ಫ್ರೀ ಬೇಸಿಕ್ಸ್ ಎಂಬ ಫೇಸ್‌ಬುಕ್ ನ ಹೊಸ ಸಂಚು!

ಫೇಸ್‌ಬುಕ್‌ಗೆ ಲಾಗಿನ್ ಆದ ಕೂಡಲೇ Act now to save Free Basics in India ಎಂಬ ನೋಟಿಫಿಕೇಶನ್ ಬಂದು, ಅದಕ್ಕೆ ಸಹಿ ಹಾಕುವಂತೆ ಹೇಳುತ್ತದೆ. ಹಲವಾರು ಮಂದಿ ಅದನ್ನು ಪೂರ್ತಿ ಓದದೆಯೇ ಸಹಿ ಹಾಕಿ ಬಿಟ್ಟಿದ್ದಾರೆ. ಆದರೆ ಇದೊಂದು ಅಪಾಯಕಾರಿ ಮತ್ತು ನಮ್ಮ ದೇಶಕ್ಕೆ ಆಂತಕವೊದಗಿಸುವ ಸಂಗತಿ ಎಂಬುದು ಹೆಚ್ಚಿನವರಿಗೆ ಗೊತ್ತಿಲ್ಲ. ಇದು ನಿಜವಾಗಿಯೂ ಫೇಸ್ ಬುಕ್ ಸಿಇಒ ಮಾರ್ಕ್ ಜೂಕರ್‌ಬರ್ಗ್‌ನ ಕುತಂತ್ರ. ನಾವು ಈ ಫ್ರೀ ಬೇಸಿಕ್ಸ್ ಗೆ ಸಹಿ ಹಾಕಿದರೆ ನಮ್ಮ ಹಳ್ಳಿಗಳು ಉದ್ಧಾರವಾಗುವುದೂ ಇಲ್ಲ, ತಂತ್ರಜ್ಞಾನ ಬೆಳೆಯುವುದೂ ಇಲ್ಲ. ಇಲ್ಲಿ ಬೆಳೆಯುವುದು ಜೂಕರ್‌ಬರ್ಗ್ ಮಾತ್ರ! ಆದ್ದರಿಂದ ಇದಕ್ಕೆ ಸಹಿ ಹಾಕುವ ಮುನ್ನ ಅದರ ಬಗ್ಗೆ ತಿಳಿದುಕೊಳ್ಳುವುದು ಒಳಿತು.

ತಿಂಗಳುಗಳ ಹಿಂದೆ ಇಂಟರ್‌ನೆಟ್ ಆರ್ಗ್ ವಿರುದ್ಧ ಚಳುವಳಿ ನಡೆದಿದ್ದು ನೆನಪಿದೆಯಾ? ಫೇಸ್ ಬುಕ್ ಸೇರಿದಂತೆ ಇನ್ನಿತರ ವೆಬ್‌ಸೈಟ್‌ಗಳು  ಮೊಬೈಲ್ ದೈತ್ಯ ಕಂಪನಿಗಳೊಂದಿಗೆ ಒಳ ಒಪ್ಪಂದ ಮಾಡಿಕೊಂಡು ಪ್ರತೀ ವೆಬ್ ಸೈಟ್‌ಗೂ ಪ್ರತ್ಯೇಕ ದುಡ್ಡು ವಿಧಿಸುವ ಸಂಚು ವಿರುದ್ಧ ನಡೆದ ಹೋರಾಟವದು. ಈ ಬಗ್ಗೆ ಟ್ರಾಯ್‌ (Telecom Regulatory Authority of India (TRAI) )ಗೆ ಜನರು ಒಗ್ಗೂಡಿ ಇಮೇಲ್ ಕಳಿಸಿದ್ದರ ಫಲವಾಗಿ ಆ ಸಂಚು ಯಶಸ್ವಿಯಾಗಲಿಲ್ಲ. ಅನಂತರ ಫೇಸ್ ಬುಕ್ ನಲ್ಲಿ ತ್ರಿವರ್ಣ ಧ್ವಜದ ಬ್ಯಾಕ್‌ಗ್ರೌಂಡ್ ಬಳಸಿ ಪ್ರೊಫೈಲ್ ಫೋಟೋ ಬದಲಿಸುವ ಲಿಂಕ್ ಬಂತು. ಆದರೆ ಅಲ್ಲೊಂದು ಹಿಡನ್ ಅಜೆಂಡಾ ಇತ್ತು. ಆ ಫೋಟೋ ಬದಲಿಸುವ ಲಿಂಕ್ ಕೆಳಗೆ ನಾನು ಇಂಟರ್ ನೆಟ್  ಆರ್ಗ್ ನ್ನು ಬೆಂಬಲಿಸುತ್ತೇನೆ ಎಂದು ಬರೆಯಲಾಗಿತ್ತು!. ಪ್ರೊಫೈಲ್ ಫೋಟೋ ಬದಲಾಯಿಸುವ ಗೌಜಿಯಲ್ಲಿ ಅಲ್ಲಿ ಕೆಳಗೆ ಕೊಟ್ಟಿರುವ ಲಿಂಕ್ ನ್ನು ಯಾರೂ ಗಮನಿಸಲೇ ಇಲ್ಲ. ಇದು ಹಾಗಲ್ಲ ಹೀಗೆ, ಇಂಜಿನಿಯರ್ ನ ಪ್ರಮಾದ ಎಂದು ಫೇಸ್‌ಬುಕ್  ಕ್ಷಮೆಯಾಚಿಸಿದ್ದರೂ ಅಷ್ಟರಲ್ಲಿ ಹಲವಾರು ಮಂದಿ ಪ್ರೊಫೈಲ್ ಫೋಟೋ ಬದಲಿಸಿ ಈ ಲಿಂಕ್‌ನ್ನು ಸ್ವೀಕರಿಸಿಯಾಗಿತ್ತು.

ಈಗಲೂ ಫೇಸ್ ಬುಕ್ ಮಾಡುತ್ತಾ ಇರುವುದೂ ಅದನ್ನೇ. ಈ ನೋಟಿಫಿಕೇಶನ್‌ಗೆ ನೀವು ಸಹಿ ಹಾಕಿ I Agree ಎಂದು ಒತ್ತಿದ ಕೂಡಲೇ ನೀವು ಫೇಸ್ ಬುಕ್‌ನ ಇಂಟರ್ ನೆಟ್ ಆರ್ಗ್‌ನ್ನು ಬೆಂಬಲಿಸುತ್ತೀರಿ ಎಂಬ ಸಂದೇಶ ಟ್ರಾಯ್‌ಗೆ ಹೋಗುತ್ತದೆ. ಅಂದರೆ ಮೊದಲು ನಾವು ಮಾಡಿದ್ದ ಚಳುವಳಿಯನ್ನು ಹತ್ತಿಕ್ಕುವ ಕೆಲಸವಿದು. ಹೆಸರು ಬದಲಿಸಿಕೊಂಡು ಜನರನ್ನು ಮತ್ತೆ ಇಂಟರ್‌ನೆಟ್ ಆರ್ಗ್‌ಗೆ ಬೆಂಬಲ ನೀಡುವಂತೆ ಮಾಡುವ ಫೇಸ್ ಬುಕ್‌ನ ಹುನ್ನಾರ ಇದು ಎಂಬುದು ನಿಮಗೆ ತಿಳಿದಿರಲಿ.