ಶಿವಸೇನೆ (ಯುಬಿಟಿ)ಯ ಆರು ಬಂಡಾಯ ಸಂಸದರಿಗೆ ವೈ-ಪ್ಲಸ್ ಭದ್ರತೆ ಒದಗಿಸಿದ ಮಹಾರಾಷ್ಟ್ರ ಪೊಲೀಸರು!

ಮುಂಬೈ: ಮಹಾರಾಷ್ಟ್ರ ಪೊಲೀಸರು ಶಿವಸೇನೆಯ (ಯುಬಿಟಿ) ಆರು 'ಬಂಡಾಯ' ಸಂಸದರಿಗೆ 'ವೈ-ಪ್ಲಸ್' ಭದ್ರತೆಯನ್ನು ನೀಡಿದ್ದಾರೆ.

ಸಂಜಯ್ ದಿನಾ ಪಾಟೀಲ್ (ಮುಂಬೈ-ಈಶಾನ್ಯ), ಸಂಜಯ್ ದೇಶ್‌ಮುಖ್ (ಯವತ್ಮಾಲ್-ವಾಶಿಂ), ಸಂಜಯ್ ಜಾಧವ್ (ಪರ್ಭಾನಿ), ಭೌಸಾಹೇಬ್ ವಾಕ್‌ಚೌರೆ (ಶಿರಡಿ), ನಾಗೇಶ್ ಪಾಟೀಲ್-ಅಶ್ತಿಕರ್ (ಹಿಂಗೋಲಿ) ಮತ್ತು ಓಂಪ್ರಕಾಶ ರಾಜೇ ನಿಂಬಾಳ್ಕರ್ (ಒಸ್ಮಾನಾಬಾದ್) ಅವರಿಗೆ ಭದ್ರತೆ ಒದಗಿಸಲಾಗಿದೆ ಎಂದು ಗುಪ್ತಚರ ಇಲಾಖೆಯ ಆಯುಕ್ತ ಶಿರೀಶ್ ಜೈನ್ ಸಹಿ ಮಾಡಿರುವ ಪತ್ರದಲ್ಲಿ ತಿಳಿಸಲಾಗಿದೆ.

ಅದರಂತೆ, ಈ ಸಂಸದರಿಗೆ ತಕ್ಷಣದಿಂದ ಜಾರಿಗೆ ಬರುವಂತೆ ವೈ ಪ್ಲಸ್ ಭದ್ರತೆಯನ್ನು ಒದಗಿಸಬೇಕು ಎಂದು ಜೂನ್ 17ರ ಪತ್ರದಲ್ಲಿ ತಿಳಿಸಲಾಗಿದೆ.

ಮಹಾರಾಷ್ಟ್ರದಲ್ಲಿ ಶಿವಸೇನೆಯ (ಯುಬಿಟಿ) ಬಣದಲ್ಲಿ ಮತ್ತೊಮ್ಮೆ ಭಿನ್ನಮತ ಸ್ಫೋಟಗೊಂಡಿರುವ ಬೆನ್ನಲ್ಲೇ, ಈ ಸಂಸದರು ಗುರುವಾರ ದೆಹಲಿಯಲ್ಲಿ ನಡೆದ ಉದ್ಧವ್ ಠಾಕ್ರೆ ನೇತೃತ್ವದ ಪಕ್ಷದ ನಿರ್ಣಾಯಕ ಪಕ್ಷದ ಸಂಸದೀಯ ಸಭೆಯಲ್ಲಿ ಭಾಗವಹಿಸಿಲ್ಲ.

ವಾಶಿಮ್‌ನ ಸ್ಥಳೀಯ ಶಿವಸೇನೆ (ಯುಬಿಟಿ) ನಾಯಕರೊಬ್ಬರು ಬುಧವಾರ ಸಂಸದ ಸ್ಥಾನಕ್ಕೆ ರಾಜೀನಾಮೆ ನೀಡದೆ ಮತ್ತೆ ಕ್ಷೇತ್ರಕ್ಕೆ ಬರಲು ಅವಕಾಶ ನೀಡುವುದಿಲ್ಲ ಮತ್ತು ಪಕ್ಷ ಬದಲಾಯಿಸಿದರೆ ಅವರ ಕಾರಿಗೆ ಬೆಂಕಿ ಹಚ್ಚಲಾಗುವುದು ಎಂದು ಬಂಡಾಯ ಸಂಸದ ಸಂಜಯ್ ದೇಶಮುಖ್ ಅವರಿಗೆ ಎಚ್ಚರಿಸಿದ್ದಾರೆ.

ಶಿವಸೇನೆ (ಯುಬಿಟಿ)ಯ ಏಕೈಕ ರಾಜ್ಯಸಭಾ ಸಂಸದ ಸಂಜಯ್ ರಾವುತ್ ಗುರುವಾರ ಸಂಸದೀಯ ಸಭೆಗೆ ಗೈರಾದ ಸಂಸದರ ವಿರುದ್ಧ ವಾಗ್ದಾಳಿ ನಡೆಸಿ, 'ದೇಶದ್ರೋಹಿಗಳಿಗೆ' ಶಿವಸೈನಿಕರ ಕೋಪದಿಂದ ತಮ್ಮನ್ನು ರಕ್ಷಿಸಿಕೊಳ್ಳಲು ಭಾರತೀಯ ವಾಯುಪಡೆಯಿಂದ ರಕ್ಷಣೆ ಬೇಕಾಗುತ್ತದೆ ಎಂದು ಹೇಳಿದರು.

ಪಕ್ಷ ಬಿಡುವವರು ಕ್ಷೇತ್ರದಲ್ಲಿ ಮುಕ್ತವಾಗಿ ಓಡಾಡಲು ಅವಕಾಶ ನೀಡುವುದಿಲ್ಲ ಮತ್ತು ಅಂತಹವರ ಮುಖಕ್ಕೆ ಹಸುವಿನ ಸಗಣಿ ಸವರಗಾಲುವುದು ಎಂದು ಧಾರಾಶಿವ್‌ನಲ್ಲಿ ಪಕ್ಷದ ಕಾರ್ಯಕರ್ತರು ಹೇಳಿದ್ದಾರೆ.