LPG Gas Cylinder: ಎಲ್‌ಪಿಜಿ ಸಮಸ್ಯೆ ನಡುವೆ, ಭೀಕರ ಮಳೆಗೆ ಕೊಚ್ಚಿ ಹೋದ 1200 ಗ್ಯಾಸ್ ಸಿಲಿಂಡರ್! Video

ರಾಯಗಡ (ಮಹಾರಾಷ್ಟ್ರ): ಮೊದಲೇ ದೇಶದಲ್ಲಿ LPG ಸಮಸ್ಯೆ ಇದೆ. ಇದರ ನಡುವೆಯೇ ಮಹಾರಾಷ್ಟ್ರದ ರಾಯಗಡದಲ್ಲಿ ಭಾರೀ ಮಳೆಯ ಪರಿಣಾಮ ಸಾವಿರಾರು LPG ಗ್ಯಾಸ್ ಸಿಲಿಂಡರ್‌ಗಳು ನದಿಯಲ್ಲಿ ಕೊಚ್ಚಿ ಹೋಗಿದೆ. ಆ ಕುರಿತ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಹಾಗಾದ್ರೆ, ನದಿಯಲ್ಲಿ ಕೊಚ್ಚಿಹೋದ ಆ ಸಿಲಿಂಡರ್‌ಗಳು ಏನಾದವು ಗೊತ್ತಾ? ಆ ಕುರಿತ ವರದಿ ಇಲ್ಲಿದೆ.

ಏನಿದು ಘಟನೆ?
ಮಹಾರಾಷ್ಟ್ರ ರಾಜ್ಯಾದ್ಯಂತ ಭಾರಿ ಮಳೆ ಆಗುತ್ತಿದೆ. ಇದರ ಪರಿಣಾಮ ರಾಜ್ಯದ ಬಹುತೇಕ ಪ್ರದೇಶಗಳಲ್ಲಿ ಪ್ರವಾಹ ಉಂಟಾಗಿದೆ. ಅದರಂತೆ, ರಾಯಗಢ ಜಿಲ್ಲೆಯ ಖಲಾಪುರ ತಾಲ್ಲೂಕಿನ ಚಾವ್ನೆ ಪ್ರದೇಶದಲ್ಲಿ ನಿರಂತರವಾಗಿ ಮಳೆಯಾಗುತ್ತಿದೆ. ಈ ಮಳೆಯಿಂದಾಗಿ ಗುಡ್ಡಗಾಡು ಪ್ರದೇಶಗಳಿಂದ ಬರುವ ನೀರಿನ ಮಟ್ಟ ಇದ್ದಕ್ಕಿದ್ದಂತೆ ಅಪಾಯಕಾರಿ ಮಟ್ಟಕ್ಕೆ ಏರಿದೆ. ಇನ್ನು ನೀರಿನ ಹರಿವು ಎಷ್ಟು ಪ್ರಬಲವಾಗಿತ್ತು ಎಂದರೆ ಅದು ನೇರವಾಗಿ ಚಾವ್ನೆನಲ್ಲಿರುವ ಹಿಂದೂಸ್ತಾನ್ ಪೆಟ್ರೋಲಿಯಂ ಕಾರ್ಪೊರೇಷನ್ ಲಿಮಿಟೆಡ್ (HPCL) ಗ್ಯಾಸ್ ಪ್ಲಾಂಟ್‌ನ ಆವರಣಕ್ಕೆ ನುಗ್ಗಿದೆ. ಅದರರಲ್ಲೂ, ಪ್ಲಾಂಟ್‌ನಲ್ಲಿದ್ದ ಸಿಬ್ಬಂದಿಗೆ ನದಿ ನೀರು ತಡೆಯಲು ಸಾಧ್ಯವಾಗದಷ್ಟು ವೇಗವಾಗಿ ನೀರು ಆವರಿಸಿಕೊಂಡಿದೆ. ಇದರ ಪರಿಣಾಮ, ಗ್ಯಾಸ್ ಪ್ಲಾಂಟ್‌ನಲ್ಲಿ ಅನಿಲ ಮರುಪೂರಣಕ್ಕಾಗಿದ್ದ ಸುಮಾರು 1200 ಎಲ್‌ಪಿಜಿ ಗ್ಯಾಸ್ ಸಿಲಿಂಡರ್‌ಗಳು ಭೀಕರ ಪ್ರವಾಹದಲ್ಲಿ ನೀರಿನ ಮೇಲೆ ತೇಲುತ್ತಾ ಕೊಚ್ಚಿ ಹೋಗಿವೆ.

ಅಕಸ್ಮಾತ್, ನೀರಿನಲ್ಲಿ ಕೊಚ್ಚಿಹೋದ ಸಿಲಿಂಡರ್‌ಗಳಲ್ಲಿ ಗ್ಯಾಸ್ ತುಂಬಿರುತ್ತಿದ್ದರೆ ದೊಡ್ಡ ಮಟ್ಟದ ಸ್ಫೋಟ ಅಥವಾ ಭೀಕರ ಅನಾಹುತ ಸಂಭವಿಸುವ ಸಾಧ್ಯತೆಯಿತ್ತು. ಆದರೆ, ಅದೃಷ್ಟವಶಾತ್ ಪ್ರವಾಹದಲ್ಲಿ ಕೊಚ್ಚಿಹೋದ ಎಲ್ಲಾ 1200 ಸಿಲಿಂಡರ್‌ಗಳು ಖಾಲಿಯಾಗಿದ್ದವು ಎನ್ನಲಾಗಿದೆ.

ಕೊಚ್ಚಿಹೋದ ಸಿಲಿಂಡರ್‌ಗಳು ಏನಾದವು?
ಮತ್ತೊಂದೆಡೆ, ಘಟನೆಯ ಬಳಿಕ ಸ್ಥಳೀಯ ಆಡಳಿತ ಮತ್ತು ರಕ್ಷಣಾ ಸಿಬ್ಬಂದಿ ದೋಣಿಗಳ ಸಹಾಯದಿಂದ ನದಿ ಮತ್ತು ಹಳ್ಳಗಳಲ್ಲಿ ತೇಲುತ್ತಿದ್ದ ಸಿಲಿಂಡರ್‌ಗಳನ್ನು ಮರುಪಡೆಯಲು ಕಾರ್ಯಾಚರಣೆ ನಡೆಸುತ್ತಿದ್ದಾರೆ. ಇದರೊಂದಿಗೆ HPCL ಮತ್ತು ಸ್ಥಳೀಯ ಆಡಳಿತವು ಘಟನೆ ಬಗ್ಗೆ ತನಿಖೆ ನಡೆಸುತ್ತಿದೆ. ಇದೆ ವೇಳೆ, ಭವಿಷ್ಯದಲ್ಲಿ ಇಂತಹ ಹಠಾತ್ ಪ್ರವಾಹದಿಂದ ಸಸ್ಯವನ್ನು ಹೇಗೆ ಸುರಕ್ಷಿತವಾಗಿಡುವುದು ಎಂಬುದರ ಕುರಿತು ಚಿಂತನ-ಮಂಥನವೂ ನಡೆಯುತ್ತಿದೆ.