363 ಸಂಸದರು, ಶಾಸಕರ ವಿರುದ್ಧ ಕ್ರಿಮಿನಲ್ ಕೇಸ್, ಆರೋಪ ಸಾಬೀತಾದರೆ ಅನರ್ಹ: ಎಡಿಆರ್

ನವದೆಹಲಿ: ದೇಶದ ಒಟ್ಟು 363 ಸಂಸದರು ಮತ್ತು ಶಾಸಕರ ವಿರುದ್ಧ ಕ್ರಿಮಿನಲ್ ಪ್ರಕರಣಗಳು ದಾಖಲಾಗಿದ್ದು, ಒಂದು ವೇಳೆ ಅವರ ವಿರುದ್ಧದ ಆರೋಪ ಸಾಬೀತಾದರೆ ಜನಪ್ರತಿನಿಧಿ ಕಾಯ್ದೆಯ ಅಡಿಯಲ್ಲಿ ಅವರನ್ನು ಅನರ್ಹಗೊಳಿಸಲಾಗುತ್ತದೆ ಎಂದು ಅಸೋಸಿಯೇಷನ್ ​​ಫಾರ್ ಡೆಮಾಕ್ರಟಿಕ್ ರಿಫಾರ್ಮ್ಸ್ (ಎಡಿಆರ್) ಹೇಳಿದೆ.

ಕೇಂದ್ರ ಮತ್ತು ರಾಜ್ಯಗಳಲ್ಲಿನ ಮೂವತ್ತೊಂಬತ್ತು ಸಚಿವರು ತಮ್ಮ ವಿರುದ್ಧದ ಕ್ರಿಮಿನಲ್ ಪ್ರಕರಣಗಳನ್ನು ಘೋಷಿಸಿದ್ದಾರೆ. ಇವುಗಳನ್ನು ಅನರ್ಹತೆ ಕುರಿತ ಜನ ಪ್ರತಿನಿಧಿ ಕಾಯಿದೆಯ ಸೆಕ್ಷನ್ 8 ರಲ್ಲಿ ಸೇರಿಸಲಾಗಿದೆ.

ಅಸೋಸಿಯೇಷನ್ ​​ಫಾರ್ ಡೆಮಾಕ್ರಟಿಕ್ ರಿಫಾರ್ಮ್ಸ್(ಎಡಿಆರ್) ಮತ್ತು ನ್ಯಾಷನಲ್ ಎಲೆಕ್ಷನ್ ವಾಚ್ 542 ಲೋಕಸಭಾ ಸದಸ್ಯರು ಮತ್ತು 1,953 ಶಾಸಕರ ಅಫಿಡವಿಟ್ ಗಳನ್ನು 2019 ರಿಂದ 2021 ರವರೆಗೆ ವಿಶ್ಲೇಷಿಸಿದೆ.

2,495 ಸಂಸದರು/ಶಾಸಕರಲ್ಲಿ 363(ಶೇಕಡಾ 15 ರಷ್ಟು) ಸಂಸದರು ಮತ್ತು ಶಾಸಕರು ತಾವು ಕ್ರಿಮಿನಲ್ ಪ್ರಕರಣಗಳನ್ನು ಎದುರಿಸುತ್ತಿರುವುದಾಗಿ ಘೋಷಿಸಿಕೊಂಡಿದ್ದಾರೆ. 

ಅವರಲ್ಲಿ 296 ಶಾಸಕರು ಮತ್ತು 67 ಸಂಸದರು ಸೇರಿದ್ದಾರೆ.

ಪಕ್ಷಗಳ ಪೈಕಿ, ಬಿಜೆಪಿಯು ಅತಿ ಹೆಚ್ಚು ಕ್ರಿಮಿನಲ್ ಪ್ರಕರಣಗಳನ್ನು ಎದುರಿಸುತ್ತಿರುವ 83 ಸಂಸದರು/ಶಾಸಕರನ್ನು ಹೊಂದಿದೆ, ನಂತರ ಕಾಂಗ್ರೆಸ್ 47 ಮತ್ತು ಟಿಎಂಸಿ 25 ಶಾಸಕರು, ಸಂಸದರು ಕ್ರಿಮಿನಲ್ ಪ್ರಕರಣ ಎದುರಿಸುತ್ತಿದ್ದಾರೆ ಎಂದು ಎಡಿಆರ್ ಹೇಳಿದೆ.