀಡಿರುವ ಕೊಡುಗೆಗಾಗಿ  ಅಮೆರಿಕಾದ ಎಐಎಎ ಸಂಸ್ಥೆಯಿಂದ 2019ರ ಪ್ರತಿಷ್ಠಿತ ಕ್ಷಿಪಣಿ ವ್ಯವಸ್ಥೆ ಪ್ರಶಸ್ತಿಗೆ ಭಾಜನರಾಗಿದ್ದಾರೆ.

ಕ್ಷಿಪಣಿ ತಂತ್ರಜ್ಞಾನ ವ್ಯವಸ್ಥೆಯ ಅಭಿವೃದ್ಧಿ ಹಾಗೂ ಅನುಷ್ಠಾನವನ್ನು ಪರಿಗಣಿಸಿ ಈ ಪ್ರಶಸ್ತಿಗೆ ಆಯ್ಕೆ ಮಾಡಿರುವುದಾಗಿ ಎಐಎಎ ಸಂಸ್ಥೆ ಬಿಡುಗಡೆ ಮಾಡಿರುವ ಹೇಳಿಕೆಯಲ್ಲಿ ತಿಳಿಸಿದೆ.

ಭಾರತದಲ್ಲಿ ಸ್ವದೇಶಿ ನಿರ್ಮಿತ ಕ್ಷಿಪಣಿಗಳ ವಿನ್ಯಾಸ, ಅಭಿವೃದ್ಧಿ ಹಾಗೂ ಯುದ್ಧ ತಂತ್ರದ ವ್ಯವಸ್ಥೆಗಾಗಿ ಸುಮಾರು 30 ವರ್ಷಗಳ ಕಾಲ ಮಹತ್ವದ ಸೇವೆ ಸಲ್ಲಿಸಿರುವುದನ್ನು ಪರಿಗಣಿಸಿ ಅವರನ್ನು ಈ ಪ್ರಶಸ್ತಿಗೆ  ಆಯ್ಕೆ ಮಾಡಿರುವುದಾಗಿ ಸೂಸೈಟಿ  ಹೇಳಿದೆ.

ಸತೀಶ್ ರೆಡ್ಡಿ ಡಿಆರ್ ಡಿ ಒ ಮುಖ್ಯಸ್ಥರಾಗುವ ಮುನ್ನ ಅಗ್ನಿ ಸರಣಿಯ ಅಣ್ವಸ್ತ್ರ ಪರಮಾಣುಗಳ ಕಾರ್ಯತಂತ್ರ ಕಾರ್ಯಕ್ರಮಗಳು ಸೇರಿದಂತೆ ಇಡೀ ಡಿಆರ್ ಡಿಒದ ಕ್ಷಿಪಣಿ ವಿಭಾಗದ ಮುಖ್ಯಸ್ಥರಾಗಿದ್ದರು. ಭೂಮಿಯಿಂದ ಆಕಾಶಕ್ಕೆ ವೇಗವಾಗಿ ಚಿಮ್ಮುವ ಕ್ಷಿಪಣಿ ವ್ಯವಸ್ಥೆ , ನಾಗ್  ಟ್ಯಾಂಕ್ ವಿರೋಧಿ ಯುದ್ದೋಪಕರಣಗಳ ಅಭಿವೃದ್ಧಿಯಲ್ಲಿ ಮಹತ್ವದ ಸೇವೆ ಸಲ್ಲಿಸಿದ್ದಾರೆ.

ಆಕಾಶ್ ವಾಯು ರಕ್ಷಣಾ ವ್ಯವಸ್ಥೆಯ ಅಭಿವೃದ್ದಿಯಲ್ಲೂ ಸತೀಶ್  ರೆಡ್ಡಿ ಅವರು ಪ್ರಮುಖವಾದ ಪಾತ್ರ ವಹಿಸಿದ್ದಾರೆ. ಇದರಿಂದಾಗಿ ವಿದೇಶಿ ವಿನಿಮಯ ಉಳಿತಾಯಕ್ಕೆ ನೆರವಾಗಿದೆ.