Don't mislead: ಸಿನಿಮಾ ಕ್ಲಿಪ್ ಬಳಸಿ ಟ್ರೋಲ್‌ ಮಾಡುತ್ತಿರುವವರಿಗೆ ಕಂಗನಾ ತಿರುಗೇಟು!

ನವದೆಹಲಿ: NEET ಪ್ರಶ್ನೆ ಪತ್ರಿಕೆ ಸೋರಿಕೆ ವಿರುದ್ಧ ಇತ್ತೀಚಿಗೆ ದೆಹಲಿಯಲ್ಲಿ ನಡೆದ ಸಿಜೆಪಿ ಪ್ರತಿಭಟನೆಯಲ್ಲಿ ಭಾಗವಹಿಸಿದ್ದ ಹಿಂದೂ ಯುವತಿಯರ ಕುರಿತು ಹೇಳಿಕೆ ನೀಡಿದಾಗಿನಿಂದ ಬಾಲಿವುಡ್ ನಟಿ ಹಾಗೂ ಬಿಜೆಪಿ ಸಂಸದೆ ಕಂಗನಾ ರಣಾವತ್ ಭಾರಿ ಟ್ರೋಲ್ ಗೆ ಗುರಿಯಾಗಿದ್ದಾರೆ.

ಆಕೆಯ ಸಿನಿಮಾದ ಕ್ಲೀಪ್ ಬಳಸಿ ಟ್ರೋಲ್‌ ಮಾಡಲಾಗುತ್ತಿದೆ. ಇಂತಹ ಟ್ರೋಲ್ ಗಳಿಗೆ ಹೆದರದ ಕಂಗನಾ, ಇಂತಹ ಕೃತ್ಯಗಳು ಯುವಜನತೆಯನ್ನು ದಾರಿ ತಪ್ಪಿಸುತ್ತವೆ ಎಂದು ಕಿಡಿಕಾರಿದ್ದಾರೆ. ಜುಲೈ 20 ರಂದು ಸಂಸತ್ ಚಲೋ ನಡೆಸಿದ Gen-Zಗಳನ್ನು "ಜನರೇಷನ್ ಗಟರ್" ಎಂದು ಕರೆದಿದ್ದ ಕಂಗನಾ, ಪ್ರತಿಭಟನೆಯ ವೇಳೆ ಅವರು ಮಾಡಿದ ವೀಡಿಯೊಗಳು "ವಾಕರಿಕೆ ತರಿಸುವಂತಿವೆ" ಎಂದು ಹೇಳಿದ್ದರು.

ಇದಕ್ಕೆ ಪ್ರತಿಕ್ರಿಯೆಯಾಗಿ, ಅನೇಕ ನೆಟ್ಟಿಗರು ಅವರ ಸಿನಿಮಾ ಮತ್ತಿತರ ಇತರ ಕಾರ್ಯಕ್ರಮಗಳ ವಿಡಿಯೋ ಹಂಚಿಕೊಳ್ಳುವ ಮೂಲಕ ತೀವ್ರ ಟ್ರೋಲ್ ಮಾಡುತ್ತಿದ್ದಾರೆ.

ಶುಕ್ರವಾರ ತಮ್ಮ ಇನ್‌ಸ್ಟಾಗ್ರಾಮ್ ಸ್ಟೋರಿಯಲ್ಲಿ ವೀಡಿಯೊ ಕ್ಲಿಪ್ ವೊಂದನ್ನು ಹಂಚಿಕೊಂಡಿರುವ ಕಂಗನಾ, "ನಾನು ಲಕ್ಷಾಂತರ ರೂಪಾಯಿ ಸಂಭಾವನೆ ಪಡೆದು ಮಾಡಿದ ಸಿನಿಮಾ ಪಾತ್ರಗಳ ಕ್ಲಿಪ್ ಗಳು ಅಥವಾ ನನ್ನದೇ ಆದ ಸಿಬ್ಬಂದಿ, ಕಾರ್ಯಕ್ರಮ ಸಂಘಟಕರು ಮತ್ತು ಭದ್ರತಾ ಸಿಬ್ಬಂದಿಯ ನಡುವೆ ಇರುವ ಉನ್ನತ ಮಟ್ಟದ ಮನರಂಜನಾ ಕಾರ್ಯಕ್ರಮಗಳ ದೃಶ್ಯಗಳನ್ನು ಬಳಸಲು ಬಯಸುತ್ತೀರಿ. ಇವುಗಳನ್ನು ಬಳಸಿಕೊಂಡು, ಸುಲಭವಾಗಿ ಪ್ರಭಾವಿತರಾಗುವ ಹದಿಹರೆಯದವರಿಗೆ, ರಸ್ತೆಗಳಲ್ಲಿ, ಶಾಲಾ ಕಾರ್ಯಕ್ರಮಗಳಲ್ಲಿ ಅಥವಾ ಕಳಪೆ ಮಟ್ಟದ ಕ್ಲಬ್‌ಗಳಲ್ಲಿಯೂ ಇದೇ ರೀತಿಯ ವರ್ತನೆಯನ್ನು ಮಾಡಬಹುದು ಎಂದು ನಂಬಿಸಲು ಹೊರಟಿದ್ದೀರಾ? ಇವೆಲ್ಲವೂ ಒಂದೇ ಆಗಿವೆಯೇ?" ಎಂದು ಪ್ರಶ್ನಿಸಿದ್ದಾರೆ.

"ಯುವಜನತೆಯನ್ನು ದಾರಿ ತಪ್ಪಿಸಬೇಡಿ, ಇವೆಲ್ಲವೂ ಒಂದೇ ಅಲ್ಲ. ಇಂದು ನೀವು ಇತರರ ಮಕ್ಕಳನ್ನು ದಾರಿ ತಪ್ಪಿಸುತ್ತಿದ್ದೀರಿ, ನಾಳೆ ಅದು ನಿಮ್ಮ ಮಕ್ಕಳಿಗೂ ತಟ್ಟಬಹುದು ಎಂದು ಅವರು ಹೇಳಿದ್ದಾರೆ.