2026ರ ಬ್ರಿಕ್ಸ್ ಶೃಂಗಸಭೆಯಲ್ಲಿ ಯಾಕೆ ಸಸ್ಯಾಹಾರಿ ಊಟವನ್ನೇ ಬಡಿಸಲಾಯಿತು! ಸೆಲೆಬ್ರಿಟಿ ಚೆಫ್ ರಣವೀರ್ ಬ್ರಾರ್ ಹೇಳಿದ್ದು ಹೀಗೆ..

ನವದೆಹಲಿ: ರಾಜಧಾನಿಯಲ್ಲಿ ಇತ್ತೀಚೆಗೆ ನಡೆದ 18ನೇ ಬ್ರಿಕ್ಸ್ ಶೃಂಗಸಭೆಯಲ್ಲಿ ಸಂಪೂರ್ಣ ಸಸ್ಯಾಹಾರಿ ಭೋಜನ ಬಡಿಸಿದ್ದಕ್ಕೆ ವಿವಾದ ಭುಗಿಲೆದ್ದಿತ್ತು. ಸಂಪೂರ್ಣ ಸಸ್ಯಾಹಾರಿ ಭೋಜನ ಸಮಾಜದ ಎಡಪಂಥೀಯ ಒಲವುಳ್ಳ ವರ್ಗಗಳಿಂದ ಟೀಕೆಗೆ ಗುರಿಯಾಗಿತ್ತು. ಭೋಜನವು ವೈವಿಧ್ಯಮಯವಾಗಿರಬಹುದಿತ್ತು ಎಂದು ಅವರು ಅಭಿಪ್ರಾಯಪಟ್ಟಿದ್ದರು.

ಈ ಕುರಿತು ಸೆಲೆಬ್ರಿಟಿ ಚೆಫ್ ಮತ್ತು ನಟ ರಣವೀರ್ ಬ್ರಾರ್ ಪ್ರತಿಕ್ರಿಯಿಸಿದ್ದಾರೆ. ಮುಂಬೈನ ಅಂಧೇರಿ ವೆಸ್ಟ್ ಪ್ರದೇಶದಲ್ಲಿ ತಮ್ಮ ಹೊಸ ಸ್ಟ್ರೀಮಿಂಗ್ ಶೋ 'ಯೆಸ್ ಶೆಫ್' (Yess Chef) ಪ್ರಚಾರದ ವೇಳೆ ಸುದ್ದಿಸಂಸ್ಥೆ ಐಎಎನ್‌ಎಸ್ (IANS) ಜೊತೆ ಮಾತನಾಡಿದ ಅವರು, ಕೆಲವೊಮ್ಮೆ, ಜಾಗತಿಕ ವಿವಾದಗಳಿಂದ ದೂರವಿರಲು ಬಯಸುತ್ತೇವೆ ಎಂದರು.

ಕೆಲವು ದೇಶಗಳಲ್ಲಿ ಗೋಮಾಂಸವನ್ನು ಸೇವಿಸುತ್ತಾರೆ, ಇನ್ನು ಕೆಲವು ದೇಶಗಳಲ್ಲಿ ಹಂದಿಮಾಂಸವನ್ನು ಸೇವಿಸುತ್ತಾರೆ, ಹೀಗಾಗಿ, ಅಂತಹ ವಿಷಯಗಳಿಂದ ದೂರವಿರಲು ಮತ್ತು ವಿವಾದರಹಿತವಾದ ಆಹಾರವನ್ನು ಬಡಿಸಲು ನಾವು ಬಯಸುತ್ತೇವೆ. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಸಸ್ಯಾಹಾರಿ ಆಹಾರವು ವಿವಾದಗಳಿಂದ ದೂರವಿರುತ್ತದೆ ಎಂದು ಹೇಳಿದರು.

18ನೇ ಬ್ರಿಕ್ಸ್ ಶೃಂಗಸಭೆಯು ಸೆಪ್ಟೆಂಬರ್ 12 ಮತ್ತು 13 ರಂದು ನವದೆಹಲಿಯಲ್ಲಿ ನಡೆಯಿತು. "ಸ್ಥಿತಿಸ್ಥಾಪಕತ್ವ, ನಾವೀನ್ಯತೆ, ಸಹಕಾರ ಮತ್ತು ಸುಸ್ಥಿರತೆಗಾಗಿ ನಿರ್ಮಾಣ" (Building for Resilience, Innovation, Cooperation and Sustainability) ಎಂಬ ವಿಷಯದಡಿ ಇದನ್ನು ಆಯೋಜಿಸಲಾಗಿತ್ತು.

ಬ್ರೆಜಿಲ್, ರಷ್ಯಾ, ಭಾರತ, ಚೀನಾ, ದಕ್ಷಿಣ ಆಫ್ರಿಕಾ, ಈಜಿಪ್ಟ್, ಇಥಿಯೋಪಿಯಾ, ಇರಾನ್, ಯುಎಇ (UAE), ಇಂಡೋನೇಷ್ಯಾ ಮತ್ತು ಸೌದಿ ಅರೇಬಿಯಾ ಸೇರಿದಂತೆ ಬ್ರಿಕ್ಸ್‌ನ ಎಲ್ಲಾ 11 ಸದಸ್ಯ ರಾಷ್ಟ್ರಗಳ ನಾಯಕರು ಇದರಲ್ಲಿ ಭಾಗವಹಿಸಿದ್ದರು. ಅಲ್ಲದೆ, ಮಲೇಷ್ಯಾ, ವಿಯೆಟ್ನಾಂ, ಥೈಲ್ಯಾಂಡ್, ಫಿಲಿಪೈನ್ಸ್, ನೈಜೀರಿಯಾ, ಉಗಾಂಡಾ, ಕ್ಯೂಬಾ, ಬೆಲಾರಸ್, ಕಝಾಕಿಸ್ತಾನ್ ಮತ್ತು ಉಜ್ಬೇಕಿಸ್ತಾನ್ ಸೇರಿದಂತೆ 10 ಪಾಲುದಾರ ದೇಶಗಳ ಪ್ರತಿನಿಧಿಗಳನ್ನೂ ಈ ಶೃಂಗಸಭೆಯು ಒಗ್ಗೂಡಿಸಿತು.