ನಟ ಸೂರ್ಯ ಹುಟ್ಟುಹಬ್ಬ: ಬ್ಯಾನರ್ ಹಾಕುವಾಗ ವಿದ್ಯುತ್ ಹರಿದು ಇಬ್ಬರು ಯುವಕರ ಸಾವು

ಆಂಧ್ರಪ್ರದೇಶ: ತಮ್ಮ ನೆಚ್ಚಿನ ನಟನ ಹುಟ್ಟುಹಬ್ಬದ ಸಂಭ್ರಮದಲ್ಲಿದ್ದ ವೇಳೆ ಇಬ್ಬರು ಅಭಿಮಾನಿಗಳು ಜೀವ ಕಳೆದುಕೊಂಡಿರುವ ಆಘಾತಕಾರಿ ಘಟನೆ ನಡೆದಿದೆ.

ಟಾಲಿವುಡ್​ ಖ್ಯಾತ​ ನಟ ಸೂರ್ಯ ಅವರ ಹುಟ್ಟುಹಬ್ಬವಿತ್ತು. ಅದರಂತೆ ಅಭಿಮಾನಿಗಳಿಬ್ಬರು ಸೂರ್ಯನ ಹುಟ್ಟುಹಬ್ಬದ ಸಲುವಾಗಿ ಬ್ಯಾನರ್​ ಅಳವಡಿಸುವಾಗ ಕರೆಂಟ್​ ಶಾಕ್​ ಹೊಡೆದು ಸಾವನ್ನಪ್ಪಿದ್ದಾರೆ.

ಆಂಧ್ರಪ್ರದೇಶದ ಪಲ್ನಾಡು ಜಿಲ್ಲೆಯಲ್ಲಿ ಈ ಘಟನೆ ನಡೆದಿದೆ. ಜಿಲ್ಲೆಯ ಮೋಪುಲವಾರಿಪಾಲೆಂಬ ಗ್ರಾಮದ ನರಸರಾವ್​ಪೇಟೆ ಮಂಡಲದ ನಕ್ಕಾ ವೆಂಕಟೇಶ್​ ಮತ್ತು ಪೋಲೂರಿ ಸಾಯಿ ಎಂಬವರು ವಿದ್ಯುತ್​ ಸ್ಪರ್ಶದಿಂದ ಮೃತಪಟ್ಟಿದ್ದಾರೆ.

ಇದನ್ನೂ ಓದಿ: ಕೊಪ್ಪಳ: ಮತ್ತೋರ್ವ ಪುನೀತ್ ಅಭಿಮಾನಿ ಸಾವು

ಪೊಲೀಸರ ಪ್ರಕಾರ ನಟ ಸೂರ್ಯ ಬರ್ತ್​ಡೇ ಅಂಗವಾಗಿ ಬ್ಯಾನರ್​​​ ಅಳವಡಿಸುವಾಗ ಕರೆಂಟ್​​ ಶಾಕ್​ ಹೊಡೆದಿದೆ. ಕಬ್ಬಿಣದ ರಾಡ್​​​​​ ತಂತಿಗೆ ತಗುಲಿದಾಗ ಶಾಕ್​​ ಹೊಡೆದಿದೆ. ಇದರಿಂದಾಗಿ ಇಬ್ಬರು ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ ಎಂದು ಹೇಳಿದ್ದಾರೆ.

ಇನ್ನು ವೆಂಕಟೇಶ್ ಮತ್ತು ಸಾಯಿ ಇಬ್ಬರು ಡಿಗ್ರಿ ವ್ಯಾಸಂಗ ಮಾಡುತ್ತಿದ್ದರು ಎಂದು ತಿಳಿದುಬಂದಿದೆ. ಈ ಇಬ್ಬರ ಸಾವಿಗೆ ಕಾಲೇಜಿನ ಆಡಳಿತ ಮಂಡಳಿಯ ನಿರ್ಲಕ್ಷ್ಯವೇ ಕಾರಣ ಎಂದು ಮೃತ ಪೊಲೂರು ಸಾಯಿ ಸಹೋದರಿ ಅನನ್ಯಾ ಆರೋಪಿಸಿದ್ದಾರೆ.