ಬೆಂಗಳೂರಿಗೆ ಶೀಘ್ರವೆ ಬರಲಿದೆ ಆನಿಮೇಶನ್ ಪಾರ್ಕ್

ಬೆಂಗಳೂರು: ಮನರಂಜನೆ ಹಾಗೂ ಐಟಿ-ಪ್ರೇರಿತ ಶಿಕ್ಷಣ ಕ್ಷೇತ್ರದಲ್ಲಿ ಬೆಳವಣಿಗೆ ಹೆಚ್ಚಾಗುತ್ತಿದ್ದು, ಆನಿಮೇಶನ್ ಹಾಗೂ ವಿಶ್ಯೂಯಲ್ ಗ್ರಾಫಿಕ್ಸ್ ಕಂಪನಿಗಳಿಗೆ ಭಾರಿ ಬೇಡಿಕೆ ಇದೆ. ಅನಿಮೇಶನ್ ಕ್ಷೇತ್ರದ ಬೆಳವಣಿಗೆಯನ್ನು ಪರಿಗಣಿಸಿರುವ ರಾಜ್ಯ ಸರ್ಕಾರ ಕರ್ನಾಟಕ ವಿಶ್ಯುಯಲ್ ಎಫೆಕ್ಟ್ಸ್, ಗೇಮಿಂಗ್, ಕಾಮಿಕ್ಸ್ ಪಾರ್ಕ್( ಕೆಎವಿಜಿಸಿ) ಪಾರ್ಕ್ ನ್ನು ನಿರ್ಮಿಸಲು ತೀರ್ಮಾನಿಸಿದೆ.
ಎಲೆಕ್ಟ್ರಾನಿಕ್ ಸಿಟಿಯ ಮೊದಲನೇ ಹಂತದ ದೊಡ್ಡತೋಗೂರು ಬಳಿ ಕೆಎವಿಜಿಸಿ ಪಾರ್ಕ್ ನಿರ್ಮಾಣವಾಗಲಿದ್ದು 10 ಎಕರೆ ಭೂಮಿ ನೀಡಲಾಗುತ್ತದೆ. ಈ ಮೂಲಕ ಆನಿಮೇಶನ್ ಕಂಪನಿ ಹಾಗೂ ಅದಕ್ಕೆ ಸಂಬಂಧಿಸಿದ ಕ್ಷೇತ್ರಗಳಿಗೆ ಉತ್ತೇಜನ ನೀಡಲು ಕ್ರಮ ಕೈಗೊಳ್ಳಲಾಗುವುದು ಎಂದು ಇತ್ತೀಚೆಗಷ್ಟೇ ಮುಕ್ತಾಯಗೊಂಡ ಗ್ಲೋಬಲ್ ಇನ್ವೆಸ್ಟರ್ ಮೀಟ್ ನಲ್ಲಿ ರಾಜ್ಯ ಸರ್ಕಾರ ಸ್ಪಷ್ಟಪಡಿಸಿದೆ. 
ಕರ್ನಾಟಕವನ್ನು ವಿಶ್ವದ ತಂತ್ರಜ್ಞಾನದ ಅತಿ ದೊಡ್ಡ ಕ್ಲಸ್ಟರ್  ನನ್ನಾಗಿ ಮಾಡುವ ಯೋಜನೆಯಾದ ಐ-4 ಪಾಲಿಸಿ ಅಡಿಯಲ್ಲಿ ಈ ಪ್ರಸ್ತಾವನೆ ಸಲ್ಲಿಸಲಾಗಿದೆ ಎಂದು ಮಾಹಿತಿ ತಂತ್ರಜ್ಞಾನ ಇಲಾಖೆ, ಜೈವಿಕ ತಂತ್ರಜ್ಞಾನ ಮತ್ತು ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆಯ ಮುಖ್ಯ ಕಾರ್ಯದರ್ಶಿ ವಿ ಮಂಜುಳ ಹೇಳಿದ್ದಾರೆ.
ಆನಿಮೇಶನ್ ಗಳಿಗೆ ಸಮ್ಬಮಧಿಸಿದ ಶಿಕ್ಷಣ ಸಂಸ್ಥೆಗಳು, ಮಾನವ ಸಂಪನ್ಮೂಲ ಹೆಚ್ಚಾಗಿರುವ ಟೈರ್ 2 ನಗರ ಪ್ರದೇಶಗಳಲ್ಲಿ ಅನಿಮೇಶನ್ ಪಾರ್ಕ್ ಗಳಿಗೆ ಹೆಚ್ಚಿನ ಬೇಡಿಕೆ ಇದ್ದು, ರಾಜ್ಯ ಸರ್ಕಾರ 50 ಕೋಟಿ ರೂಪಾಯಿಯ ವೆಂಚರ್ ಕ್ಯಾಪಿಟಲ್ ಫಂಡ್ ಸ್ಥಾಪಿಸಲಿದ್ದು ಇದರ ಶೇ.26 ರಷ್ಟನ್ನು ರಾಜ್ಯದಲ್ಲಿ ಉದ್ಯಮಿಗಳನ್ನು ಪ್ರೋತ್ಸಾಹಿಸಲು ಬಳಕೆ ಮಾಡಲಾಗುತ್ತದೆ ಎಂದು ಮಂಜುಳ ತಿಳಿಸಿದ್ದಾರೆ.